Read Central Bicolano Isaiah 24 Bible Online

Isaiah 24 - Central Bicolano bible

Isaiah 24

¹Raraoton nin Kagurangnan an kinaban asin babayaan niya iyan na mamondo. Bibiribidon niya an ibabaw kan daga asin iwawarak niya an mga tawo.

²Pareho an mangyayari sa gabos—sa mga padi asin sa banwaan, sa mga oripon saka sa mga kagurangnan, sa mga parabakal asin sa mga nagpapabakal, sa mga nagpapasubli saka sa mga parasubli, sa mga mayaman asin sa mga dukha.

³Mararaot an daga asin magagaba, huli ta ini an itinaram nin Kagurangnan.

⁴An daga magigin mamara asin alang; an bilog na kinaban luluyahon; sabay na malalapa an daga saka an kaitaasan.

⁵Dinigtaan kan mga tawo an daga sa paglapas kan mga togon nin Dios asin sa paglapas kan tipan na daing kasagkoran.

⁶Kaya minaldisyon nin Dios an daga asin nagbabayad na an mga tawo kan saindang kasalan. Tinurunaw niya an mga nag-eerok sa daga asin dikit na sana an natadang buhay.

⁷Nagkakaaralang an mga balagon nin ubas, asin dikit-dikit na nawawara an arak. An mga maogma kaidto mamondo na ngunyan

⁸asin an maogmang tugtog sa saindang mga arpa saka lira dai na nadadangog.

⁹Mayo nang maogmang karantahan sa irinoman; mayo nang naoogma sa namit kan arak.

¹⁰Sa syudad, an gabos karibongan, asin pinipintoan kan mga tawo an saindang mga harong tanganing magin ligtas.

¹¹Nagkukurahaw an mga tawo sa mga tinampo huli ta mayo na nin arak. Sagkod pa man mayo nang kaogmahan; nawara na iyan sa daga.

¹²Pagkarumpag an natada sa syudad, asin raot an mga trangkahan kaini.

¹³Siring kaini an mangyayari sa lambang nasyon sa kinaban. Makakaarog iyan sa kataposan kan pag-ani, pakatapos na parakdagon an gabos na oliba sa lambang poon asin gunoon sa balagon an huring ubas.

¹⁴An mga matatada mag-aawit sa kaogmahan. Magbabareta an mga nasa solnopan kun gurano kadakula an Kagurangnan,

¹⁵mantang an mga nasa sirangan mag-oomaw saiya. Mag-oomaw sa Kagurangnan, an Dios nin Israel, an mga nag-eerok sa baybayon.

¹⁶Hale sa poro kan kinaban madadangog nyato an mga awit nin pag-omaw sa Israel, an matanos na nasyon. Alagad mayo ako nin paglaom! Nagrarani sako an kagadanan! Padagos sa pagpasaluib an mga parapasaluib, asin nag-oorog an saindang pagpapasaluib.

¹⁷Pagdangog kamo sako gabos! Naghahalat sa saindo an mga katakotan, an mga kalot, asin an mga siod.

¹⁸An siisay man na maghingowang makadulag sa katakotan mahuhulog sa kalot, asin an makadulag sa kalot madadakop kan siod. Mahugpa an makosog na uran, asin matatanyog an mga pundasyon kan kinaban.

¹⁹Magatak an daga, mapapasa asin mababanga.

²⁰Siring sa sarong burat, masayasay an daga asin masayaw siring sa payag kun igwa nin bagyo. Nagagabatan an kinaban kan saiyang mga kasalan; mabagsak iyan asin dai na makakabangon.

²¹Maabot an panahon na papadusahan nin Kagurangnan an mga kapangyarihan sa itaas asin an mga namamayo kan daga.

²²Titiponon nin Dios sa sarong kalot an mga hade siring sa mga bilanggo. Ibubugtak niya sinda sa bilanggoan sagkod na dumatong an aldaw kan pagpadusa sainda.

²³Magdidiklom an bulan, asin dai na maliwanag an aldaw, huli ta an Kagurangnan nin mga hukbo an maghahade sa Jerusalem, sa Bukid nin Sion, asin mahihiling kan mga kamagurangan kan banwaan an saiyang kamurawayan.