Read Central Bicolano Leviticus 23 Bible Online

Leviticus 23 - Central Bicolano bible

Leviticus 23

¹Tinaraman nin Kagurangnan si Moises,

²“Sabihan mo an banwaan nin Israel na iyo ini an mga itinalaan na pyesta nin Kagurangnan, na ipapahayag ninda bilang mga banal na pagtiripon.

³Magtrabaho kamo sa laog nin anom na aldaw, alagad an ikapitong aldaw iyo an Sabbath nin solemning pahingalo, sarong banal na pagtiripon; dai kamo magtrabaho. Saen man kamo mag-erok, giromdomon nindong an aldaw na iyan sarong Sabbath para sa Kagurangnan.

⁴Ipahayag nindo an mga minasunod na pyesta sa talaan na panahon.

⁵“An Paskwa, na ginigibo sa pag-omaw sa Kagurangnan, minapoon sa banggi kan ikakatorseng aldaw kan enot na bulan.

⁶Sa ikakinseng aldaw, mapoon an Pyesta kan Tinapay na Mayo nin Lebadura para sa Kagurangnan. Sa masunod na pitong aldaw, tinapay na mayo nin lebadura an saindong kakakanon.

⁷Sa enot na aldaw magkakaigwa kamo nin banal na pagtiripon asin dai kamo magtrabaho kan dati nindong ginigibo sa aroaldaw.

⁸Idolot nindo sa Kagurangnan an saindong mga dolot na pagkakan sa laog kan pitong aldaw na iyan. Sa ikapitong aldaw magkakaigwa giraray kamo nin banal na pagtiripon asin dai kamo magtatrabaho.”

⁹Tinaraman nin Kagurangnan si Moises,

¹⁰“Sabihan mo an banwaan nin Israel na kun maglaog na kamo sa dagang itinatao ko saindo asin mag-ani na kamo, dadarahon nindo sa padi an enot na ginuygoy kan enot nindong inani.

¹¹Iiitaas iyan sa Kagurangnan bilang sarong espesyal na dolot tanganing akoon kamo. Idodolot iyan kan padi pagkaaga pakatapos kan aldaw nin Sabbath.

¹²Sa aldaw na darahon nindo an saindong inani, madara man kamo nin sarong lalaking kordero na sangtaon an edad na mayo nin kaninan bilang tinutong na atang sa Kagurangnan.

¹³Madara man kamo nin duwang kilong arina na sinalakan nin lana nin oliba bilang sarong dolot na pagkakan. An parong kan dolot na iyan nawiwilihan nin Kagurangnan. Iibahan nindo iyan nin dolot na sarong litrong arak.

¹⁴Dai kamo magkakan kan bago nindong inani, maski hilaw o dinarang o ginibong tinapay, sagkod na dai pa kamo nakadara sa Dios kan mga dolot na iyan. An pagsusundon na ini gigibohon kan saindong kapagarakian sagkod sa mga maabot na panahon.

¹⁵“Mabilang kamo nin pitong semana pakatapos kan Sabbath, sa aldaw na nagdara kamo kan enot na bunga kan saindong inani.

¹⁶Sa ikasingkwentang aldaw, pakatapos kan ikapitong Sabbath, madara giraray kamo sa Kagurangnan nin bagong dolot na pagkakan hale sa bago nindong inani.

¹⁷An lambang pamilya madara nin duwang tinapay na idodolot sa Kagurangnan bilang sarong espesyal na dolot. An lambang tinapay kaipuhan linuto hale sa duwang kilong arina na may lebadura. Idodolot iyan sa Kagurangnan bilang enot na bunga kan inani.

¹⁸Kaiba kan mga tinapay, an komunidad madolot man nin pitong kordero na sangtaon an edad, sarong torilyong baka asin duwang kanding. Dapat na mayo nin kaninan an mga iyan. Idodolot an mga iyan sa Kagurangnan bilang tinutong na atang kaiba kan dolot na pagkakan asin kan dolot na arak. An parong kan dolot na iyan nawiwilihan nin Kagurangnan.

¹⁹Madolot pa kamo nin sarong lalaking kanding bilang dolot para sa kasalan asin duwang lalaking karnero na sangtaon an edad bilang dolot para sa katoninongan.

²⁰Dadarahon kan padi an tinapay kaiba an duwang lalaking karnero asin iiitaas iyan gabos bilang sarong espesyal na regalo sa Kagurangnan para sa mga padi. An mga dolot na iyan banal.

²¹Sa aldaw na iyan dai kamo magtatrabaho nin ano man kundi magkakaigwa kamo nin banal na pagtiripon. An pagsusundon na ini gigibohon kan saindong kapagarakian sa mga maabot na panahon, saen man sinda mag-erok.

