Read Central Bicolano Isaiah 9 Bible Online

Isaiah 9 - Central Bicolano bible

Isaiah 9

¹Mayo nin paagi para sainda tanganing makadulag sa panahon na ini nin kasakitan. An daga kan mga tribu ni Zabulon asin ni Neftali, na kaidto daga nin kasosopgan, iyo an magdadara nin kaomawan sa rehiyon na ini, magpoon sa Dagat nin Mediteraneo pasiring sa sirangan, sa daga sa ibong kan Salog nin Jordan, asin maski sa Galilea mismo, na pinag-eerokan kan mga dayuhan.

²Nakahiling nin dakulang liwanag an mga tawong naglakaw sa kadikloman. An mga nag-erok sa daga nin mahibog na kadikloman, naliliwanagan na ngunyan.

³Tinawan mo sinda nin dakulang kaogmahan,Kagurangnan; pinaogma mo sinda. Naoogma sinda sa saimong ginibo, siring na naoogma an mga tawo kun sinda nag-aani o kun sinda naghihiras kan mga sinamsam.

⁴Huli ta saimong binari an sakal na nakakapagabat sainda asin an sugkod na ipinapakol sa saindang mga abaga. Dinaog mo an nasyon na nag-api asin nandaya kan saimong banwaan, siring na dinaog mo kaidto an hukbo nin Midian.

⁵An mga sapatos kan minasalakay na hukbo asin an gabos nindang nadugoan na gubing susuloon siring sa igatong.

⁶Huli ta sarong aki an namundag sato! Sarong aking lalaki an itinao sato! Siya an satong magigin pamayo. Aapodon siyang, “Makangangalas na Parahatol,” “Makakamhan na Dios,” “Amang daing kataposan,” “Prinsipe nin Katoninongan.”

⁷Padagos na mag-uuswag an saiyang paghahade asin danay na may katoninongan an saiyang kahadean. Maghahade siya bilang kasalihid ni Hadeng David. Ipapatugmad niya an saiyang kapangyarihan sa hustisya saka sa katanosan, magpoon ngunyan asin sagkod pa man. An Kagurangnan nin mga hukbo iyo an maigot na magibo kan gabos na ini.

⁸Hinukoman na nin Kagurangnan an kahadean nin Israel, an mga kapagarakian ni Jacob.

⁹An gabos na tawo sa Israel, an gabos na nag-eerok sa syudad nin Samaria, makakaaram na siya an naggibo kaini. Ngunyan mapaabaw-abaw asin mapalangkaw na nagsasabi sinda,

¹⁰“Nagkagaraba na an mga edipisyong gibo sa ladrilyo, alagad riribayan mi iyan nin gapo. Nagkabarari na an mga kahabaan na sikomoro, alagad riribayan mi iyan nin mga sedro.”

¹¹Kaya an Kagurangnan nagbugtak nin mga kaiwal tanganing salakayon sinda.

¹²An Siria sa sirangan asin an Filistia sa solnopan nagbuka kan saindang mga ngoso tanganing halonon an Israel. Alagad dai pa natatapos an kaanggotan nin Kagurangnan; unat pa giraray an saiyang kamot sagkod ngunyan tanganing magpadusa.

¹³Dai nagbakle an banwaan nin Israel; maski pinadusahan na sinda kan Kagurangnan nin mga hukbo, dai sinda nagbalik saiya.

¹⁴Kaya papadusahan nin Kagurangnan an mga lider saka an banwaan nin Israel sa saro sanang aldaw; pupuhoon niya sinda, payo sagkod ikog.

¹⁵An mga gurang asin mga ginagalangan na lalaki iyo an payo—asin an mga propeta na nagtutukdo nin kaputikan iyo an ikog!

¹⁶Linagalag an mga tawo kan mga lider asin nagkariribong sinda.

¹⁷Kaya dai matugot an Kagurangnan na makadulag an mga hoben na lalaki, asin dai siya maheherak sa mga balong babae saka sa mga ilo, huli ta bakong diosnon an mga tawo; mga maraot sinda asin gabos karatan an saindang sinasabi. Alagad dai pa matatapos an kaanggotan nin Kagurangnan; unat pa giraray an saiyang kamot sagkod ngunyan tanganing magpadusa.

¹⁸An karatan kan mga tawo naglalaad siring sa kalayo na nakakatutong sa mga binit saka mga tonok. Naglalaad iyan siring sa sarong kalayo sa kadlagan na nagpapaturon nin mahibog na aso.

¹⁹Huli ta anggot an Kagurangnan nin mga hukbo, an padusa niya maglalaad siring sa kalayo na matutong kan daga asin magadan sa mga tawo; kaya an lambang saro dai maheherak maski sa saiyang tugang.

²⁰Saen man na lugar inaagaw dangan kinakakan kan mga tawo an anoman na pagkakan na saindang makua, alagad dai sinda nababasog. Maski an sadiri nindang mga aki, saindang kinakakan!

²¹Sinasalakay kan mga taga Manases an mga taga Efraim; siring man an ginigibo kan mga taga Efraim, dangan sinasalakay nindang duwa an Juda. Alagad dai pa natatapos an kaanggotan nin Kagurangnan; unat pa giraray an saiyang kamot sagkod ngunyan tanganing magpadusa.