Read Central Bicolano Leviticus 18 Bible Online

Leviticus 18 - Central Bicolano bible

Leviticus 18

¹Tinaraman nin Kagurangnan si Moises

²na sabihan an mga Israelita, “Ako an Kagurangnan na saindong Dios.

³Dai nindo pag-arogon an mga ginigibo kan mga tawo sa daga nin Egipto, na nagin erokan nindo o an mga ginigibo kan mga nag-eerok sa Canaan, na pagdadarahan ko saindo.

⁴Kuyogon nindo an sakong mga togon asin gibohon nindo an sakong mga pagboot. Ako an Kagurangnan na saindong Dios.

⁵Sunodon nindo an mga pagboot saka mga togon na itinatao ko saindo; iyan an maligtas saindo. Ako an Kagurangnan.”

⁶Itinao nin Kagurangnan an minasunod na pagsusundon. Dai kamo makidorog sa kiisay man sa saindong mga kadugo.

⁷Dai nindo pagtawan nin kasosopgan an saindong ama huli sa pagdorog sa saindong ina. Kaipuhan dai nindo pagsopogon an saindong ina.

⁸Dai nindo pagtawan nin kasosopgan an saindong ama huli sa pagdorog sa kiisay man sa saiyang ibang agom.

⁹Dai nindo pagdorogan an saindong tugang na babae, maski siya tugang nindo sa ama o sa ina, namundag man siya o dai sa saindong harong.

¹⁰Dai nindo pagdorogan an saindong makoapo na babae; an kasosopgan niya, kasosopgan man nindo.

¹¹Dai nindo pagdorogan an aking babae kan saindong ama sa ibang babae, huli ta tugang man nindo siya.

¹²Dai nindo pagdorogan an saindong tiya, tugang siya kan saindong ama o ina.

¹⁴Dai nindo pagdorogan an agom kan saindong tiyo; tiya nindo siya.

¹⁵Dai nindo pagdorogan an manugang nindong babae

¹⁶o an agom kan saindong tugang na lalaki.

¹⁷Dai nindo pagdorogan an aking babae o an makoapo na babae kan babaeng saindong dinorogan; tibaad kadugo pa nindo sinda, huli ta orog iyan karaot.

¹⁸Dai nindo pag-agomon an tugang na babae kan saindong agom mantang nabubuhay pa ini.

¹⁹Dai nindo pagdorogan an sarong babaeng nareregla, huli ta siya maati.

²⁰Dai nindo pagdorogan an agom kan ibang lalaki; makakapaati iyan saindo.

²¹Dai nindo ipagtao an arin man sa saindong mga aki tanganing tutongon para sa dios na si Molec, huli ta dadarahan nindo nin kasosopgan an ngaran kan saindong Dios, an Kagurangnan.

²²Dai kamo makidorog sa kapwa nindo lalaki na iarog nindo siya sa sarong babae; anggot an Dios sa siring na karigsokan.

²³Dai nin siisay man na lalaki o babae na makidorog sa sarong hayop; an siring na karigsokan makakapaati saindo.

²⁴Dai kamo maggibo kan arin man sa mga karigsokan na ini na makakapaati saindo, huli ta an paggibo nin siring iyo an nakapaati sa mga nasyon na hahaleon ko sa atubang nindo.

²⁵Nagin maati pati an daga huli kan saindang mga gibo, kaya pinadusahan ko an daga, asin isinuka sinda kaini.

²⁶Ginibo ninda an mga karigsokan na ini na nakapaati kan daga, alagad dai nanggad nindo paggibohon iyan. Kamo gabos, Israelita man o dayuhan na nakikihimanwa saindo, kaipuhan na magkuyog kan mga togon asin pagboot nin Kagurangnan,

²⁸tanganing dai kamo isuka kan daga, arog kan pagsukahan kaini kan mga naenot saindong nag-erok duman.

²⁹Huli ta an siisay man na gumibo kan arin man sa mga karigsokan na iyan, dai na ibibilang na kaayon sa banwaan nin Dios.

³⁰Kaya nagtaram an Kagurangnan, “Kuyogon nindo an mga ipinagboot ko saindo asin dai kamo mag-arog sa mga tawong naenot sa saindo na nag-erok sa daga. Dai kamo magpaati huli sa paggibo kan mga bagay na iyan. Ako an Kagurangnan na saindong Dios.”