²²“Kun mag-ani na kamo kan saindong oma, dai nindo pag-anihon an mga nasa gilid kan saindong oma, asin dai na kamo magbalik tanganing anihon pa an mga natada; iwalat nindo iyan para sa mga dukha asin sa mga dayuhan. Ako an Kagurangnan na saindong Dios.”

²³Tinaraman nin Kagurangnan si Moises,

²⁴“Sabihan mo an banwaan nin Israel na sa enot na aldaw kan ikapitong bulan, gigibohon an sarong aldaw nin solemning pahingalo, sarong pagiromdom na ipapahayag sa paagi kan tanog kan mga trompeta, sarong aldaw nin pagtiripon. Magtiripon kamo sa pagsamba kun madangog na nindo an tanog kan mga trompeta.

²⁵Magdolot kamo nin dolot na pagkakan sa Kagurangnan, asin dai kamo magtrabaho.”

²⁶Tinaraman nin Kagurangnan si Moises, “An ikasampolong aldaw kan ikapitong bulan iyo an aldaw nin pagbayad para sa mga kasalan. Panahon nindo iyan tanganing magkaigwa nin banal na pagtiripon. Sa aldaw na iyan dai kamo magkakan nin ano man. Magdolot kamo nin sarong dolot na pagkakan sa Kagurangnan.

²⁸Dai kamo magtrabaho sa aldaw na iyan huli ta sa panahon na iyan gigibohon an seremonya kan paghale kan kasalan.

²⁹An siisay man na magkakan nin ano man sa aldaw na iyan dai na ibibilang na kaayon sa sakuyang banwaan.

³⁰An Kagurangnan mismo an magadan sa siisay man na magtrabaho sa aldaw na iyan.

³¹An pagsusundon na ini minasakop sa gabos nindong kapagarakian saen man sinda mag-erok.

³²Kaya magpoon sa pagsolnop kan aldaw sa ikasiyam na aldaw kan bulan, sagkod sa pagsolnop kan aldaw sa ikasampolong aldaw, otobon nindo an Sabbath, asin dai kamo magkakan nin ano man.”

³³Dangan tinaraman nin Kagurangnan si Moises,

³⁴“Sabihan mo an banwaan nin Israel na sa laog nin pitong aldaw, magpoon sa ikakinse kan ikapitong bulan na ini, iyo an Pyesta nin mga Harong-harong para sa Kagurangnan.

³⁵Sa enot na aldaw, magkaigwa kamo nin banal na pagtiripon; dai kamo magtrabaho.

³⁶Aroaldaw sa laog nin pitong aldaw, madolot kamo nin sarong dolot na pagkakan sa Kagurangnan; sa ikawalong aldaw magkaigwa giraray kamo nin banal na pagtiripon asin magdolot kamo nin dolot na pagkakan. Sarong aldaw iyan nin solemning pagtiripon asin dai kamo magtrabaho. (

³⁷“An mga iyan iyo an itinalaan na mga pyesta nin Kagurangnan na saindong ipapahayag bilang mga panahon nin banal na pagtiripon para sa pagsamba, para sa pagdolot nin mga dolot na pagkakan, tinutong na atang, dolot kan enot na bunga kan saindong inani, mga sakripisyo asin mga dolot na arak, sa talaan na panahon kan pagdolot kaiyan sa aroaldaw.

³⁸An mga pyestang ini laen pa kan mga aldaw na Sabbath nin Kagurangnan, asin an mga dolot na ini laen man kan saindong mga regalo, mga dolot sa pag-otob nin panuga, asin mga boluntad na dolot na itinatao nindo sa Kagurangnan.)

³⁹“Pakaani nindo kan saindong mga oma, otobon nindo an mga pyestang ini sa laog nin pitong aldaw, magpoon sa ikakinseng aldaw kan ikapitong bulan. Magpahingalo kamo sa enot na aldaw asin sa ikawalong aldaw.

⁴⁰Sa enot na aldaw, magdara kamo kan pinakamarahay na mga bunga kan saindong mga kahoy, mga sanga nin palma, asin nin mga madahon na kahoy, dangan mag-ogma kamo sa atubangan nin Kagurangnan na saindong Dios sa laog nin pitong aldaw.

⁴¹Taon-taon, gibohon nindo an pyestang ini para sa Kagurangnan sa laog nin pitong aldaw. Saro ining pagsusundon na ootobon kan saindong kapagarakian sagkod lamang.

⁴²An gabos na Israelita maerok sa mga harong-harong sa laog nin pitong aldaw,

⁴³tanganing maaraman kan saindong mga kapagarakian na pinaerok ko sa mga harong-harong an banwaan nin Israel kan iluwas ko sinda sa Egipto. Ako an Kagurangnan na saindong Dios.”

⁴⁴Sa siring na paagi ipinahayag ni Moises sa banwaan nin Israel an mga itinalaan na pyesta nin Kagurangnan.