Read Central Bicolano Isaiah 36 Bible Online

Isaiah 36 - Central Bicolano bible

Isaiah 36

¹Kan ikakatorseng taon kan paghahade ni Ezekias nin Juda, sinalakay ni Senakerib, na emperador nin Asiria, an pusog na mga syudad nin Juda dangan sinakop an mga ini.

²Dangan nagboot si Senakerib sa pinakahalangkaw niyang opisyal na magduman sa Jerusalem hale sa Lakis, kaiba an dakulang hukbo. Pinagbotan niya an opisyal na hagadon ki Hadeng Ezekias na sumuko. Nagtindog an opisyal sa dalan saen nagtatrabaho an mga paragibo nin tela, sa may kali na pinagbubulosan kan tubig hale sa itaas na sapa.

³Nagluwas sa pagsabat saiya si Eliakim na aking lalaki ni Hilkias, na namamahala kan palasyo, si Sebna na sekretaryo kan hade asin, si Joa na aking lalaki ni Asaf, na kansilyer.

⁴Sinabihan sinda kan opisyal, “Sabihan nindo si Hadeng Ezekias na boot maaraman kan emperador nin Asiria kun ano an nagpapakosog kan saiyang boot.

⁵Naghohona siya na an mga tataramon makakasalihid sa kakayahan asin kapangyarihan nin hukbo? Siisay an sinasarigan niya kaya nagrerebelde siya sa emperador nin Asiria?

⁶Nagsasarig kamo ngunyan sa Egipto, an baring sugkod na bariw, na matusok kan kamot kan siisay man na minasarig saiya. Arog kaiyan an hade nin Egipto sa gabos na minasarig saiya.”

⁷Nagpadagos sa pagtaram an opisyal, “Tibaad sabihon nindo na minasarig kamo sa Kagurangnan na saindong Dios. Mga lugar na pagsasambahan saka mga altar nin Kagurangnan an rinumpag ni Ezekias kan sabihan kaini an Juda asin Jerusalem na magsamba sana sa altar sa Jerusalem.

⁸Inaagyat ko siya sa ngaran kan emperador nin Asiria: tatawan ko siya nin duwang ribong kabayo kun makakakua siya nin siring kadakul na lalaki na malunad diyan.

⁹Tadaw ta malaban siya sa sarong hababang opisyal nin Asiria, mantang naglalaom siya sa Egipto na papadarahan siya nin mga karwahe saka mga parakabayo?

¹⁰Naghohona siya na nagsasalakay ako tanganing gabaon an saiyang banwaan na mayo nin tabang hale sa Kagurangnan? An Kagurangnan mismo an nagtaram sako na salakayon an Jerusalem asin rumpagon.”

¹¹Dangan nagsabi si Eliakim, si Sebna saka si Joa, “Nakikimaherak kami na magtaram ka samo sa lengwaheng Arameo. Nasasabotan mi iyan. Dai ka magtaram sa lengwaheng Hebreyo huli ta naghihinanyog an gabos na tawo na yaon sa kudal.”

¹²Nagsimbag an opisyal, “Pinadigdi daw ako kan sakong emperador tanganing magsabi kan mga tataramon na ini sa saindong hade saka sa saindo sana, asin bakong sa mga tawong iyan na nagtuturukaw sa kudal na siring saindo, makakan kan saindong odo dangan mainom kan saindang ihi?”

¹³Dangan nagtindog an opisyal asin nagkurahaw sa lengwaheng Hebreyo, “Hinanyoga nindo an tataramon kan dakulang emperador, an emperador nin Asiria!

¹⁴Pinapatanidan niya kamong dai magpadaya ki Ezekias. Dai niya kamo ikakaligtas.

¹⁵Dai nindo siya pagtugotan na mapatubod kamo na ililigtas kamo nin Kagurangnan, asin na an syudad na ini dai itatao sa kamot kan emperador nin Asiria.

¹⁶Dai kamo magdangog ki Ezekias. Nagboboot saindo an emperador nin Asiria na magluwas kamo sa syudad asin sumuko saiya. Dangan tutugotan niya kamong magkakan nin mga ubas hale sa sadiri nindong mga ubasan, asin nin mga higera hale sa sadiri nindong mga kahoy patin mag-inom nin tubig hale sa sadiri nindang bubon

¹⁷sagkod na paerokon kamo kan emperador sa sarong daga na pareho kan saindong daga, saen igwa nin mga ubasan na nagtatao nin arak asin igwa nin trigo na magigibong tinapay.

¹⁸Mag-ingat kamo ta tibaad dayaon kamo ni Ezekias sa pag-isip na ililigtas kamo nin Kagurangnan. Ikinaligtas daw kan mga dios kan arin man na nasyon an saindang daga sa kamot kan emperador nin Asiria?

¹⁹Haen na ngunyan an mga dios nin Hamat asin Arpad? Haen na an mga dios nin Sefarvaim? Ikinaligtas daw ninda an Samaria?

²⁰Kasuarin ilinigtas kan arin man sa mga dios na ini an saindang daga sa kamot kan emperador? Ano kun siring ta nag-iisip kamong pwedeng iligtas nin Kagurangnan an Jerusalem?”

²¹Alagad nag-alo sana an mga tawo siring sa ipinagboot sainda ni Hadeng Ezekias; ni sarong tataramon dai sinda nagsimbag.

²²Dangan ginisi ni Eliakim, ni Sebna, saka ni Joa an saindang gubing sa kamondoan asin nagduman sa hade. Ibinareta ninda saiya an itinaram kan opisyal nin Asiria.