Read Central Bicolano Leviticus 5 Bible Online

Leviticus 5 - Central Bicolano bible

Leviticus 5

¹An mga minasunod na kaso nangangaipo nin mga dolot para sa kasalan. Kun igwa nin tawong inapod tanganing magsaksi sa hukoman manongod sa saiyang nadangog o nahiling, alagad habo niyang isabi, pagdudusahan niya iyan.

²Kun an sarong tawo dai tuyong makaduta sa anoman na bagay na maati, arog baga kan gadan na hayop, magigin maati siya asin magkakasala sa oras na maaraman niya an saiyang naginibo.

³Kun an sarong tawo dai tuyong makaduta sa anoman na bagay na maati na gikan sa tawo, magkakasala siya sa oras na maaraman niya an saiyang naginibo.

⁴Kun an sarong tawo pakaraw na magsumpa, minsan sa ano man na bagay, magkakasala siya sa oras na maaraman niya an saiyang naginibo.

⁵Kun magkasala an sarong tawo, kaipuhan ikumpisal niya an saiyang kasalan

⁶asin bilang padusa kan saiyang kasalan kaipuhan magdara siya sa Kagurangnan nin sarong babaeng karnero o kanding bilang dolot. An padi an madolot kan atang para sa kasalan kan tawong iyan.

⁷Alagad kun dai niya kayang magdolot nin karnero o kanding bilang kabayadan kan saiyang kasalan, madara siya sa Kagurangnan nin duwang salampati o agbaan; an saro kaiyan bilang dolot para sa kasalan asin an saro bilang tinutong na atang.

⁸Dadarahon niya an mga gamgam sa padi na iyo an madolot kan mga iyan. Enot na idodolot kan padi an gamgam na bayad para sa kasalan. Pipiripiton niya an liog kaini alagad dai niya puputolon,

⁹asin iwiwirik niya an kadikit na dugo kaiyan sa gilid kan altar. An matadang dugo papatagdoon niya gabos sa pamitisan kan altar; iyan sarong dolot na makakahale nin kasalan.

¹⁰Dangan idodolot kan padi an ikaduwang gamgam bilang tinutong na atang sosog sa pagboot. Sa paaging iyan idodolot kan padi an atang para sa kasalan kan nasabing tawo, asin papatawadon siya.

¹¹Alagad kun dai niya kayang magdolot nin duwang salampati o duwang agbaan, madara siya nin sarong kilong arina bilang dolot para sa saiyang kasalan. Dai niya iyan bubugtakan nin lana nin oliba o nin insenso, huli ta iyan sarong dolot para sa kasalan asin bakong dolot na pagkakan.

¹²Dadarahon niya iyan sa padi na makua nin sarong gugom kan arina bilang tanda na an gabos itinao sa Kagurangnan, asin tututongon niya duman sa altar bilang dolot na pagkakan; iyan sarong dolot na makakahale nin kasalan.

¹³Sa paaging iyan idodolot kan padi an atang para sa kasalan kan nasabing tawo asin papatawadon siya. An matadang arina magigin pagsadiri kan padi, arog sa dolot na pagkakan.

¹⁴Itinao nin Kagurangnan ki Moises an minasunod na pagsusundon.

¹⁵Kun an sarong tawo dai tuyong magkasala huli sa dai niya pakatao kan mga bayad na banal para sa Kagurangnan, madara siya nin sarong lalaking karnero o kanding na mayo nin kaninan bilang dolot na kabayadan. Aramon nindo an kantidad kaiyan sosog sa kinaugalean na timbang kan santwaryo.

¹⁶Babayadan niya an saiyang utang saka matao pa siya nin dagdag na beynte porsyento. Itatao niya iyan sa padi na iyo an madolot kan hayop bilang atang para sa saiyang kasalan, asin papatawadon siya.

¹⁷Kun an sarong tawo dai tuyong magkasala huli sa paglapas kan arin man sa mga pagboot nin Kagurangnan, babayadan niya an kasalan na iyan.

¹⁸Madara siya sa padi nin sarong lalaking karnero o kanding na mayo nin kaninan bilang dolot nin kabayadan. Aaramon nindo an kantidad kaiyan sosog sa kinaugalean na timbang kan santwaryo. An padi an madolot kan sakripisyo para sa kasalan kan tawong iyan, asin papatawadon siya.

¹⁹Dolot iyan nin kabayadan para sa kasalan na ginibo niya tumang sa Kagurangnan.