Read Central Bicolano Leviticus 1 Bible Online

Leviticus 1 - Central Bicolano bible

Leviticus 1

¹Hale sa Tabernakulo, inapod nin Kagurangnan si Moises asin tinawan kan minasunod na pagsusundon

²na kukuyogon kan mga Israelita kun nagdodolot sinda nin mga sakripisyo. Kun an siisay man saindo magdara nin dolot sa Kagurangnan, pwede niyang darahon an saro kan saiyang mga baka, karnero o kanding.

³Kun sarong baka an idodolot niya bilang tinutong na atang, kaipuhan lalaki iyan asin mayo nin kaninan. Idodolot niya iyan duman sa may pintoan kan Tabernakulo tanganing akoon siya nin Kagurangnan.

⁴Iduduta niya an saiyang kamot sa ibabaw kan payo kan hayop, asin aakoon iyan bilang pantubos kan saiyang mga kasalan.

⁵Dangan bubunoon niya an hayop sa atubang nin Kagurangnan, asin an dugo kaiyan idodolot sa Kagurangnan kan mga pading aki ni Aaron. Iuula ninda an dugo sa apat na gilid kan altar na yaon sa may pintoan kan Tabernakulo.

⁶Dangan aanitan niya an hayop asin pepedasohon.

⁷An mga padi an mapakarahay kan mga igatong sa altar dangan maamak kaiyan.

⁸An pinedasong karne kan hayop kaiba an payo asin taba kaiyan ibubugtak ninda sa ibabaw kan kalayo.

⁹An kagdolot iyo an mahugas kan bituka asin kan nasa hurihan na mga bitis kan hayop. An padi iyo an matutong kan bilog na atang sa altar. An parong kaiyan nawiwilihan nin Kagurangnan.

¹⁰Kun an idodolot kan lalaki saro kan saiyang mga karnero o kanding, kaipuhan na lalaki asin mayong kaninan.

¹¹Bubunoon niya iyan sa parteng amihan kan altar asin an mga padi iyo an maula kan dugo kan hayop sa apat na gilid kan altar.

¹²Pakatapos na mapedaso kan lalaking nag-atang an hayop, ibubugtak iyan kan padi sa ibabaw kan kalayo sa altar, kaiba an payo saka an taba.

¹³Huhugasan kan kagdolot an bituka asin an nasa hurihan na mga bitis kan hayop, dangan idodolot kan padi an bilog na atang; tututongon niya iyan gabos sa altar. An parong kaiyan nawiwilihan nin Kagurangnan.

¹⁴Kun an saiyang idodolot bilang tinutong na atang sarong gamgam, kaipuhan na magdara siya nin agbaan o salampati.

¹⁵An padi iyo an madara kaiyan sa altar asin pipiripiton niya an liog kan gamgam dangan susuloon an payo kaini duman sa altar. Papatagdoon niya an dugo sa gilid kan altar sagkod na maubos.

¹⁶Pakatapos, hahaleon niya an butsi asin an mga balukag kan gamgam dangan itatapok niya sa parteng sirangan kan altar, sa lugar na binubugtakan kan abo.

¹⁷Dangan kakapotan niya an mag-ibong na pakpak asin babaakon niya an hawak, alagad dai niya pagsusuhayon. Pakatapos, tututongon niyang bilog an gamgam duman sa altar. An parong kaiyan nawiwilihan nin Kagurangnan.