Read Central Bicolano Isaiah 7 Bible Online

Isaiah 7 - Central Bicolano bible

Isaiah 7

¹Kan si Hadeng Ahaz, na aking lalaki ni Jotam asin makoapo ni Uzzias, iyo an naghahade sa Juda, nagtukad pasiring sa Jerusalem si Rezin na hade nin Siria, asin si Peka na aking lalaki ni Remalias na hade nin Israel, tanganing salakayon an syudad alagad dai ninda nakayang salakayon ini.

²Kan maaraman kan hade nin Juda na nasa teritoryo na nin Israel an hukbo nin Siria, natakot siya nin makuri, siring man an saiyang mga nasasakopan. Nagtarakig sinda siring sa mga kahoy na hinuhuyop nin doros.

³Tinaraman nin Kagurangnan si Isaias, “Ipag-iba mo an aki mong lalaking si Sear-jasub, asin sabaton nindo si Hadeng Ahaz. Manunumpongan nindo siya sa dalan na pinagtatrabahoan kan mga paragibo nin tela, sa poro kan kali na binubulosan kan tubig hale sa itaas na tangke.

⁴Sabihan mo siyang magin andam, na dai mahandal o matakot o manluya an boot, huli ta an kaanggotan ni Hadeng Rezin kaiba an mga Siro asin ni Hadeng Peka garo sana duwang nag-aasong pungo.

⁵An Siria, kaiba an Israel saka an hade kaini, nagplano nin karatan laban saimo.

⁶Boot nindang salakayon an Juda, takoton an mga tawo tanganing mag-apil sainda, dangan ibugtak an aking lalaki ni Tabeel bilang hade.

⁷“Alagad ako, an Kagurangnan Dios, nagpapahayag na dai nanggad ini mangyayari!

⁸Huli ta an pangenot na syudad nin Siria iyo an Damasco; an pamayo nin Damasco iyo si Rezin. (Manongod sa Israel, sa laog nin sesenta y singkong taon, magagaba iyan asin dai magdadanay bilang sarong nasyon.)

⁹An pangenot na syudad nin Israel iyo an Samaria, asin an pamayo nin Samaria si Peka na aki ni Remalias. “Kun dai kamo magtubod, dai kamo mapapapusog.”

¹⁰Nagpadara pa nin mensahe an Kagurangnan ki Ahaz:

¹¹“Maghagad ka nin tanda sa Kagurangnan na saimong Dios. Pwedeng an tanda hale sa irarom kan kinaban kan mga gadan o hale sa kaitaasan nin langit.”

¹²Nagsimbag si Ahaz, “Dai ako mahagad nin tanda. Habo kong baloon an Kagurangnan.”

¹³Nagsabi si Isaias, “Pagdangog kun siring, kapagarakian ni Hadeng David. Dikit pa daw sa saindo an pagbalo kan pagkamatinios nin mga tawo, ta binabalo pa nindo an pagkamatinios nin sakong Dios?

¹⁴Kaya an Kagurangnan mismo an matao saindo nin tanda: may sarong daraga na mangingidam asin mangangaki nin lalaki asin aapodon niyang Immanuel.

¹⁵Pag-abot kan panahon na tatao na siyang magsabot kun ano an maraot asin marahay, mainom an mga tawo nin gatas asin makakan nin dugos.

¹⁶Alagad bago dumatong an panahon na iyan, mayo nang mag-eerok sa daga kan duwang hade na kinatatakotan mo.

¹⁷“An Kagurangnan mapadara saimo, sa saimong banwaan, asin sa harong nin saimong ama, nin mga aldaw nin kasakitan na mas makuri ki sa nangyari poon kan magsuhay an kahadean nin Israel sa Juda—dadarahon niya an hade nin Asiria.

¹⁸“Pag-abot kan panahon na iyan, masiwit an Kagurangnan bilang sarong tanda para sa mga Egipcio tanganing magdirigdi sinda siring sa mga langaw hale sa pinakaharayong mga sanga kan Salog nin Nilo, asin para sa mga Asiro tanganing magdirigdi sinda hale sa saindang daga siring sa mga putakti.

¹⁹Maabot sinda gabos asin maontok sa mga ampas, sa mga lungib sa kagapoan, sa gabos na binit, patin sa gabos na pasabsaban.

²⁰“Pag-abot kan panahon na iyan, matandan an Kagurangnan nin sarong barberong hale sa ibong kan Salog nin Eufrates—an hade nin Asiria—asin aarison niya an saindong barabas sagkod an buhok sa saindong payo saka hawak.

²¹“Pag-abot kan panahon na iyan, maski sarong baka sana saka duwang kanding an inaataman nin sarong paraoma,

²²dakul na gatas an saindang itatao saiya, kaya magkakaigwa siya kan gabos niyang kaipuhan; huli ta an lambang saro na nawalat sa daga magkakaigwa nin gatas saka dugos na kakakanon.

²³“Pag-abot kan panahon na iyan, an lambang ubasan, na kaidto nakukuahan nin sangribong balagon nin ubas asin nagkakahalaga nin sangribong pedaso nin plata, matatambonan nin mga binit saka tonok.

²⁴An mga tawo maduman na may darang pana tanganing mang-ayam, huli ta an bilog na daga mapapano nin mga binit saka tonok.

²⁵An gabos na bulod na dating natatanoman, mapapano nin katonokan, kaya mayo nin tawong makakaduman. Iyan magigin sarong lugar na pagsasabsaban kan mga baka saka karnero.”