Read Central Bicolano Isaiah 25 Bible Online

Isaiah 25 - Central Bicolano bible

Isaiah 25

¹Kagurangnan, ika an sakuyang Dios; gagalangan taka asin oomawon ko an saimong ngaran. Huli ta naggibo ka nin makangangalas na mga bagay; maimbod mong pinapangyari an mga plano na minukna mo kaidto pang panahon.

²Ginaraba mo an mga syudad asin rinaot mo an mga pampapusog kaiyan. Mayo na an mga palasyo na itinugdok kan samong mga kaiwal; dai na nanggad iyan hihirahayon.

³Kaya oomawon ka kan mga nag-eerok sa mapangyaring mga nasyon; katatakotan ka sa mga syudad nin makuring mga nasyon.

⁴Huli ta nagin bantayan ka para sa mga dukha saka sa mga nangangaipo; limpoy sa init asin pailihan sa bagyo. Siring sa sarong bagyo na minatama sa lanob an pagsalakay kan mga makuring tawo,

⁵siring sa init sa mamarang lugar. Alagad ika, Kagurangnan, an nagpaalo kan samong mga kaiwal; pinaontok mo an kinurahaw nin mga makuring tawo, siring na an init nin aldaw pinapalipot kan panganoron.

⁶Digdi sa Bukid nin Sion, maandam nin bangkete an Kagurangnan nin mga hukbo para sa gabos na nasyon kan kinaban—sarong bangkete nin masiram na mga pagkakan asin managom na mga arak.

⁷Madali niyang hahaleon an dampog nin kamondoan sa bukid na ini—an dampog na nakakatahob sa gabos na nasyon.

⁸Hahalonon nin Kagurangnan Dios an kagadanan sagkod pa man, asin papahidon niya an mga luha sa gabos na lalawogon patin hahaleon niya an kasosopgan na tinios kan saiyang banwaan sa bilog na kinaban. An Kagurangnan an nagtaram!

⁹Kun mangyari na ini, masabi an gabos, “Siya an samong Dios! Ibinugtak mi sa saiya an samong pagsarig, asin ilinigtas niya kami. Siya an Kagurangnan! Ibinugtak mi sa saiya an samong pagsarig, asin maogma kami saka magayagaya huli ta ilinigtas niya kami.”

¹⁰Susurogon nin Kagurangnan an Bukid nin Sion, alagad titimaktimakan niya an mga taga Moab, siring kan pagtimaktimak sa dagami sa tapokan nin odo.

¹¹Uunaton ninda an saindang mga kamot na garo naghihingowang maglangoy, alagad sosopogon sinda nin Dios, asin mag-iirarom an saindang mga kamot.

¹²Raraoton nin Dios an mga bantayan nin Moab kaiba kan mga halangkaw na kudal kaini asin tutumbahon niya an mga iyan sa daga.