Read Central Bicolano Leviticus 16 Bible Online

Leviticus 16 - Central Bicolano bible

Leviticus 16

¹Pakagadan kan duwang aking lalaki ni Aaron huli sa pagdolot ninda sa Kagurangnan nin bakong banal na kalayo,

²tinaraman nin Kagurangnan si Moises, “Sabihan mo an saimong tugang na si Aaron na magduman sa likod kan panlipod na kurtina, sa Kabanal-banaleng Lugar, sa talaan na panahon sana, huli ta duman ako nagpapahiling sa panganoron, sa ibabaw kan takop kan Kaban nin Tipan. Kun dai siya magsunod, magagadan siya.

³Pwede siyang lumaog sa Kabanal-banaleng Lugar pakatapos niyang magdara nin sarong torilyong baka para sa dolot para sa kasalan, asin nin sarong lalaking karnero para sa tinutong na atang.

⁴Dangan itinao nin Kagurangnan an minasunod na pagsusundon. Bago maglaog si Aaron sa Kabanal-banaleng Lugar, kaipuhan magkarigos siya dangan magsulot kan mga gubing na sa padi: an linong abito asin sarwal, an habay saka an mitra.

⁵An komunidad nin Israel iyo an matao ki Aaron nin duwang lalaking kanding para sa dolot para sa kasalan, asin sarong lalaking karnero para sa tinutong na atang.

⁶Madolot si Aaron nin sarong torong baka bilang dolot para sa saiyang kasalan asin para sa saiyang pamilya.

⁷Pakatapos, dadarahon niya an duwang kanding sa pintoan kan Tabernakulo

⁸asin maripa siya duman huli sa paggamit nin duwang gapo na an saro may markang “para sa Kagurangnan” asin an saro, “para ki Azazel.”

⁹Dangan idodolot niya bilang dolot para sa kasalan an kanding na para sa Kagurangnan.

¹⁰An kanding na para ki Azazel idodolot na buhay sa Kagurangnan, asin papalakawon pasiring ki Azazel sa desyerto, tanganing mahale an mga kasalan kan mga tawo.

¹¹Bubunoon ni Aaron an torong baka bilang dolot para sa saiyang kasalan asin para sa saiyang pamilya.

¹²Makua siya nin insensaryo na pano nin baga na hale sa altar saka duwang gugom nin pinong insenso. Dadarahon niya ini duman sa Kabanal-banaleng Lugar

¹³dangan sa atubang nin Kagurangnan, ibubugtak niya sa baga an insenso tanganing tahoban kan aso kan insenso an takop kan Kaban nin Tipan, tanganing dai niya iyan mahiling asin dai siya magadan.

¹⁴Makua siya kan dugo kan toro dangan sa paagi kan saiyang muro wiwirikan niya an atubangan kan takop asin pitong beses niyang wiwirikan an atubangan kan Kaban nin Tipan.

¹⁵Pakatapos, bubunoon niya an kanding na dolot para sa kasalan kan mga tawo; dadarahon niya an dugo kaini duman sa Kabanal-banaleng Lugar asin siring kan ginibo niya sa dugo kan toro, wiwirikan man niya kan dugo an takop asin an atubangan kan Kaban nin Tipan.

¹⁶Sa paaging ini, gigibohon niya an seremonya nin paglinig kan Kabanal-banaleng Lugar, hale sa pagkanimaati kan banwaan nin Israel saka sa saindang mga kasalan. Kaipuhan gibohon man niya an siring na paglinig sa Tabernakulo, huli ta yaon ini sa tahaw kan saindang kampo na maati.

¹⁷Magpoon na maglaog si Aaron sa Kabanal-banaleng Lugar tanganing gibohon an seremonya nin paglinig sagkod na siya magluwas, kaipuhan mayo nin siisay man sa laog kan Tabernakulo. Pakatapos na magibo niya an seremonya nin pagbayad nin kasalan para saiya asin sa saiyang pamilya patin para sa bilog na komunidad nin Israel,

¹⁸maduman siya sa altar na pinagtututongan kan mga dolot asin lilinigan man niya iyan. Makua siya nin dikit na dugo kan toro asin dikit na dugo kan kanding, dangan lalahidan niya an mga sungay na yaon sa mga kanto kan altar.

