Read Central Bicolano Isaiah 6 Bible Online

Isaiah 6 - Central Bicolano bible

Isaiah 6

¹Kan taon na magadan si Hadeng Uzzias, nahiling ko an Kagurangnan. Nagtutukaw siya sa saiyang trono, halangkaw saka mamuraway, asin an bilog na Templo napapano kan saiyang gubing.

²Sa palibot niya nagtitindog an mga serafim; an lambang saro sainda igwa nin anom na pakpak: an duwa pantahob kan saindang lalawogon, an duwa pantahob kan saindang mga bitis, asin an duwa ginagamit ninda sa paglayog.

³Nag-iinapodan sinda nin makusog: “Banal, banal, banal an Kagurangnan nin mga hukbo; an bilog na daga pano kan saiyang kamurawayan.”

⁴Natanyog an pundasyon kan Templo huli sa kosog kan saindang tingog asin napano nin aso an Templo.

⁵Nagsabi ako, “Herak man sako! Magagadan ako huli ta an lambang tataramon na nag-aagi sa sakong mga ngabil makasalan, asin nag-eerok ako sa tahaw nin mga banwaan na an lambang tataramon makasalan; huli ta nahiling ko an Hade, an Kagurangnan nin mga hukbo!”

⁶Dangan naglayog pasiring sakuya an sarong serafim. Igwa siyang darang naglalaad na baga na saiyang kinua sa altar sa paagi nin pansipit.

⁷Dinutaan niya kan baga an sakong mga ngabil dangan nagsabi, “Nadutaan na kaini an saimong mga ngabil; mayo na an saimong karatan, asin pinatawad na an saimong mga kasalan.”

⁸Dangan nadangog kong naghapot an Kagurangnan, “Siisay an sakong susugoon? Siisay an satong magigin sugo?” Nagsimbag ako, “Uya ako! Ako an sugoa.”

⁹Nagsabi siya, “Lakaw, asin sabihan mo kaining mensahe an mga tawo: ‘Magdangog kamong maigot asin dai kamo makakasabot; maghiling kamong marahay, asin dai kamo makakamidbid.’

¹⁰Pahiboga an puso kan banwaan na ini, pagabata an talinga ninda, asin taklobi an mga mata ninda, ta tibaad makahiling sinda asin makadangog patin makasabot dangan magbalik sako saka magpabolong.”

¹¹Naghapot ako, “Sagkod nuarin ini magigin siring, Kagurangnan?” Nagsimbag siya, “Sagkod na magkararaot an mga syudad asin mayo nang mag-erok diyan, sagkod na an mga harong diyan mayo na nin nag-eerok—sagkod na an daga dai na mapakinabangan.

¹²Isusubol ko an mga tawo sa hararayong lugar asin mayo na nin mag-eerok sa bilog na daga.

¹³Maski mawalat an saro sa sampolo katawo, magagadan man siya; makakaarog siya sa pungo kan pinulak na hamurawon.” (An pungo iyo an tanda kan bagong kapinonan para sa banwaan nin Dios.)