Read Central Bicolano Isaiah 26 Bible Online

Isaiah 26 - Central Bicolano bible

Isaiah 26

¹Maabot an panahon na mag-aawit an mga tawo kan awit na ini sa daga nin Juda: Makosog an samong syudad! An Dios mismo an nagbabantay kan mga kudal kaini!

²Bukasi an mga trangkahan kan syudad tanganing makalaog an maimbod na nasyon, an nasyon na an mga namamanwaan naggigibo kan matanos.

³Ika, Kagurangnan, an nagtatao nin katoninongan sa mga tawong danay na pusog an katuyohan asin nananarig sa saimo.

⁴Magsarig sa Kagurangnan sagkod lamang, huli ta an Kagurangnan Dios iyo an gapong mayong kataposan.

⁵Siya an nagpababa kan mga mapaabaw-abaw; rinaot niya an pusog na syudad na saindang pinag-eerokan, asin rinumpag niya an mga kudal kaiyan.

⁶Linalakawan iyan ngunyan kan mga inapi asin tinimaktimakan kan saindang mga bitis.

⁷Kagurangnan, pinatag mo an agihan kan mga matanos; pantay an dalan na saindang linalakawan.

⁸Sinusunod mi an saimong kabotan asin naglalaom kami saimo; ika an bilog ming kamawotan.

⁹Sa bilog kong puso, hinihidaw taka pagkabanggi; sa saimong paghukom sa daga asin sa mga tawo diyan, an hustisya saindang manonodan.

¹⁰Maski naheherakan mo an mga tampalasan dai nanggad sinda nakakanood sa paggibo nin matanos. Maski digdi sa daga nin mga matanos na tawo sala pa giraray an saindang ginigibo; habo nindang midbidon an saimong kadakulaan.

¹¹Dai naaaraman kan saimong mga kaiwal na papadusahan mo sinda. Sopogon mo sinda, Kagurangnan, asin patiosa sinda; patiosa sinda kan padusa na saimong inandam. Pahilingan sainda kun gurano an pagkamoot mo sa saimong banwaan.

¹²Papauswagon mo kami, Kagurangnan; an gabos na samong nahahaman iyo an bunga kan saimong ginibohan.

¹³O Kagurangnan na samong Dios, pinaghadean kami nin iba pwera saimo, alagad ika sana an samong Kagurangnan.

¹⁴Garadan na sinda ngunyan asin dai na mabubuhay giraray; dai na mabangon an saindang mga kalag, huli ta pinadusahan mo sinda asin saimong ginadan. Mayo nang nakakagiromdom sa sainda ngunyan.

¹⁵Alagad, pinadakula mo an samong nasyon, Kagurangnan; pinahiwas mo an mga pagdolonan kaiyan, asin iyan an nagdara saimo nin kamurawayan.

¹⁶Pinadusahan mo an saimong banwaan, Kagurangnan, asin namibi sinda saimo sa kahorasaan.

¹⁷Ika, Kagurangnan, an nagpaagrangay sa samo siring sa pag-agrangay nin sarong babaeng nangangaki.

¹⁸Nakulogan kami alagad mayong namundag sa samo. Mayo kaming nakuang kapangganahan para sa samong daga; mayo kaming nahaman.

¹⁹Mabubuhay giraray an samong mga gadan! Mabangon an saindang mga hawak. Mamata asin maawit sa kaogmahan an mga nagkakatorog sa saindang lulubngan. Siring na pinapaogma kan ambon an mamarang daga, bubuhayon man nin Kagurangnan an haloy nang nagkagaradan.

²⁰Lumaog kamo sa saindong mga harong, sakong banwaan, asin serahan nindo an mga pintoan. Magtrabaho kamo sa kadikit na panahon sagkod na matapos an kaanggotan nin Dios.

²¹Huli ta madatong an Kagurangnan hale sa langitnon niyang erokan tanganing padusahan an mga tawo kan saindang mga kasalan. An mga panggagadan na ginibo sa hilom mahahayag, asin dai na tatagoon kan daga an mga bangkay kan mga nagkagaradan.