Read Central Bicolano Isaiah 44 Bible Online

Isaiah 44 - Central Bicolano bible

Isaiah 44

¹Nasasabi an Kagurangnan, “Maghinanyog ka ngunyan, Israel, sakong sorogoon, sakong piniling banwaan, kapagarakian ni Jacob.

²Ako an Kagurangnan na naglalang saimo; magpoon kan ika mamundag, tinabangan taka. Dai ka matakot; ika an sakong sorogoon, an sakong piniling banwaan na sakong namomotan.

³“Tatawan ko nin tubig an napapahang daga asin papabuloson ko an mga salog sa mamarang daga. Iwawaras ko an sakong espiritu sa saimong kaakian asin an sakong biyaya sa saimong kapagarakian.

⁴Matalubo sinda siring sa mga doot na dai nagkukulang sa tubig, siring sa mga kahoy sa tampi kan nagbubulos na tubig.

⁵“Saro-sarong masabi an mga tawo, ‘Sadiri ako kan Kagurangnan.’ Madatong sinda nganing mag-apil sa banwaan nin Israel. Mamarkahan kan lambang saro an saiyang takyag kan ngaran nin Kagurangnan dangan aapodon niya an saiyang sadiri na kaayon sa banwaan nin Dios.”

⁶An Kagurangnan, na naghahade asin nagsusurog sa Israel, an Kagurangnan nin mga hukbo, nasasabi kaini: “Ako an enot, an huri, an iyo sanang Dios; pwera sako mayo na nin ibang Dios.

⁷Igwa daw nin makakagibo kan sakong ginibo? Siisay an pwedeng maghula kan gabos na mangyayari magpoon sa kaenot-enote sagkod sa kataposan kan panahon?

⁸Dai kamo matakot, sakong banwaan! Aram nindo na poon pa kaidto sagkod ngunyan hinulaan ko na an gabos na mangyayari, asin kamo an sakong mga saksi. Igwa pa daw nin ibang Dios? Igwa daw nin mapangyaring dios na dai ko pa nadangog?”

⁹Mayo nin halaga an gabos na naggigibo nin ladawan, asin mayong pakinabang an mga dios-dios na saindang pinapahalagahan. An mga nagsasamba sa mga dios-dios na ini mga buta saka mayong naaaraman—asin mapapasopog sinda.

¹⁰Bakong marahay an paggibo nin metal na ladawan nganing sambahon bilang dios!

¹¹An lambang saro na nagsasamba kaiyan mapapasopog. An mga naggigibo nin mga ladawan mga tawo sana. Pabayae sindang magtipon saka mag-atubang sako—magkakatarakot sinda asin gabos sinda mapapasopog.

¹²An panday sa metal minakua nin sarong pedasong metal dangan binabaga iyan sa kalayo. Dangan pinupulpog niya iyan nin martilyo asin nagkakaigwa iyan nin porma huli kan makokosog niyang braso. Mantang nagtatrabaho, nagugutom siya, napapaha asin napapagal.

¹³Sinusukol kan karpintero an kahoy. Kinukuritan niya iyan nin korteng tawo dangan sinasapsapan kan saiyang mga kagamitan sagkod na makagibo siya nin magayon na rebulto nin tawo na ibubugtak niya sa saiyang harong.

¹⁴Pwedeng sedro an saiyang gamiton, o pilion niya an hamurawon o an sipres hale sa kadlagan. Pwede man na magtanom ngona siya nin kahoy na laurel dangan maghalat kan uran nganing magtalubo iyan.

¹⁵An tawo minagamit kan sarong kabtang nin kahoy tanganing igatong asin an sarong kabtang kaiyan tanganing gibohon na rebulto. An sarong kabtang kan kahoy minamakotan niya tanganing mahimbongan siya asin tanganing makagibo nin tinapay; an sarong kabtang ginigibo niyang dios-dios dangan sinasamba iyan.

¹⁶An nagkapirang pedaso kan kahoy iginagatong niya sa kalayo dangan minadarang siya nin karne, kinakakan iyan, asin nababasog siya. Minapahimbong siya sa kalayo asin minasabi, “Marahay na magpahimbong! Mainit an kalayo!”

¹⁷An natada na kahoy ginigibo niyang sarong ladawan, dangan minaluhod dangan minasamba kaiyan. Pinapamibian niya iyan asin minasabi, “Ika an sakong dios—ligtasan ako!”

¹⁸Mga lolong an siring na mga tawo; dai ninda aram an saindang ginigibo. Pinirong ninda an saindang mga mata saka sineserahan an saindang isip sa katotoohan.

¹⁹An paragibo nin ladawan mayo nin pakasabot o kadonongan nganing magsabi, “An kabanga kan kahoy sakong iginatong sa kalayo. Nagluto ako nin tinapay asin nagdarang ako nin karne dangan kinakan ko iyan. An kabanga kan kahoy ginibo kong ladawan. Uya akong nagluluhod sa sarong kaputol na kahoy.”

²⁰Garo man sana siya nagkakan nin abo. Linagalag siya kan saiyang lolong na isip; dai na siya matatabangan. Dai niya aakoon na an ladawan na saiyang kapot bako man talaga dios.

²¹Nagsasabi an Kagurangnan, “Israel, giromdoma ini; giromdoma na sorogoon taka. Linalang taka nganing magin sorogoon ko, asin dai ko nanggad ika lilingawan.

²²An saimong mga kasalan pinara ko siring sa panganoron. Magbalik ka sako; ako an nagligtas saimo.”

²³Pagkurahaw sa kaogmahan, o kalangitan! Pagkurahaw, o hararom na mga lugar kan daga! Pagkurahaw sa kaogmahan, o kabukidan, asin lambang kahoy kan kadlagan! Ipinahiling nin Kagurangnan an saiyang kadakulaan sa pagligtas kan saiyang banwaan na Israel.

²⁴“Ako an Kagurangnan, an saimong paraligtas; ako an naglalang saimo. Ako an Kagurangnan, an Kaglalang kan gabos na bagay. Ako sanang saro an nag-unat kan kalangitan; kan gibohon ko an kinaban mayo sakong nagtabang.

²⁵Ginigibo kong mga lolong an mga parahula asin dai ko pinapangyari an hula kan mga nag-aadal kan mga bitoon. Sinasalungat ko an mga tataramon kan mga madonong asin ipinahiling kong kalolongan an saindang kadonongan.

²⁶Alagad kun minahula an sakong sorogoon, kun minasubol ako nin sugo nganing ipahayag an sakong plano an mga plano saka mga hula na iyan ginigibo kong magkatotoo. Sinasabihan ko an Jerusalem na mag-eerok giraray duman an mga tawo, asin an mga syudad nin Juda, na hihirahayon sinda. An mga syudad na iyan hihirahayon giraray.

²⁷Huli sa sarong pagboot pinaalang ko an dagat.

²⁸Sinasabihan ko si Ciro, ‘Ika an maghahade para sa sako; gigibohon mo an boot kong ipagibo saimo: ipagboboot mong pakarhayon an Jerusalem asin ibugtak an pundasyon kan Templo.