Read Central Bicolano Isaiah 29 Bible Online

Isaiah 29 - Central Bicolano bible

Isaiah 29

¹Herak man sa altar nin Dios, an mismong Jerusalem! Herak man sa syudad na pinagkampohan ni David! Palihisa pa nindo an saro o duwang taon, kaiba an pyesta saka mga pag-oogma,

²dangan an Dios madara nin kasakitan sa syudad na inaapod “altar nin Dios.” Magkakaigwa nin paghibi saka paghaya, asin an bilog na syudad magigin sarong altar na natatahoban nin dugo.

³Sasalakayon nin Dios an syudad, papalibotan iyan asin papalibotan nin mga tore.

⁴An Jerusalem makakaarog sa sarong kalag na naghihingowang makataram hale sa irarom nin daga, sarong sadit na tingog na nagluluwas hale sa alpog.

⁵Alagad an gabos na dayuhan na masalakay saimo, Jerusalem, ipapalid siring sa alpog, asin an saindang mga nakakatakot na hukbo maralayog siring sa dagami. Dangan sa madali, sa oras na dai mo linalaoman,

⁶ililigtas ka kan Kagurangnan nin mga hukbo sa paagi nin daguldol, bagyo, asin linog. Mapadara siya nin mga aripuros, bagyo, asin nanghahalon na kalayo.

⁷Dangan an gabos na hukbo kan mga nasyon na nagsasalakay sa syudad nin altar nin Dios, an saindang mga armas saka kagamitan—an gabos—mapapara siring sa sarong pangatorogan, siring sa sarong bisyon sa banggi.

⁸An gabos na nasyon na nagtiripon tanganing salakayon an Jerusalem makakaagid sa sarong nagugutom na lalaki na nangatorogan na siya nagkakakan asin nagimatang nagugutom, o siring sa sarong magagadan sa paha na nangatorogan na siya nag-iinom dangan nagimata na may mamarang halonan.

⁹Magpadagos kamo sa pagigin lolong! Magpadagos kamo sa pagigin sarong buta! Magburat kamo maski mayo nin arak! Magsayasay kamo maski dai nakainom minsan sarong tagdo!

¹⁰Huli ta ibinubo saindo nin Kagurangnan an espiritu nin hararom na pagkatorog. Kamong mga propeta iyo kuta an mga mata kan banwaan, alagad binuta kamo nin Dios.

¹¹Matatago saindo an kahulogan kan lambang bisyon; makakaarog iyan sa sarong libro na may selyo. Kun darahon nindo iyan sa tataong magbasa asin hagadon nindo na basahon iyan saindo, masabi siyang dai niya iyan magigibo huli ta igwa iyan nin selyo.

¹²Kun darahon nindo iyan sa dai tataong magbasa, asin hagadon nindo na basahon iyan saindo, masabi siyang dai siya tataong magbasa.

¹³Nagtaram an Kagurangnan, “An mga tawong ini nagsasabi na nagdodolok sinda sako asin inoomaw ninda ako, alagad an saindang puso harayo sako. An relihiyon ninda gabos sana mga pagsusundon saka mga tradisyon nin tawo na tinoom ninda.

¹⁴Kaya uya, magibo giraray ako nin makangangalas na mga bagay sa banwaan na ini. An saindang mga madonong mahahayag na mga lolong, asin an bilog nindang katusohan mawawaraan nin halaga.”

¹⁵Herak man sa mga nagtatago sa Kagurangnan kan saindang mga plano! Ginigibo ninda iyan sa hilom asin naghohona sinda na mayo nin nakakahiling sainda o mayo nin nakakaaram kan saindang ginigibo.

¹⁶Binabalintong ninda an gabos. Arin an orog na mahalaga, an paragibo nin koron o an laboy? Makakataram daw sa tawong kaggibo saiya an anoman asin magsabing, “Bakong ika an naggibo sako”? O pwede daw magsabi iyan saiya nin, “Dai ka tatao kan saimong ginigibo”?

¹⁷Siring sa kasabihan, dai mahahaloy, an mahibog na kadlagan magigin kaomahan, asin an kaomahan mabalik sa pagigin kadlagan.

¹⁸Pag-abot kan aldaw na iyan, an bongog makakadangog mantang binabasa nin makosog an sarong libro, asin an buta na namuhay sa kadikloman, mamuklat kan saiyang mga mata dangan makakahiling.

¹⁹An mga dukha asin an mga mapakumbaba magkakamit kan kaogmahan na itinatao nin Kagurangnan, an banal na Dios nin Israel.

²⁰Iyan an magigin kataposan kan mga nang-aapi sa iba asin nagpapahiling nin mayong paggalang sa Dios. Gagadanon an gabos na makasalan.

²¹Gagadanon nin Dios an mga nagpapakaraot sa iba, an mga nag-oolang na mapadusahan an mga kriminal, asin an mga nagpuputik tanganing dai makakua nin hustisya an matanos na tawo.

²²Kaya ngunyan an Kagurangnan, an Dios nin Israel, na nagligtas ki Abraham sa kasakitan, nagsasabi, “Dai na kamo mamumugtak sa kasosopgan, banwaan ko, asin dai na mamumula sa sopog an saindong lalawogon.

²³Kun mahiling na nindo an mga aki na itatao ko saindo, aakoon nindo na ako an banal na Dios nin Israel. Gagalangan nindo ako asin magkakaigwa kamo nin pagkatakot sa sako.

²⁴An mga lolong makakanood na makasabot, asin an danay na naggugumodgumod maoogma nang magpatukdo.”