Read Central Bicolano Isaiah 62 Bible Online

Isaiah 62 - Central Bicolano bible

Isaiah 62

¹Magtataram ako tanganing pakosogon an boot kan Jerusalem; dai ako magkakaalo sagkod na ligtas na siya, asin nagliliwanag an saiyang kapangganahan siring sa sarong karaba sa pagkabanggi.

²Jerusalem, mahihiling kan mga nasyon an saimong kapangganahan! Mahihiling kan saindang mga hade an saimong kamurawayan. Aapodon ka ninda sa bagong ngaran, sarong ngaran na itinao saimo nin Kagurangnan.

³Makakaagid ka sa sarong magayon na korona para sa Kagurangnan.

⁴Dai ka na nanggad aapodon “Pinabayaan,” o aapodon an saimong daga na “Babaeng Sinuhayan.” “An Dios Nawiwili Saiya,” an saimong magigin bagong ngaran. An saimong daga aapodon “Maogmang Pag-inagoman,” huli ta nawilihan ka nin Kagurangnan asin makakaagid siya sa agom na lalaki kan saimong daga.

⁵Siring sa sarong hoben na lalaking minaagom nin sarong birhen, aagomon ka kan naglalang saimo. Siring na naoogma an lalaki sa saiyang agom, maoogma man an Dios sa saimo.

⁶Sa ibabaw nin saimong mga kudal, O Jerusalem, nagbugtak ako nin mga bantay; kaipuhan na dai nanggad sinda mag-alo banggi man o aldaw. Kaipuhan ipagiromdom ninda sa Kagurangnan an saiyang ginibong mga panuga asin dai sinda magtugot na malingawan niya an mga iyan.

⁷Kaipuhan na dai ninda siya pagtawan nin kapahingaloan sagkod na makabalik sa dati an Jerusalem— sarong syudad na inoomaw kan bilog na kinaban.

⁸An Kagurangnan naggibo nin banal na panuga, asin gigibohon niya iyan huli kan saiyang kapangyarihan: “An saimong inani dai na nanggad magigin pagkakan kan saimong mga kaiwal, asin an saimong arak dai na nanggad iinomon kan mga dayuhan.

⁹Alagad kamong nagtanom saka nag-ani iyo an magkakakan kan tinapay asin mag-oomaw sa Kagurangnan. Kamong nag-ataman dangan nagtipon kan mga ubas iyo an mag-iinom kan arak sa mga patyo kan sakong Templo.”

¹⁰Mga namamanwaan nin Jerusalem, lumuwas kamo sa syudad asin gumibo nin tinampo para sa saindong nagbabalik na kahimanwa! Andama nindo an sarong tinampo; haralea nindo an mga gapo! Magbugtak kamo nin sarong tanda nganing an mga nasyon makaaram

¹¹na an Kagurangnan nagpapahayag sa bilog na kinaban: “Sabihi nindo an banwaan nin Jerusalem na an Kagurangnan madatong tanganing iligtas siya, kaibahan niya an ilinigtas niyang mga tawo.”

¹²Aapodon kang “An Banal na Banwaan nin Dios,” “An Banwaan na Ilinigtas nin Kagurangnan.” An Jerusalem aapodon “An Syudad na Namomotan nin Dios,” “An Syudad na Dai Pinabayaan nin Dios.”