Read Central Bicolano Isaiah 33 Bible Online

Isaiah 33 - Central Bicolano bible

Isaiah 33

¹Herak man sa samong mga kaiwal! Nanghabon saka nagpasaluib sinda, maski mayo nin nanghabon asin nagpasaluib sainda. Alagad matatapos na an panahon kan saindang panghahabon asin pagpapasaluib; sinda mismo an magigin biktima nin panghabon asin pagpasaluib.

²Kagurangnan, kaheraki kami. Sa saimo mi ibinugtak an samong paglaom.

³Kun nakikilaban ka para samo, nadurulag an mga nasyon na samong kaiwal,

⁴asin an saindang mga pagsadiri tinitipon dangan sinasamsam.

⁵Dakula nin marahay an Kagurangnan! Naghahade siya sa gabos na bagay. Papanoon niya nin hustisya saka katanosan an Jerusalem

⁶asin papakosogon niya an nasyon. Danay niyang sinusurog an saiyang banwaan asin tinatawan niya sinda nin kadonongan saka pakasabot. An pagkatakot sa Kagurangnan iyo an pinakamahalaga nindang kayamanan.

⁷An maiisog na mga lalaki nag-aagrangay. An mga sugo na naghingowang magkaigwa nin katoninongan, naghihibi sa kapaitan.

⁸Pano nin pag-alaman an mga tinampo kaya mayo nin naglalakaw diyan. Linalapas an mga tipan asin mayo na nin ginagalangan.

⁹Mayo na nin tinanom an daga asin mayo na nin nag-eerok diyan. Naalang na an kadlagan nin Lebanon, asin nagin siring sa sarong desyerto an matubang na Kapantayan nin Sharon; nagtatakig an mga dahon kan mga kahoy sa Basan asin sa Bukid nin Carmelo.

¹⁰Tinataraman nin Kagurangnan an mga nasyon, “Mahiro na ako. Ipapahiling ko na kun gurano ako kapangyari.

¹¹Mayong halaga an ginigibo nindong mga plano asin mayo nin kamugtakan an gabos nindong ginigibo. An sakong espiritu makakaarog sa kalayong matutong saindo.

¹²Maroronot kamo siring sa mga tinutong na gapo tanganing gibohon na apog; makakaarog kamo sa mga tonok na sinulo sagkod na nagin abo.

¹³Pagdangog kamo na mga nasa harani asin nasa harayong lugar, kun ano an sakong ginibo, asin akoon nindo na mapangyari ako.”

¹⁴Nagtatakig sa katakotan an mga makasalan sa Sion. Nagsasabi sinda, “An paghukom nin Dios nakakaagid sa sarong kalayo na naglalaad sagkod pa man. Mabubuhay daw an saro sato sa siring na kalayo?”

¹⁵Mabubuhay kamo kun magsabi saka maggibo kamo kan matanos. Dai nindo paggamiton an saindong kapangyarihan sa pagdaya kan mga dukha asin dai kamo mag-ako nin mga suhol. Dai kamo makiayon sa mga nagpaplanong manggadan o sa magibo nin karatan.

¹⁶Dangan magigin ligtas kamo; magigin ligtas kamo na garo nasa laog nin sarong makosog na bantayan. Magkakaigwa kamo nin tinapay na kakakanon asin tubig na iinomon.

¹⁷Mahihiling nindo an hade sa saiyang kagayonan, asin an sarong daga na mahiwas nin marahay.

¹⁸An dati nindong natatakotan na mga dayuhan na parasingil nin buhis saka mga espiya magigin saro na sanang giromdom.

¹⁹Dai na kamo makakahiling nin mga mahambog na dayuhan na nagtataram sa sarong lengwahe na dai nindo nasasabotan.

²⁰Hilinga nindo an Sion, an syudad na pinagseselebraran kan satong mga itinalaan na pyesta. Hilinga an Jerusalem! Iyan magigin sarong ligtas na lugar na erokan! Makakaagid iyan sa sarong tolda na dai nanggad liniwat, na an mga taldok dai nanggad mabubulnot asin an mga pisi dai nanggad mapuputol.

²¹Ipapahiling sato nin Kagurangnan an saiyang kamurawayan. Mag-eerok kita sa kataed nin mga mahiwas na salog saka sapa, alagad dai makakaagi diyan an mga barko kan mga kaiwal.

²²Mayo nin kamugtakan an mga gakod sa mga barkong iyan; dai pwedeng bikladon an saindang mga layag! Satong sasamsamon an gabos na yaman kan mga kaiwal na hukbo; kadakul kaiyan, kaya maski an mga pilay na lalaki magkakaigwa kan saindang kahirasan. An Kagurangnan mismo an satong magigin hade; siya an magsasakop asin mag-iingat sa sato.

²⁴Mayo nin siisay man na nag-eerok sa satong daga na mag-aagrangay na siya naghehelang, asin papatawadon an gabos na kasalan.