Read Central Bicolano Leviticus 21 Bible Online

Leviticus 21 - Central Bicolano bible

Leviticus 21

¹Tinaraman nin Kagurangnan si Moises, “Sabihan mo an mga pading aki ni Aaron na dai nin siisay man sainda na mag-ati sa sadiri huli sa pakipaglubong sa sarong kadugo,

²pwera kun saiyang ina, ama, aking lalaki o babae, tugang na lalaki o

³tugang na babae na mayong agom na nag-eerok sa saiyang harong.

⁴Dai siya dapat na magpaati sa pagkagadan kan sarong nagin kadugo niya huli sa pag-inagoman.

⁵“Dai nin siisay man na padi na mag-aris kan arin man na parte kan saiyang payo o magputol kan saiyang barabas o maglugad kan saiyang hawak sa pagpahiling na siya nagmomondo.

⁶Kaipuhan na magin banal sinda asin dai ipasopog an sakong ngaran, huli ta sinda an nagdodolot kan mga dolot na pagkakan sa sako; kaya maninigo na sinda magin banal.

⁷An sarong padi dai dapat mag-agom nin sarong babaeng dating maraot na babae o sarong babaeng bako nang birhen o sarong babaeng sinuhayan nin saiyang agom; an sarong padi banal sa saiyang Dios.

⁸Kaipuhan na midbidon kan banwaan na an padi banal huli ta siya an minadara sako kan mga dolot na pagkakan. Ako an Kagurangnan; ako banal asin ako an nagpapabanal sa sakong banwaan.

⁹Kun an aking babae nin sarong padi magin sarong maraot na babae, ipinapasopog niya an saiyang ama kaya dapat na suloon siya sagkod na magadan.

¹⁰“An Halangkaw na Padi inulaan sa payo kan lanang panlahid asin kinonsagra tanganing magsulot kan mga gubing na sa padi, kaya kaipuhan dai niya pagbayaan na dai masukray an saiyang buhok o na paggision an saiyang gubing sa pagpahiling na siya nagmomondo.

¹¹Kaya maski an gadan iyo an saiyang ama o ina, dai siya dapat na magdolok; magigin maati siya kun gibohon niya iyan.

¹²Dai man siya dapat na magluwas sa Tabernakulo asin dai niya iyan pagdigtaan; huli ta kinonsagra siya kan panlahid na lana kan saiyang Dios.

¹³Sarong birhen an dapat niyang agomon,

¹⁴bakong sarong babaeng balo o sarong sinuhayan kan saiyang agom o sarong dating maraot na babae. Sarong birhen nanggad sana an dapat niyang agomon asin kaipuhan hale sa saiyang tribu,

¹⁵tanganing dai madigtaan an saiyang mga aki sa tahaw kan saiyang banwaan; huli ta ako an Kagurangnan, asin ako an naglaen saiya bilang Halangkaw na Padi.”

¹⁶Tinaraman nin Kagurangnan si Moises,

¹⁷“Sabihan mo si Aaron na mayo nin siisay man sa saiyang kapagarakian na may kaninan sa hawak an pwedeng magdara sako kan dolot na pagkakan sa gabos na panahon.

¹⁸An siisay man na may kaninan sa hawak dai pwedeng magdolot nin atang: an buta, an pilay, an may pinilaan sa lalawogon o hawak,

¹⁹an bari an kamot o bitis;

²⁰an buktot o an mongan, an may helang sa mata o sa kublit, asin an kinapon.

²¹An siisay man sa kapagarakian ni Aaron na may kaninan dai pwedeng magdara kan dolot na pagkakan sa sako.

²²Pwede siyang magkakan kan banal na dolot na pagkakan asin kan pinakabanal na pagkakan na idinolot sa sako,

²³alagad nin huli ta may kaninan siya, dai siya pwedeng magrani sa panlipod na kurtina o sa altar. Dai niya dapat pagdigtaan an mga banal na bagay na ini, huli ta ako an Kagurangnan, asin ako an nagpapabanal kan mga iyan.”

²⁴Iyo ini an isinabi ni Moises ki Aaron, asin sa mga aki kaini patin sa bilog na banwaan nin Israel.