Read Central Bicolano Leviticus 11 Bible Online

Leviticus 11 - Central Bicolano bible

Leviticus 11

¹Itinao nin Kagurangnan ki Moises saka ki Aaron an minasunod na pagsusundon

²kan mga Israelita. Pwede nindong kakanon an arin man na hayop na nag-eerok sa daga

³na baak an mga kuku asin minasapa kan saindang pagkakan.

⁴Alagad dai nindo pwedeng kakanon an mga minasunod: an kamelyo, an liebre, asin an kuneho. Ibilang nindo an mga iyan na maating hayop; minasapa sinda kan saindang pagkakan alagad bakong baak an saindang mga kuku.

⁵

⁶

⁷Dai kamo magkakan nin orig. Ibilang nindo iyan sa mga maating hayop; baak an mga kuku kaiyan alagad dai minasapa kan saiyang pagkakan.

⁸Dai kamo magkakan kan karne o magduta sa gadan na hawak kan mga iyan, huli ta maati an mga iyan.

⁹Sa mga nasa katubigan, pwede nindong kakanon an mga sira na igwa nin parikpik saka kiskis;

¹⁰alagad an mayo nin parikpik saka kiskis, dai nindo pwedeng kakanon.

¹¹Ibilang nindong maati an mga iyan. Dai kamo magkakan, kan mga sirang iyan o magduta sa gadan na sira.

¹²Dai nanggad kamo magkakan kan arin man na nag-eerok sa tubig na mayo nin parikpik saka kiskis.

¹³Iyo ini an dai nindo pwedeng kakanon: an agila, an bwitre, an agilang dagat;

¹⁴an asor, an gabos na klase nin halkon,

¹⁵an gabos na klase nin uwak,

¹⁶an abestro, an pangbangging lawin, an gabiota sagkod an gabos na klase nin lawin,

¹⁷an kuwaw, an somormuho, an mampak,

¹⁸an ganso, an pelikano,

¹⁹an gabos na klase nin talaod, an abudilya asin an paniki.

²⁰An mga insekto na igwa nin pakpak gabos maati,

²¹pwera kan mga insektong naglulukso.

²²Pwede nindong kakanon an manlaen-laen na klase nin doron, an oregol saka an lukton.

²³Alagad dai kamo magkakan kan ibang insekto na may pakpak asin may apat na bitis, huli ta maati an mga iyan.

²⁴An siisay man na makadotdot kan bangkay kan minasunod na mga hayop, magigin maati sagkod na magbanggi: an gabos na hayop na may kuku na bakong baak asin dai minasapa kan saindang pagkakan, sagkod an gabos na hayop na apat an bitis. An siisay man na magdara kan saindang bangkay kaipuhan maglaba kan saiyang gubing, alagad magigin maati man giraray siya sagkod magbanggi.

²⁹Ibilang man nindo na maati an mga ini: an kino, an tabili, an tuko, an ogot, asin an tagaw.

³⁰

³¹Maati an mga ini, asin an siisay man na makadotdot kan bangkay kan mga ini magigin maati sagkod magbanggi.

³²An arin man na mahulogan kan saindang bangkay magigin maati, kahoy man o tela, anit o sako, o anoman na kagamitan. Kaipuhan ibuntog iyan sa tubig alagad magigin maati man giraray iyan sagkod magbanggi.

³³Kun an gadan na hayop mahulog sa laog nin sarong koron, magigin maati an gabos na yaon sa laog kaiyan, asin kaipuhan pasaon an koron.

³⁴An ano man na pagkakan sa laog kan koron na pwedeng kakanon alagad naulaan kan tubig na hale sa maating koron, magigin maati man; an ano man na pwedeng inomon sa laog kan maating koron, magigin maati man.

³⁵Magigin maati an ano man na mahulogan kan bangkay kan mga hayop na iyan; pogon man o kalan, dapat na pasaon;

³⁶alagad an sarong burabod o an sarong tangke nin tubig magdadanay na malinig. An ibang bagay na makaduta sa saindang bangkay magigin maati.

³⁷Kun an saro sainda mahulog sa banhi na itatanom, an banhi dai magigin maati.

³⁸Alagad kun an banhi ibinugtak na sa tubig dangan mahulogan kan saro sainda, an banhi magigin maati.

³⁹Kun magadan an arin man na hayop na pwedeng kakanon, an siisay man na makadotdot kaiyan magigin maati sagkod magbanggi.

⁴⁰An siisay man na magkakan kan arin man na kabtang kan gadan na hayop, kaipuhan maglaba kan saiyang gubing, alagad magigin maati pa giraray siya sagkod magbanggi. An siisay man na magdara kan bangkay kaiyan, kaipuhan na maglaba kan saiyang gubing, alagad magigin maati man giraray sagkod magbanggi.

⁴¹Dai kamo magkakan kan arin man na saradit na hayop sa daga,

⁴²nagkakamang man o naglalakaw sa paagi nin apat o dakul na bitis, huli ta maati an mga iyan.

⁴³Hare kamo pagkakan kan arin man kaiyan tanganing dai man kamo magin maati.

⁴⁴Ako an Kagurangnan na saindong Dios; kaipuhan na kamo magin banal huli ta ako banal.

⁴⁵Ako an Kagurangnan na nagluwas saindo sa daga nin Egipto tanganing ako an magin Dios nindo. Kaya magin banal kamo, huli ta ako banal.

⁴⁶Iyo ini an pagsusundon manongod sa mga hayop saka mga gamgam, manongod sa gabos na nabubuhay sa tubig asin sa gabos na naghihiro sa ibabaw nin daga.

⁴⁷Magin maingat kamo sa pagmidbid kun arin an malinig asin an maati, kun arin sa mga nabubuhay na hayop an pwedeng kakanon asin an mga dai pwedeng kakanon.