Read Central Bicolano Leviticus 24 Bible Online

Leviticus 24 - Central Bicolano bible

Leviticus 24

¹Tinaraman nin Kagurangnan si Moises,

²“Pagbotan mo an mga Israelita na magdara nin purong lana nin oliba para sa ilawan tanganing igwa nin ilaw na padagos na maglalaad.

³Aldaw-bangging aatamanon ni Aaron an ilawan na ibinugtak sa luwas kan kurtina, sa atubangan kan Kaban nin Tipan, sa laog kan Tabernakulo. Saro ining pagboot na ootobon kan gabos nindong kapagarakian sagkod pa man.

⁴Si Aaron an mag-aataman kan mga ilawan sa kandelerong gibo sa purong bulawan tanganing padagos na maglaad iyan sa atubangan nin Kagurangnan.

⁵“Magkua kamo nin doseng kilo nin pinong arina asin lutoon nindo iyan na magin doseng tinapay.

⁶Taytayon nindo iyan sa duwang linya sa ibabaw kan bulawan na lamesa; anom na tinapay sa sarong taytay.

⁷Dangan bugtakan nindo nin purong insenso an lambang taytay bilang sarong giromdom na dolot na pagkakan sa Kagurangnan kasalihid kan tinapay.

⁸Sa lambang Sabbath, papakarahayon ni Aaron an mga tinapay na iyan sa atubang nin Kagurangnan. Gigibohon ini kan banwaan nin Israel sagkod lamang.

⁹An tinapay magigin sadiri ni Aaron saka kan saiyang mga kapagarakian, asin kakakanon ninda iyan sa sarong banal na lugar, huli ta kabtang iyan kan banal na pagkakan na idinolot sa Kagurangnan para sa mga padi.”

¹⁰Igwa kaidto nin sarong lalaking Egipcio an ama asin sarong Israelita an ina, na an ngaran Shelomit, na aking babae ni Dibri na gikan sa tribu ni Dan. Sarong aldaw, duman sa kampo, nakiiwal an lalaking ini sa sarong Israelita asin naglanghad siya sa Dios, kaya dinara siya ninda ki Moises.

¹²Pinabantayan siya ni Moises mantang naghahalat sinda kan itataram nin Kagurangnan manongod sa lalaki.

¹³Tinaraman nin Kagurangnan si Moises,

¹⁴“Daraha an lalaking iyan sa luwas kan kampo. An gabos na nakadangog saiya kan maglanghad siya, madoon kan saindang kamot sa saiyang payo, sa pagpatotoo na nagkasala siya. Dangan gagapoon siya kan bilog na komunidad sagkod na magadan.

¹⁵Pakatapos, sabihan mo an banwaan nin Israel na arog kaiyan an mangyayari sa kiisay man na maglanghad sa Dios.

¹⁶An siisay man na Israelita o dayuhan na nag-eerok sa Israel, na maglanghad sa Kagurangnan, gagadanon kan bilog na komunidad sa paagi nin paggapo.

¹⁷“An siisay man na maggadan sa saiyang kapwa, gagadanon man.

¹⁸An siisay man na magbuno kan hayop na bako man saiya, mabayad kaiyan. An prinsipyo iyo ini: buhay sa buhay.

¹⁹“An siisay man na makakulog sa saiyang kapwa, kukulogan man, siring kan ginibo niya.

²⁰Kun nakabari siya nin tolang, babarian man siya nin tolang, mata sa mata, ngipon sa ngipon. An ginibo niya sa saiyang kapwa, iyo man an gigibohon saiya.

²¹An siisay man na magbuno kan hayop na bako man saiya, mabayad kaiyan. An siisay man na maggadan nin tawo, gagadanon man.

²²Saro sanang togon an masakop kan gabos, Israelita man o dayuhan. Ako an Kagurangnan na saindong Dios.”

²³Pakasabi ni Moises kaini sa banwaan nin Israel, dinara ninda sa luwas kan kampo an lalaki asin duman ninda ini ginapo sagkod na magadan. Sa paaging ini inotob kan banwaan nin Israel an ipinagboot nin Kagurangnan ki Moises.