Read Central Bicolano Isaiah 34 Bible Online

Isaiah 34 - Central Bicolano bible

Isaiah 34

¹Madya, mga namamanwaan sa gabos na nasyon! Magtiripon kamo asin magdangog. Magdangog an bilog na kinaban asin an gabos na nag-eerok diyan.

²Anggot an Kagurangnan sa gabos na nasyon asin sa gabos nindang hukbo. Sinentensyahan na niya sinda nin kagadanan.

³An saindang mga bangkay dai ilulubong, kundi maglalapa saka magbabata; an mga bukid mapula kan saindang dugo.

⁴An aldaw, bulan, saka bitoon maroronot siring sa alpog. Mawawara an langit siring sa sarong banig na linukot, asin mahuhulog an mga bitoon siring sa mga dahon na natatakdag hale sa balagon o sa kahoy nin higera.

⁵Inandam na nin Kagurangnan an saiyang espada sa langit, asin ngunyan nag-iibaba iyan sa Edom, sa mga tawong saiyang sinentensyahan nin kagadanan.

⁶An saiyang espada mapapano kan saindang dugo saka taba, arog kan dugo saka taba nin mga kordero asin mga kanding na idinodolot. Idodolot nin Kagurangnan an sakripisyong ini sa syudad nin Bozra; gigibohon niya ining sarong dakulang panggagadan sa daga nin Edom.

⁷Magagadan an mga tawo kaiba kan mga lalaw na baka saka mga torilyo, asin an daga mapapano nin dugo saka taba.

⁸Iyo ini an panahon na ililigtas nin Kagurangnan an Sion asin mabalos siya sa saiyang mga kaiwal.

⁹An mga salog nin Edom magigin alkitran, asin an daga magigin asupre. An bilog na daga maglalaad siring sa alkitran.

¹⁰Aldaw-banggi na magkakalayo iyan, asin hale diyan maitaas an aso sagkod pa man. An daga dai na mapapakinabangan, asin mayo nin siisay man na maagi diyan sagkod lamang.

¹¹An mga kuwaw saka mga uwak iyo na an mag-eerok sa daga. Gigibohon iyan nin Kagurangnan na magin sarong lugar na mayo nin nagtatalubo na anoman, arog kaido bago an paglalang.

¹²Mayo nin hade na mamamayo sa daga, asin mawawara an gabos na lider.

¹³Mga tonok saka mga binit an matalubo sa gabos na palasyo saka nakukudal na mga banwaan, asin mga lalaw na ayam saka mga kuwaw an mag-eerok diyan.

¹⁴An mga lalaw na hayop an maglalakaw-lakaw diyan, asin mag-aarapodan an mga demonyo. Maduman an aswang sa paghanap nin lugar na mapapahingaloan.

¹⁵An mga kuwaw duman magibo nin salagan mabonay, mahimsa, dangan maataman kan saindang mga siwo. Duman man magtitiripon an mga bwitre kaiba an saindang mga agom.

¹⁶Pagsiyasat kamo sa libro nin mga buhay na linalang kan Kagurangnan asin basahon nindo an sinasabi duman. Minsan saro sa mga linalang na ini dai mawawara, asin minsan saro sainda dai mawawaraan nin agom. Huli ta ipinagboot iyan nin Kagurangnan; siya mismo an matipon sa sainda asin matao sainda kan saindang kahirasan.

¹⁷Maerok sinda sa daga sagkod pa man, asin masasadirihan ninda iyan sagkod lamang.