Read Central Bicolano Leviticus 10 Bible Online

Leviticus 10 - Central Bicolano bible

Leviticus 10

¹An mga aki ni Aaron na si Nadab saka si Abihu parehong nagkua kan saindang insensaryo, binugtakan nin baga asin insenso dangan idinolot an kalayo sa Kagurangnan. Alagad bakong banal an kalayo huli ta dai man sinda pinagbotan nin Kagurangnan na magdolot.

²Kaya biglang nagpadara nin kalayo an Kagurangnan asin sinulo sindang duwa sagkod na magadan.

³Dangan sinabihan ni Moises si Aaron, “Iyo ini an itinaram nin Kagurangnan, ‘An gabos na naglilingkod sako, kaipuhan maggalang kan sakong kabanalan; ipapahiling ko an sakong kamurawayan sa sakong banwaan.’” Dai naggirong si Aaron.

⁴Dangan inapod ni Moises si Misael asin si Elzafan na mga aking lalaki ni Uzziel, na tiyo ni Aaron. Sinabihan niya sinda, “Madya kamo asin luwasan nindo sa santwaryo an mga bangkay kan saindong mga kadugo dangan iluwas nindo sa kampo.”

⁵Kaya nagdolok sinda asin kinapotan an gubing kan mga nagadan; dinara ninda an mga bangkay sa luwas kan kampo siring sa ipinagboot ni Moises.

⁶Sinabihan ni Moises si Aaron asin an mga aki kaining si Eleazar saka si Itamar, “Dai nindo pagpabayaan na dai masukray an saindong buhok asin dai nindo paggision an saindong mga gubing sa pagpahiling na kamo nagmomondo. Kun gibohon nindo iyan, magagadan kamo asin maaanggot an Kagurangnan sa bilog na banwaan. Alagad tinutugotan an kapwa nindo Israelita na ipagmondo an kagadanan na ini huli sa ipinadarang kalayo nin Kagurangnan.

⁷Dai kamo maghale sa may pintoan kan Tabernakulo tanganing dai kamo magadan, huli ta kinonsagra na kamo sa paagi kan paglahid saindo kan lana nin Kagurangnan.” Kaya ginibo ninda an sinabi ni Moises.

⁸Tinaraman nin Kagurangnan si Aaron,

⁹“Dai ka nanggad maglaog sa Tabernakulo ni an saimong mga aki, kun kamo nakainom nin arak o maisog na inomon; sa oras na gibohon nindo iyan, magagadan kamo. Saro ining pagsusundon na ootobon nindo sa gabos na henerasyon.

¹⁰Kaipuhan maaraman mo kun arin an banal saka an ordinaryo, an maati asin an malinig.

¹¹Kaipuhan tukdoan mo an gabos na tawo nin Israel kan mga ipinagboboot ko saimo sa paagi ni Moises.”

¹²Dangan sinabihan ni Moises si Aaron saka an duwang natatadang aking lalaki kaini na si Eleazar asin si Itamar, “Kuahon nindo an natadang pagkakan na idinolot sa Kagurangnan asin gumibo kamo nin tinapay na mayo nin lebadura dangan kakanon nindo sa may altar, huli ta iyan orog kabanal.

¹³Kakakanon nindo iyan sa sarong banal na lugar, huli ta iyo iyan an kahirasan nindo asin kan saindong mga aki hale sa idinolot sa Kagurangnan. Iyo iyan an ipinagboot sako nin Kagurangnan.

¹⁴Alagad an daghan saka an bitis na itinaas sa Kagurangnan bilang espesyal na regalo asin kahirasan para sa mga padi pwede nindong kakanon asin kan saindong mga pamilya maski saen na malinig na lugar. An mga dolot na iyan itinao saindo asin sa mga aki nindo bilang kahirasan, hale sa mga dolot para sa katoninongan kan mga Israelita.

¹⁵Dadarahon ninda an toong hurihan na bitis kan hayop asin an daghan sa panahon na idinodolot an taba bilang dolot na pagkakan sa Kagurangnan. An mga kabtang na ini kan hayop iyo an kahirasan nindo saka kan saindong mga aki sagkod sa maabot na panahon, siring sa pagboot nin Kagurangnan.”

¹⁶Naghapot si Moises manongod sa kanding na dolot para sa kasalan asin naisihan niya na tinutong na idto. Naanggot siyang marahay ki Eleazar saka ki Itamar. Hinapot niya sinda,

¹⁷“Tadaw ta dai nindo kinakan sa sarong banal na lugar an dolot para sa kasalan? Orog iyan kabanal asin itinao na saindo nin Kagurangnan tanganing mahale an kasalan kan mga tawo.

¹⁸Kinakan kutana nindo iyan sa laog kan Tabernakulo, nin huli ta dai man ilinaog duman an dugo kan hayop, siring sa ipinagboot ko.”

¹⁹Nagsimbag si Aaron, “Nagdarara an mga tawo sa Kagurangnan kan saindang dolot para sa saindang kasalan asin tinutong na atang, alagad nangyari pa giraray sako an mga makangirhat na bagay na ini. Kun nagkakan ako kan dolot para sa kasalan, mawiwilihan daw ako nin Kagurangnan?”

²⁰Kan madangog ini ni Moises, dai na siya naggirong.