Read Central Bicolano Isaiah 38 Bible Online

Isaiah 38 - Central Bicolano bible

Isaiah 38

¹Kan panahon na idto, naghelang si Hadeng Ezekias asin haros magadan siya. Dinalaw siya kan propetang si Isaias na aking lalaki ni Amoz asin sinabihan, “Tinataraman ka nin Kagurangnan na husayon mo an gabos huli ta magagadan ka. Dai ka na mararahay.”

²Nag-atubang si Ezekias sa lanob dangan namibi:

³“Giromdoma, Kagurangnan, na maimbod asin bilog na puso takang pinaglingkodan; ginibo ko an matanos sa saimong atubang.” Dangan nagtangis siya nin makuri.

⁴Dangan pinagbotan nin Kagurangnan si Isaias

⁵na magbalik ki Ezekias asin sabihan, “Ako, an Kagurangnan, an Dios kan saimong ginikanan na si David. Nadangog ko an saimong pamibi asin nahiling ko an saimong mga luha; tutugotan takang mabuhay pa sa laog nin kinseng taon.

⁶Ililigtas taka asin an syudad nin Jerusalem sa emperador nin Asiria, patin susurogon ko an syudad na ini.”

⁷Nagsimbag si Isaias, “Iyo ini an tanda nin Kagurangnan na mapatotoo saimo na ootobon niya an saiyang panuga:

⁸Sa hagdan na ginibo ni Hadeng Ahaz pabababaon nin Kagurangnan nin sampolong tangga an anino.” Asin nagibaba nin sampolong tangga an anino.

⁹Kan narahay si Hadeng Ezekias sa saiyang helang, sinurat niya an awit nin pag-omaw na ini:

¹⁰Naghona ako na sa kaodtohan nin buhay maduman na ako sa kinaban kan mga gadan, tanganing duman na mag-erok sagkod pa man.

¹¹Naghona ako na sa daga na ini kan mga nabubuhay dai ko na nanggad mahihiling Kagurangnan o an siisay man na nabubuhay.

¹²Pinutol asin tinapos an sakong buhay siring sa tolda na tinipig, siring sa tela na pinutol hale sa habolan. Naghona ako na tataposon na nin Dios an sakong buhay.

¹³Bilog na banggi akong nag-agrangay huli sa kulog, na garong pinagbabari nin sarong leon an sakong mga tolang. Naghona ako na tataposon na nin Dios an sakong buhay.

¹⁴Sadit asin maluya an sakong tingog, asin nag-aguro ako arog sa sarong salampati. Napagal an sakong mga mata sa kahihiling sa langit. Kagurangnan, ligtasan ako sa gabos na kasakitan na ini.

¹⁵Alagad ano an sakong masasabi? An Kagurangnan an naggibo kaini. Dai ako nangangatorog huli sa kapaitan nin sakong puso.

¹⁶Kagurangnan, mabubuhay ako para sa saimo sana. Paomayan mo ako, asin tugoteng mabuhay.

¹⁷An sakong kapaitan magigin katoninongan. Ililigtas mo an sakong buhay sa gabos na kapahamakan; pinapatawad mo an gabos kong kasalan.

¹⁸Mayong makakaomaw saimo sa kinaban kan mga gadan; dai makakasarig sa saimong kaimbodan an sarong gadan.

¹⁹An nabubuhay iyo an nag-oomaw saimo, siring na inoomaw taka ngunyan. An mga ama an nag-oosip sa saindang kaakian kun gurano ka kaimbod.

²⁰Kagurangnan, ako saimong pinaomayan. Matugtog kami nin mga arpa saka maawit kan saimong kaomawan, maawit nin pag-omaw sa saimong Templo sa bilog nyamong pagkabuhay.