Read Central Bicolano Isaiah 28 Bible Online

Isaiah 28 - Central Bicolano bible

Isaiah 28

¹Herak man sa kahadean nin Israel! Nawawara na an saiyang kamurawayan siring sa korona nin burak sa payo kan burat niyang mga lider. Mahahamot an mga payo kan saiyang mga burat na lider, alagad naghihirigda na sinda na mayo nin pakaisi sa kaburatan.

²An Kagurangnan igwa nin sarong tawong makosog asin mapangyari na andam sa pagsalakay sainda. Madatong siya siring sa bagyo, siring sa makosog na uran; madatong siya siring sa makosog na baha, asin dadaogon niya an daga.

³Titimaktimakan an kapaabaw-abawan kan burat na mga lider,

⁴asin an napapara nang kamurawayan kan mga mapaabaw-abaw na lider mawawara siring sa enot na bunga kan higera bago an tig-init, na ginuguno asin kinakakan kun hinog na.

⁵Sa aldaw na iyan, an Kagurangnan nin mga hukbo makakaagid sa sarong mamurawayon na korona nin burak para sa saiyang banwaan na nagkatarada.

⁶Siya an matao kan espiritu nin hustisya sa mga naglilingkod bilang mga hukom, asin kan kosog nin boot sa mga nagbabantay kan syudad sa anoman na pagsalakay.

⁷Burat an mga propeta saka mga padi, kaya nagsasayasay sinda. Nagkakadarasmag sinda sa karibongan huli ta dakul an nainom nindang arak. Sobra an kaburatan kan mga propeta tanganing masabotan ninda an ipinadarang mga bisyon nin Dios. Siring man an mga padi; dai na sinda nakakahatol kan mga kaso na dinadara sainda.

⁸An mga lamesa na saindang ginagamit pano nin suka, asin mayo nang natadang lugar na malinig.

⁹Nagrereklamo sinda dapit sako. Nagsasabi sinda, “Siisay sa paghona kan tawong iyan an saiyang tinutukdoan? Siisay an nangangaipo kan saiyang mensahe? An mensahe niya marahay sana para sa mga aking bago pa sanang butason!

¹⁰Boot niya kitang tukdoan kan lambang letra, linya, saka adal.”

¹¹Kun habo kamong magdangog sako, an mga dayuhan na nagtataram kan dai nindo aram na lengwahe an gagamiton nin Dios tanganing tukdoan kamo.

¹²Kapahingaloan saka karangahan an inalok niya sa saindo, alagad habo kamong magdangog saiya.

¹³Kaya tutukdoan kamo nin Kagurangnan kan lambang letra, linya, saka adal. Dangan madadalinas kamo sa lambang lakad na gibohon nindo. Malulugad, masisiod, asin mabibihag kamo.

¹⁴Kaya dangoga nindo an tataramon nin Kagurangnan, kamong mga paratuyatuyang namamayo kan banwaan digdi sa Jerusalem.

¹⁵Ipinag-oorgulyo nindo na nakipagtipan kamo sa kagadanan asin nagkaoroyon kamo saka an kinaban kan mga gadan. Nagsasabi man kamo na dai kamo maaano pagdatong kan kahorasaan, huli ta nagsasarig kamo sa kaputikan asin sa daya tanganing magin ligtas kamo.

¹⁶Iyo ini ngunyan an sinasabi nin Kagurangnan Dios: “Mabugtak ako sa Sion nin sarong pundasyon na pusog saka makosog. Diyan ko ibubugtak an gapong patugmadan na nasusuratan kan mga tataramon, ‘An pagtubod na pusog matinios man.’

¹⁷An hustisya iyo an magigin metros na pansukol kan pundasyon, asin an katanosan iyo an magigin plumo.” An uran nin yelo iyo an maanod kan gabos na kaputikan na sinasarigan nindo, asin raraoton kan baha an saindong pinagtatagoan.

¹⁸Dangan mawawaraan nin halaga an pakipagtipan nindo sa kagadanan, asin mawawaraan nin halaga an pakipag-oyon nindo sa kinaban kan mga gadan. Pag-agi kan kasakitan, madadaog kamo.

¹⁹Titioson nindo iyan aldaw-banggi. An lambang bagong mensaheng hale sa Dios magdadara saindo nin bagong kahandalan!

²⁰Makakaarog kamo kan lalaki sa talinhaga, na naghingowang magkatorog sa sarong katre na halipot para saiya, na may tamong na sadit nin marahay tanganing matahoban siya.

²¹Makikilaban an Kagurangnan siring kan ginibo niya sa Bukid nin Perazim asin sa kapantayan nin Gibeon, tanganing mangyari an saiyang plano—maski dipisil masabotan an saiyang mga gibo. Tataposon niya an saiyang trabaho, an misteryo niyang trabaho.

²²Hare nindo pagngisi an patanid na itinatao ko saindo! Kun magngisi kamo, orog na magigin masakit para saindo an pagdulag, huli ta nadangog ko hale sa Kagurangnan Dios nin mga hukbo an sarong pagboot na raoton an bilog na daga.

²³Dangoga nindo ako; hinanyoga nindo an sinasabi ko saindo.

²⁴Daing ontok daw na inaarado kan paraoma an saiyang oma sa pag-andam kaiyan sa pagtanom?

²⁵Pakatapos na mapantay niya an daga, bakong tinatanoman na niya iyan nin anis saka komino? Raya-rayang itinatanom niya an trigo saka sebada, dangan an ibang banhi sa palibot kan oma.

²⁶Aram niya an saiyang trabaho, huli ta tinukdoan siya nin Dios.

²⁷Dai nanggad siya minagamit nin magabat na pamakol tanganing lumuwas an mga pisog kan anis o komino, kundi magian sanang pamakol an saiyang ginagamit.

²⁸Dai niya sinasayang an trigo sa daing ontok na pagginik kaiyan; liniligis niya iyan nin kariton asin dai naroronot an trigo.

²⁹An gabos na kadonongan na iyan gikan sa Dios, asin danay na nangyayari an siring!