Read Central Bicolano Isaiah 50 Bible Online

Isaiah 50 - Central Bicolano bible

Isaiah 50

¹Nagsasabi an Kagurangnan, “Sa paghona nindo sinuhayan ko an sakong banwaan siring sa pagsuhay nin sarong lalaki sa saiyang agom? Haen, kun siring, an mga kasuratan nin pagsuhay? Sa paghona nindo ipinabakal ko kamo sa kaoripnan arog sa pagpabakal nin sarong lalaki sa saiyang mga aki bilang mga oripon? Dai, nabihag kamo huli kan saindong mga kasalan; isinubol kamo sa harayo huli kan saindong mga kasombikalan.

²“Tadaw ta dai nakakasimbag an sakong banwaan kan dumanon ko sinda tanganing iligtas? Tadaw ta dai sinda nagsimbag kan ako nag-apod? Maluya daw ako kaya dai ko sinda kayang iligtas? Sa sarong pagboot mapapaalang ko an dagat. Magigibo kong desyerto an mga salog, tanganing an mga sira na yaon duman magadan sa paha.

³Mapapadiklom ko an kalangitan, na garong nagmomondo iyan para sa gadan.”

⁴Tinukdoan ako nin Kagurangnan Dios kan sakong sasabihon, tanganing mapakosog ko an napapagal. Aga-aga, pinupukaw niya ako tanganing magdangog kan itutukdo niya.

⁵An Kagurangnan Dios an nagtao sako nin pakasabot, asin dai ako nagrerebelde o nagtalikod sa saiya.

⁶Hinubaan ko an sakong likod para sa mga parahampak. Dai ko sinda pinugol kan ako saindang pag-olog-ologon, kan an sakong barabas saindang rabnotan, asin kan pagkuspaan ninda an sakong lalawogon.

⁷Alagad dai ako makukulogan kan saindang mga pag-olog-olog huli ta tinatabangan ako kan Kagurangnan Dios. Inaandam ko na an sakong sadiri sa pagtios kan mga iyan. Aram kong dai ako mapapasopog,

⁸huli ta harani an Dios, asin patotoohan niyang mayo akong kasalan. Igwa daw nin mangangahas na magsumbong tumang sakuya? Duman kami maghilingan sa korte! Darahon niya an saiyang sumbong!

⁹An Kagurangnan Dios mismo an nagsusurog sako— siisay an makakapatotoo na may sala ako? Magkakawarara an gabos na nagsusumbong sako; mawawara sinda siring sa telang kinakan kan anay.

¹⁰Kamo gabos na may pagkatakot sa Kagurangnan asin nagkukuyog sa tataramon kan saiyang sorogoon, madiklom man an dalan na saindong linalakawan, alagad magsarig kamo sa Kagurangnan, maglaom kamo sa Dios.

¹¹Kamo gabos na nagpaplano nin karatan para sa iba mapapahamak kan saindo man sanang plano. An Kagurangnan mismo an magibo kaiyan; magtitios kamo nin makuring kasakitan.