Read Central Bicolano Isaiah 31 Bible Online

Isaiah 31 - Central Bicolano bible

Isaiah 31

¹Herak man sa mga nagduduman sa Egipto nganing magpatabang! Nagsasarig sinda sa kosog kan hukbo nin Egipto—mga kabayo, mga karwahe, saka mga soldados. Alagad dai sinda nagsasarig sa Kagurangnan, an banal na Dios nin Israel, ni naghahagad saiya nin tabang.

²Naaaraman nin Dios an saiyang ginigibo! Nagpapadara siya nin kapahamakan. Pinapatotoohan niya an saiyang mga homa nin pagpadusa sa mga maraot na tawo asin sa mga nagsusurog sa mga ini.

³Bakong mga dios an mga taga Egipto—mga tawo sana sinda. An saindang mga kabayo bakong mga espiritu, kundi laman. Kun unaton na nin Kagurangnan an saiyang kamot, magagaba an makosog na nasyon, asin mabagsak an maluyang nasyon na tinabangan kaini. Sabay sindang marurumpag.

⁴Sinabihan ako nin Kagurangnan, “Maski gurano kakosog an kurahaw kan mga pastor, dai ninda mapapatakot an sarong leon tanganing bayaan an hayop na ginadan kaiyan; siring man, mayo nin makakapahale sako, an Kagurangnan nin mga hukbo, sa pagsurog sa Bukid nin Sion.

⁵Siring na an sarong gamgam naglalayog sa tangod kan saiyang salagan nganing ingatan an saiyang mga siwo, siring man ako, an Kagurangnan nin mga hukbo, an maingat sa Jerusalem asin masurog kaiyan.”

⁶Nagsabi an Dios, “Banwaan nin Israel, nagkasala kamo sako, asin tinumangan nindo ako. Alagad ngunyan, magbaralik kamo sako!

⁷Maabot an panahon na itatapok nindo an makasalan nindong mga dios-dios na saindong ginibo hale sa plata saka sa bulawan.

⁸Madadaog an Asiria sa gera, alagad bako huli sa kapangyarihan nin tawo. Madurulag sa gera an mga taga Asiria asin magigin mga oripon an saindang mga hoben na lalaki.

⁹Huli sa takot, madulag an saindang hade, asin babayaan kan mga opisyal an saindang mga banderang panggera huli sa makuring pagkatakot.” An Kagurangnan an nagtaram—an Kagurangnan na sinasamba sa Jerusalem asin an saiyang kalayo naglalaad duman para sa mga sakripisyo.