Read Central Bicolano Isaiah 55 Bible Online

Isaiah 55 - Central Bicolano bible

Isaiah 55

¹Nagsasabi an Kagurangnan, “Madya, kamo gabos na napapaha— uya an tubig! Madya, kamo na mayo nin kwarta— bakal asin kakan! Madya, bakal kamo nin arak saka gatas alagad mayo ini nin bayad!

²Tadaw ta inuubos nindo an saindong kwarta para sa dai nakakabasog? Tadaw ta inuubos nindo an saindong tandan asin padagos pa kamong nagugutom? Dangoga nindo ako asin giboha an sasabihon ko, dangan mananamitan nindo an pinakamarahay sa gabos na kakanon.

³“Paghinanyog kamo, sakong banwaan, asin dumolok kamo sako; madya kamo sako, asin magkakaigwa nin kapanoan an saindong buhay! Magibo ako saindo nin tipan na daing kataposan asin itatao ko saindo an mga bendisyon na ipinanuga ko ki David.

⁴Ginibo ko siyang lider asin pamayo nin mga nasyon, dangan sa paagi niya ipinahiling ko sainda an sakong kapangyarihan.

⁵Ngunyan aapodon nindo an dayuhan na mga nasyon; dai ninda kamo midbid kaidtong panahon alagad ngunyan magdadalagan na mapasiring sinda saindo nganing makiapil! Ako, an Kagurangnan na saindong Dios, an banal na Dios nin Israel, iyo an magibo nin paagi tanganing mangyari ini; itatao ko saindo an kaomawan asin kamurawayan.”

⁶Hanapa nindo an Kagurangnan mantang makukua siya, pag-apod kamo saiya mantang harani siya.

⁷Pabayaan na kan tampalasan an maraot nindang pamumuhay asin an biko nindang mga kaisipan. Magbalik na sinda sa Kagurangnan, an satong Dios; maheherakon siya asin madaling magpatawad.

⁸Nagsasabi an Kagurangnan, “An sakong kaisipan bakong arog kan saindong kaisipan, asin an sakong mga paagi iba man kan sa saindo.

⁹Kun paanong an kalangitan mas halangkaw ki sa daga, siring man an sakong mga paagi sa saindong mga paagi asin an sakong mga kaisipan sa saindong mga kaisipan.

¹⁰“An sakong tataramon siring sa nyebe saka sa uran, na naghuhugpa hale sa langit, nganing biribihon an daga. Pinapatalubo ninda an mga tinanom, na minatao nin banhi na isasabwag asin minatao nin pagkakan.

¹¹Siring man an tataramon na sakong sinasabi— dai iyan mabalik sako na mayo nin bunga; gigibohon kaiyan an gabos na sakong ipinapagibo.

¹²“May kaogmahan kamong mahale sa Babilon; matoninong kamong papangenotan paluwas sa syudad. Mag-aarawit an kabukidan saka an kabubuldan, asin magkukurahaw an mga kahoy sa kaogmahan.

¹³Embes kan mga tonok matalubo an mga kahoy na sipres; embes kan mga binit matalubo an mga marambong na kahoy. Ini an magigin sarong tanda na magdadanay sagkod lamang, sarong giromdom kan ginibo ko, an Kagurangnan.”