Read Central Bicolano Leviticus 3 Bible Online

Leviticus 3 - Central Bicolano bible

Leviticus 3

¹Kun igwa saindo nin magdolot nin saro kan saiyang mga lalaki o babaeng baka, bilang dolot para sa katoninongan, dapat na mayo iyan nin kaninan.

²Iduduta kan kagdolot an saiyang kamot sa ibabaw kan payo kan hayop dangan bubunoon niya iyan sa may pintoan kan Tabernakulo. Pakatapos, an dugo kan hayop iuula kan mga pading aki ni Aaron sa apat na gilid kan altar.

³Idodolot ninda sa Kagurangnan bilang atang para sa katoninongan an gabos na taba na yaon sa laog kan hawak kan hayop,

⁴an duwang bato asin an taba kaiyan, dangan an pinakamarahay na kabtang kan katoy.

⁵Tututongon an mga iyan kan mga padi duman sa altar kaiba kan mga tinutong na atang. An parong kaiyan nawiwilihan nin Kagurangnan.

⁶Kun karnero o kanding, lalaki man o babae, an idodolot bilang atang para sa katoninongan, kaipuhan mayo iyan nin kaninan.

⁷Kun karnero an idodolot,

⁸iduduta kan kagdolot an saiyang kamot sa ibabaw kan payo kan karnero dangan bubunoon niya iyan sa atubangan kan Tabernakulo. Pakatapos, iuula kan mga padi an dugo kan karnero sa apat na gilid kan altar.

⁹Idodolot ninda sa Kagurangnan bilang atang para sa katoninongan an taba, an bilog na matabang ikog na puputolon hale sa may odog, an gabos na taba na minatahob kan bituka,

¹⁰an duwang bato kaiba an taba kaiyan, asin an pinakamarahay na kabtang kan katoy.

¹¹Tututongon iyan kan padi duman sa altar bilang dolot na pagkakan sa Kagurangnan.

¹²Kun an idodolot sarong kanding,

¹³iduduta kan kagdolot an saiyang kamot sa ibabaw kan payo kan kanding dangan bubunoon niya iyan sa atubang kan Tabernakulo. An dugo kan hayop iuula kan mga padi sa apat na gilid kan altar,

¹⁴asin idodolot ninda sa Kagurangnan bilang dolot na pagkakan an gabos na taba na yaon sa ibabaw kan bituka,

¹⁵an duwang bato kaiba an taba kaiyan sagkod an pinakamarahay na kabtang kan katoy.

¹⁶An mga iyan tututongon kan padi duman sa altar bilang sarong dolot na pagkakan na an parong nawiwilihan nin Kagurangnan. An gabos na taba sadiri nin Kagurangnan.

¹⁷Sagkod pa man dai nin siisay man sa mga Israelita an pwedeng magkakan kan taba saka dugo; iyan sarong pagboot na kukuyogon kan gabos na Israelita saen man sinda mag-erok.