Read Central Bicolano Leviticus 19 Bible Online

Leviticus 19 - Central Bicolano bible

Leviticus 19

¹Tinaraman nin Kagurangnan si Moises

²na sabihan an komunidad nin Israel, “Magin banal kamo, huli ta ako, an Kagurangnan na saindong Dios, banal.

³Galangan kan lambang saro saindo an saiyang ina saka ama, asin otobon nindo an sakong mga Sabbath. Ako an Kagurangnan na saindong Dios.

⁴“Dai kamo magtalikod sako asin magsamba sa mga ladawan; dai kamo maggibo nin mga dios-dios na gibo sa metal dangan magsamba sainda. Ako an Kagurangnan na saindong Dios.

⁵“Kun magbuno kamo nin hayop bilang dolot para sa katoninongan, otobon nindo an itinao kong mga pagsusundon asin aakoon ko an dolot.

⁶An karne kaipuhan na kakanon sa aldaw na ginadan an hayop o sa masunod na aldaw. Kun igwa pang matada sa ikatolong aldaw, susuloon iyan,

⁷huli ta maati na. Kun kakanon iyan nin siisay man, dai ko na aakoon an dolot.

⁸An siisay man na magkakan kaiyan, magkakasala huli ta ginibo niyang ordinaryo an sarong bagay na banal, asin dai ko na siya ibibilang na kaayon sa sakuyang banwaan.

⁹“Kun mag-ani kamo kan saindong mga oma, dai nindo pag-anihon an yaon sa mga gilid kan oma, asin dai na nindo pagbalikan an mga natada.

¹⁰Dai man nindo pag-uboson an mga ubas sa saindong ubasan, ni magporot kan mga nagkahurulog; bayaan na nindo iyan para sa mga dukha asin sa mga dayuhan. Ako an Kagurangnan na saindong Dios.

¹¹“Dai kamo maghabon o magdaya o magputik.

¹²Dai kamo magsumpa sa ngaran ko kun dai man sana nindo iyan ootobon; nagdadara iyan nin kasosopgan sa sakong ngaran. Ako an Kagurangnan na saindong Dios.

¹³“Dai nindo pag-apihon o paghabonan an saindong kapwa. Dai nindo pag-abalahon an sweldo nin sarong parapatandan minsan sarong banggi sana.

¹⁴Dai nindo pagmaldisyonon an sarong bongog o pagbugtakan nin singkogan an sarong buta tanganing matumba siya; alagad magkaigwa kamo nin pagkatakot sako. Ako an Kagurangnan.

¹⁵“Dai kamo maghukom na bakong matanos; dai kamo magpahiling nin pagsurog sa mga dukha o pagkatakot sa mga mayaman, alagad sa katanosan, hukoman nindo an saindong kapwa.

¹⁶Dai kamo magpalakop nin kaputikan manongod sa kiisay man, asin kun igwa nin tawong ipinaglalaban an saiyang buhay sa hukoman, kaipuhan na magpahayag kamo kun an sasabihon nindo makakatabang saiya. Ako an Kagurangnan.

¹⁷“Dai kamo magtanom nin maraot na boot sa kiisay man; makipag-olay kamo saiya, tanganing dai kamo magkasala huli saiya.

¹⁸Dai kamo magbalos o magrimpos nin maraot na boot sa kiisay man, kundi kamotan nindo an saindong kapwa siring kan pagkamoot nindo sa saindo man sana. Ako an Kagurangnan.

¹⁹“Kuyogon nindo an sakong mga pagboot. Dai nindo pagpalahian sa ibang klase an saindong mga hayop. Dai kamo magtanom nin duwang klaseng banhi sa sarong oma. Dai kamo magsulot nin gubing na gibo sa duwang klaseng tela.

²⁰“Kun dorogan nin sarong lalaki an sarong oripon na babae na ikakasal sa iba, alagad dai pa natubos o napatalingkas, dai sinda gagadanon kundi dapat na siyasaton.

²¹An lalaki madara nin sarong lalaking karnero sa pintoan kan Tabernakulo bilang dolot nin kabayadan.

²²Dangan magibo an padi kan seremonya nin paglinig para sa lalaking idto sa paagi kan karnero, asin papatawadon an saiyang kasalan.

²³“Kun maglaog na kamo sa Canaan asin makatanom na nin mga kahoy na namumunga, ibilang nindong maati an mga bunga kaiyan sa laog nin tolong taon; dai nindo pagkakanon.

²⁴Sa ikaapat na taon, an gabos na bunga kaiyan magigin banal, sarong dolot nin pag-omaw sa sako, an Kagurangnan.

²⁵Alagad sa ikalimang taon, an ibubunga kaiyan pwede na nindong kakanon. Kun gibohon nindo ini, orog na mamumunga an mga kahoy nindo. Ako an Kagurangnan na saindong Dios.

²⁶“Dai kamo magkakan kan arin man na karne na igwa pa nin dugo. Dai kamo maggibo nin ano man na klase nin salamangka.

²⁷Dai nindo pagguntingan an buhok na yaon sa gilid kan saindong payo o pagputolan an poro kan saindong barabas.

²⁸Dai nindo pagbugtakan nin tato o paglugadan an saindong hawak sa pagmondo sa gadan. Ako an Kagurangnan.

²⁹“Dai nindo paggibohon na mga maraot na babae sa templo an saindong mga aking babae; kun gibohon nindo iyan, magsasaramba na kamo sa ibang mga dios-dios, asin mapapano nin karatan an bilog na daga.

³⁰Otobon nindo an Sabbath, asin galangan nindo an lugar na pinagsasambahan sako. Ako an Kagurangnan.

³¹“Dai kamo maghagad nin hatol sa mga espiritista. Kun gibohon nindo iyan, magigin maati kamo. Ako an Kagurangnan na saindong Dios.

³²“Galangan nindo an mga gurang na asin omawon nindo sinda. Magkaigwa kamo nin pagkatakot sa sako. Ako an Kagurangnan.

³³“Dai nindo paggibohan nin maraot an sarong dayuhan na nakikihimanwa sa saindong daga.

³⁴Gibohon nindo sainda an ginigibo nindo sa kapwa nindo Israelita. Kamotan nindo sinda siring kan pagkamoot nindo sa saindo man sana. Giromdomon nindo na kamo nagin mga dayuhan man sa Egipto. Ako an Kagurangnan na saindong Dios.

³⁵“Dai nindo pagdayaon an siisay man huli sa paggamit nin salang sukolan sa laba, sa gabat o sa bilang.

³⁶Gamiton nindo an tamang sukol, tamang timbang asin tamang bilang. Ako an Kagurangnan na saindong Dios na nagluwas saindo hale sa Egipto.

³⁷Kuyogon nindo an gabos kong togon saka pagboot. Ako an Kagurangnan.”