Read Central Bicolano Leviticus 7 Bible Online

Leviticus 7 - Central Bicolano bible

Leviticus 7

¹Iyo ini an mga pagsusundon manongod sa dolot na kabayadan. An mga iyan orog kabanal.

²An hayop para sa dolot na ini, bubunoon duman sa parteng amihan kan altar, saen binubuno an mga hayop na para sa tinutong na atang, asin an dugo kaiyan iuula sa apat na gilid kan altar.

³Hahaleon an gabos na taba kaiyan saka idodolot sa altar: an matabang ikog, an taba na minatahob kan bituka,

⁴an duwang bato asin an taba kaiyan patin an pinakamarahay na kabtang kan katoy.

⁵An gabos na taba kaiyan tututongon kan padi sa ibabaw kan altar bilang sarong dolot na pagkakan para sa Kagurangnan. Iyan sarong dolot nin kabayadan.

⁶An lambang lalaki na kaayon sa mga pamilya kan padi pwedeng kumakan kaiyan alagad kaipuhan na kakanon niya iyan sa sarong lugar na banal huli ta iyan orog kabanal.

⁷Saro sana an pagboot manongod sa dolot para sa kasalan asin para sa dolot nin kabayadan: an karne magigin sadiri kan padi na nagdolot kan atang.

⁸An anit kan hayop magigin sadiri man kan padi na nagdolot kan atang.

⁹Mapapasaiya an arin man na dolot na pagkakan na idinolot niya, magin iyan linuto sa horno, sa kawali o sa parilya.

¹⁰Alagad an gabos na dolot na pagkakan na dai linuto, sinalakan man nin lana o dai, magigin sadiri kan mga pading aki ni Aaron asin kaipuhan na pagbarangaon ninda iyan.

¹¹Iyo ini an mga pagsusundon manongod sa dolot para sa katoninongan na pwedeng idolot sa Kagurangnan nin siisay man.

¹²Kun idolot iyan nin sarong tawo bilang pasalamat sa Dios, kaiba an hayop na iaatang, madolot siya nin tinapay na mayo nin lebadura: mahibog na tinapay hale sa arina na sinalakan nin lana nin oliba o manipis na biskwit na linahidan nin lana nin oliba o manipis na biskwit na gibo sa arina na sinalakan nin lana nin oliba.

¹³Madolot pa siya nin iba pang ginibong tinapay na igwa nin lebadura.

¹⁴Makua siya nin saro sa manlaen-laen na klase nin tinapay na dara niya bilang espesyal na dolot sa Kagurangnan; magigin sadiri iyan kan padi na maula kan dugo kan dolot para sa katoninongan.

¹⁵An karne kan hayop kaipuhan na kakanon sa aldaw na idinolot iyan; dai magtada kaiyan para sa masunod na aldaw.

¹⁶Alagad kun an dolot para sa katoninongan idolot niya bilang pag-otob nin sarong panuga o bilang sarong boluntad na dolot, dai kaipuhan na uboson iyan sa laog kan aldaw na idinolot iyan; an matada pwedeng kakanon sa masunod na aldaw.

¹⁷Kun may matada pang karne sa ikatolong aldaw kaipuhan tutongon iyan.

¹⁸Kun kakanon pa an natadang karne sa ikatolong aldaw, dai na aakoon nin Dios an kagdolot. Dai iyan ipapanongod sa kagdolot; magigin maati iyan. Papadusahan an siisay man na kumakan kaiyan.

¹⁹Kun an karne makaduta sa ano man na maati, dai nanggad iyan pagkakanon kundi tutongon. An siisay man na malinig pwedeng kumakan kan karne.

²⁰An tawong bakong malinig alagad kuminakan kaiyan, dai na ibibilang na kaayon sa banwaan nin Dios.

²¹An siisay man na kumakan kan idinolot na karne pakatapos na siya makaduta sa ano man na maati, tawo man o hayop, dai na ibibilang na kaayon sa banwaan nin Dios.

²²Tinawan pa nin Kagurangnan si Moises kaining mga pagsusundon

²³kan mga Israelita. Dai dapat kakanon an taba nin baka, karnero o kanding.

²⁴An taba kan hayop na nagadan o ginadan nin sarong lalaw na hayop dai nanggad nindo pagkakanon; pwedeng gamiton iyan sa ibang katuyohan.

²⁵An siisay man na kumakan kan taba kan hayop na pwedeng idolot bilang dolot na pagkakan sa Kagurangnan, dai na ibibilang na kaayon sa banwaan nin Dios.

²⁶Saen man mag-erok an mga Israelita, dai nanggad sinda magkakan kan dugo kan gamgam o hayop.

²⁷An siisay man na maglapas kan togon na ini, dai na ibibilang na kaayon sa banwaan nin Dios.

²⁸Tinawan pa nin Kagurangnan si Moises kaining mga pagsusundon

²⁹kan mga Israelita. An siisay man na magtao nin dolot para sa katoninongan kaipuhan maglaen nin kadikit kaiyan bilang espesyal na regalo sa Kagurangnan.

³⁰Siya mismo an madolot kaiyan bilang dolot na pagkakan. Dadarahon niya an taba kan hayop kaiba an daghan kaiyan dangan iitaas niya an mga iyan sa Kagurangnan bilang espesyal na regalo.

³¹An taba tututongon kan padi duman sa altar, alagad an daghan magigin pagsadiri kan mga padi.

³²An nasa hurihan na toong bitis kan hayop itatao niya bilang espesyal na regalo

³³sa padi na nagdolot kan dugo saka taba kan dolot para sa katoninongan.

³⁴An daghan kan hayop sarong espesyal na regalo, asin an nasa hurihan na toong bitis sarong espesyal na kahirasan na kinua nin Kagurangnan hale sa mga Israelita asin itinao sa mga padi. Iyo iyan an kaipuhan na itao kan mga Israelita sa mga padi sagkod pa man.

³⁵Sa pagkakan na idinolot sa Kagurangnan, iyo iyan an kahirasan na itinao ki Aaron asin sa saiyang mga aki kan aldaw na sinda ordenan bilang mga padi.

³⁶Kan aldaw na iyan, ipinagboot nin Kagurangnan sa mga Israelita na itao ninda sa mga padi an kabtang na iyan kan dolot. Saro ining pagsusundon na dapat otobon kan mga Israelita sa gabos na panahon.

³⁷Iyo ini an mga pagsusundon manongod sa tinutong na atang, sa dolot na pagkakan, sa dolot para sa kasalan, sa dolot na kabayadan, sa dolot sa ordenasyon asin sa dolot para sa katoninongan.

³⁸Duman sa kalangtadan, sa Bukid nin Sinai, itinao nin Kagurangnan ki Moises an mga pagboot na ini, sa parehong aldaw na tinaraman niya an mga Israelita na magdara kan saindang mga dolot.