Read Central Bicolano Leviticus 17 Bible Online

Leviticus 17 - Central Bicolano bible

Leviticus 17

¹Pinagbotan nin Kagurangnan si Moises

²na itao ki Aaron asin sa saiyang mga aking lalaki patin sa bilog na banwaan nin Israel an minasunod na pagsusundon.

³Kun an sarong Israelita magbuno nin baka o karnero o kanding bilang atang sa Kagurangnan, alagad sa ibang lugar niya binuno asin bakong sa may pintoan kan Tabernakulo, nakalapas siya kan Togon. Nagpabulos siya nin dugo, asin huli kaiyan dai na siya ibibilang na kaayon sa banwaan nin Dios.

⁵An katuyohan kaini iyo, na kaipuhan darahon kan mga Israelita sa Kagurangnan an mga hayop na dati nindang binubuno sa kaawagan. An mga iyan dadarahon ninda sa padi duman sa may pintoan kan Tabernakulo asin duman ninda bubunoon bilang dolot para sa katoninongan.

⁶An dugo iuula kan padi sa mga gilid kan altar sa may pintoan kan Tabernakulo asin tututongon niya an taba tanganing magkaigwa kan parong na nawiwilihan nin Kagurangnan.

⁷Kaya dai na nanggad sinda magbubuno nin mga hayop sa kaawagan bilang dolot sa mga demonyo. Kaipuhan kuyogon kan mga Israelita an pagsusundon na ini sagkod lamang.

⁸An siisay man na Israelita o dayuhan na nakikihimanwa sainda na magdolot nin tinutong na atang o nin arin man na dolot

⁹asin dai iyan darahon sa may pintoan kan Tabernakulo tanganing ikadolot sa Kagurangnan, dai na ibibilang na kaayon sa banwaan nin Dios.

¹⁰Kun an sarong Israelita o dayuhan na nakikihimanwa sainda magkakan nin karne na igwa pa nin dugo, siya magigin kaiwal nin Kagurangnan asin dai na ibibilang na kaayon sa saiyang banwaan.

¹¹Huli ta an buhay kan laman yaon sa dugo; kaya ipinagboot nin Kagurangnan na iula an gabos na dugo duman sa altar tanganing mahale an mga kasalan kan mga tawo. An dugo, na iyo an buhay, an nakakahale nin mga kasalan.

¹²Iyo ini an dahelan kun tadaw ta nagtaram an Kagurangnan sa mga Israelita na dai nin siisay man sainda, ni sa mga dayuhan na nakikihimanwa sainda, na magkakan nin karne na igwa pa nin dugo.

¹³Kun an sarong Israelita o sarong dayuhan na nakikihimanwa sainda mang-ayam nin hayop o gamgam na pwedeng kakanon, papabuloson niya an dugo kaiyan sa daga dangan tatahoban.

¹⁴An buhay kan arin man na linalang yaon sa dugo kaiyan kaya nagtaram an Kagurangnan sa mga Israelita, na dai nanggad sinda magkakan nin karne na igwa pa nin dugo, asin an siisay man na gumibo kaiyan, dai na ibibilang na kaayon sa saiyang banwaan.

¹⁵An siisay man na tawo, Israelita man o dayuhan, na kumakan kan karne nin hayop na nagadan o ginadan kan mga lalaw na hayop, kaipuhan na maglaba kan saiyang gubing asin magkarigos. Mahalat siya sagkod magbanggi dangan siya magigin malinig.

¹⁶Kun dai niya iyan gibohon, magkakasala siya.