¹⁹Sa paagi kan saiyang muro, pitong beses niyang wiwirikan nin dugo an altar. Sa paaging ini, lilinigan niya an altar sa mga kasalan kan mga Israelita asin papakabanalon niya an altar.

²⁰Pakatapos ni Aaron kan seremonya nin paglinig kan Kabanal-banaleng Lugar, kan Tabernakulo saka kan altar, kukuahon niya an buhay na kanding na para ki Azazel. dangan idodolot sa Kagurangnan.

²¹Iduduta niya an saiyang mga kamot sa ibabaw kan payo kan kanding dangan ikukumpisal niya an gabos na karatan kan banwaan nin Israel, an saindang mga kasalan asin kasombikalan. Sa paaging ini, ibinabalyo niya an gabos na karatan sa payo kan kanding. Pakatapos kaiyan, aalawon an kanding pasiring sa desyerto kan lalaking napili na mag-alaw kaiyan.

²²Dadarahon kan kanding an gabos nindang kasalan pasiring sa daga na mayo nin nag-eerok.

²³Dangan malaog si Aaron sa Tabernakulo; huhubaon niya an mga gubing na sa padi na isinulot niya bago siya naglaog sa Kabanal-banaleng Lugar asin iwawalat niya duman an mga gubing.

²⁴Dangan makarigos siya sa sarong banal na lugar saka isusulot an sadiri niyang gubing bago siya magluwas. Pakatapos, idodolot na niya an tinutong na atang tanganing mahale an saiyang mga kasalan asin kan mga Israelita.

²⁵Tututongon niya sa altar an taba kan hayop na dolot para sa kasalan.

²⁶An lalaking nag-alaw kan kanding pasiring ki Azazel sa desyerto, kaipuhan maglaba kan saiyang gubing asin magkarigos bago siya magbalik sa kampo.

²⁷An toro asin an kanding na ginamit para sa dolot sa kasalan na kinuahan kan dugo na dinara sa Kabanal-banaleng Lugar, dadarahon sa luwas kan kampo dangan tututongon. Tututongon an anit, an laman, saka an bituka.

²⁸An matutong kan mga iyan kaipuhan maglaba kan saiyang gubing asin magkarigos bago magbalik sa kampo.

²⁹An mga minasunod iyo an ootobon nindo sa gabos na panahon. Sa ikasampolong aldaw kan ikapitong bulan, an mga Israelita saka an mga dayuhan na nag-eerok sa kaibahan ninda kaipuhan na mag-ayuno asin dai magtrabaho.

³⁰Sa aldaw na iyan gigibohon an seremonya nin paglinig kan saindang kasalan tanganing magin malinig sinda.

³¹An aldaw na iyan sarong sabbath para sainda; aldaw iyan nin pag-ayuno asin pagpahingalo. An mga pagsusundon na ini kaipuhan na kuyogon sa gabos na panahon.

³²An Halangkaw na Padi na inordenan asin kinonsagra bilang pading kasalihid kan saiyang ama, iyo an magibo kan seremonya nin paglinig. Isusulot niya an mga gubing na sa padi

³³dangan gigibohon niya an seremonya nin paglinig kan Kabanal-banaleng Lugar, kan Tabernakulo, kan altar, kan mga padi, sagkod kan bilog na komunidad nin Israel.

³⁴An mga pagsusundon na ini kaipuhan na kuyogon sa gabos na panahon. Gigibohon an seremonyang ini sarong beses sa taon tanganing malinigan an mga Israelita kan saindang mga kasalan. Ginibo ni Moises an ipinagboot nin Kagurangnan.