Read Central Bicolano Isaiah 5 Bible Online

Isaiah 5 - Central Bicolano bible

Isaiah 5

¹Pagdangog mantang inaawit ko an awit na ini, sarong awit manongod sa sakong katood asin sa saiyang ubasan: Igwang ubasan an sakong katood sa sarong matubang na bulod.

²Kinalot niya an daga asin hinale an mga gapo, dangan tinanoman nin mga piling balagon. Nagpatindog siya nin sarong bantayan sa tahaw kaiyan, asin naggibo nin kalot na pagpupugaan kan mga ubas. Naghalat siyang maghinog an mga ubas alagad kan ini mahinog, maalsom an lambang saro.

³Kaya ngunyan minataram an sakong katood, “Kamong mga nag-eerok sa Jerusalem saka sa Juda, hukoman nindo ako asin an sakong ubasan.

⁴Ano pa an dapat kong gibohon para sa sakong ubasan, na dai ko ginibo? Kan maghanap ako nin mahamis na ubas, tano ta maalsom an ubas na ibinunga kaiyan?

⁵“Ini an gigibohon ko sa sakong ubasan: Hahaleon ko an kudal sa palibot kaiyan, asin papabayaan kong kakanon iyan saka timaktimakan kan mga lalaw na hayop.

⁶Papabayaan kong magtalubo an mga doot; dai ko iyan tatakrasan ni babayoboon, kundi papataluboon ko an mga tonok. Pagbobotan ko an mga dampog na dai maghulog nin uran duman.”

⁷An ubasan kan Kagurangnan nin mga hukbo iyo an banwaan nin Israel asin an kalalakihan nin Juda iyo an saiyang mga piling tinanom. Naghanap siya nin hustisya, alagad nahiling niya an panggagadan. Naghanap siya nin katanosan, alagad inagrangay para sa hustisya an saiyang nadangog!

⁸Herak man sa mga tawong nagsusugpon nin harong sa dati na nindang harong, mga tawong nagdadagdag nin oma sa saindang oma sagkod na dai na nin ibang nag-eerok sa daga kundi sinda na sana.

⁹Nadangog kong nagsumpa an Kagurangnan: “Sa katotoohan dakul na harong an magkakagaraba, darakula saka magagayon na mga harong na mayong nag-eerok.

¹⁰An sampolong ektaryang ubasan makukuahan sana nin walong letro nin arak, asin an syento otsentang litrong banhi mabunga sana nin dyes y otsong litrong mais.”

¹¹Herak man sa mga amay minabangon sa pagkaaga tanganing hanapon an irinoman, sagkod sa kamatangaan nin banggi, sagkod na sinda magkabururat!

¹²Igwa sindang lira saka arpa, tamborin, plawta, asin arak sa saindang mga pyesta; alagad dai ninda nasasabotan an mga ginigibo nin Kagurangnan.

¹³Kaya dadarahon kamo sa harayo bilang mga bilanggo. Magagadan an saindong mga lider huli sa gutom, asin an ordinaryong mga tawo sa paha.

¹⁴An kinaban kan mga gadan nagugutom para sainda asin an buka kan saiyang ngimot dai na masusukol; hahalonon niya an ginagalangan sa Jerusalem saka an saindang kairiba, sagkod an mga maribok na grupo nin ordinaryong mga tawo.

¹⁵An gabos na tawo sosopogon, asin ibababa an mga mapaabaw-abaw.

¹⁶Alagad ipinapahiling kan Kagurangnan nin mga hukbo an saiyang kadakulaan huli sa paggibo nin tama, asin ipinapahayag niya an saiyang kabanalan huli sa paghukom kan saiyang banwaan.

¹⁷Sa kataed kan nagkagarabang mga syudad, mananabsab an mga kordero asin an mga sadit na kanding.

¹⁸Herak man sa naggigibo nin karatan huli sa saindang kaputikan. Herak man sa mga naggigibo nin kasalan asin dai nakakatalingkas diyan,

¹⁹na nagsasabing: “Pahidalia an Kagurangnan, asin otobon niya an sinabi niyang gigibohon niya, tanganing satong mahiling. Gibohon na logod kan banal na Dios nin Israel an saiyang mga plano; hilingon ta kun ano an nasa isip niya.”

²⁰Herak man sa nagsasabing marahay an maraot asin maraot an marahay, sa mga tawong an kadikloman ginigibong liwanag, asin an liwanag ginigibong kadikloman, sa mga tawong an kapaitan ginigibong kahamisan asin an kahamisan ginigibong kapaitan!

²¹Herak man sa mga naghohona na sinda madonong asin mga tuso nin marahay!

²²Herak man sa mga bayani sa pag-inom nin arak, asin sa mga mayong takot sa paghalo nin maiisog na inomon!

²³Alagad pinapatalingkas ninda an mga may kasalan huli sa suhol, asin inoolang ninda an mga mayong sala sa pagkamit nin katanosan!

²⁴Kaya siring na hinahalon kan dila nin kalayo an dagami, siring na minakulpa an alang na doot sa kalayo, malalapa an saindang mga gamot, maaalang saka mararakdag an saindang mga burak huli ta isinikwal ninda an katogonan kan Kagurangnan nin mga hukbo, asin saindang pinag-olog-olog an tataramon kan banal na Dios nin Israel.

²⁵Anggot an Kagurangnan sa saiyang banwaan, asin inunat niya an saiyang kamot sa pagpadusa sainda. Matatanyog an kabukidan asin an mga bangkay kan nagkagaradan magkakawaralat sa mga tinampo siring sa ati. Alagad dai man giraray maoontok an kaanggotan nin Kagurangnan, kundi padagos na magigin unat an saiyang kamot sa pagpadusa.

²⁶Aapodon nin Kagurangnan an sarong harayong nasyon. Sisiwitan niya iyan sa mga poro kan kinaban, asin madatong tolos iyan!

²⁷Mayo nin napapagal sa sainda; mayo nin natutumba. Mayo nin nagtutungka o nagkakatorog. Mayong habay na haluga; mayong gakod nin sandalyas na putol.

²⁸Matarom an saindang mga bosog, asin andam na an saindang mga pana. Garo matagas na gapo an mga kuku kan saindang mga kabayo, asin an mga rweda kan saindang mga karwahe magigin garo aripuros.

²⁹An saindang mga soldados minaungal na garo mga leon na nakagadan nin sarong hayop dangan dinadara ini sa lugar na mayo nin makakaagaw kaiyan sainda.

³⁰Pag-abot kan aldaw na iyan, an ungal ninda sa Israel magigin makosog siring sa hagubohob kan dagat. Hilinga nindo an dagang ini! Pano nin kadikloman asin kahorasaan! An liwanag hinaloan kan kadikloman.