Read Central Bicolano Leviticus 8 Bible Online

Leviticus 8 - Central Bicolano bible

Leviticus 8

¹Tinaraman nin Kagurangnan si Moises,

²“Ipag-iba mo si Aaron saka an saiyang mga aking lalaki duman sa may pintoan kan Tabernakulo, asin darahon mo man an mga gubing na sa padi, an panlahid na lana, an torilyong baka para sa dolot sa kasalan, an duwang lalaking karnero, sagkod an basket nin tinapay na mayo nin lebadura.

³Dangan tiriponon mo duman an mga tawo.”

⁴Ginibo ni Moises an ipinagboot saiya nin Kagurangnan asin kan magkatiripon na an mga tawo,

⁵sinabihan sinda ni Moises, “An gigibohon ko ngunyan iyo an ipinagboot nin Kagurangnan.”

⁶Dangan dinara ni Moises sa enotan si Aaron saka an saiyang mga aking lalaki asin kinarigos niya sinda.

⁷Pakatapos, isinulot niya ki Aaron an tunika, an abito sagkod an habay. Dangan isinulot ni Moises ki Aaron an efod na saiyang ibinugkos sa paagi kan habay na magayon an pakagibo.

⁸Sunod niyang isinulot saiya an pantahob sa daghan dangan ibinugtak niya duman an Urim asin Tummim.

⁹Ibinugtak niya an mitra sa payo ni Aaron asin sa atubangan kaiyan ibinugtak niya an bulawan na korona, an banal na tanda kan konsagrasyon, sosog sa ipinagboot saiya nin Kagurangnan.

¹⁰Pakatapos, kinua ni Moises an panlahid na lana dangan linahidan niya an Tabernakulo asin an iba pang yaon sa laog. Sa paaging ini, kinonsagra niya sa Kagurangnan an gabos.

¹¹Dangan kuminua siya nin kadikit kan lana asin pitong beses niyang winirikan an altar sagkod an mga kasangkapan kaini, an palanggana asin an tumbawan kaini, tanganing makonsagra man sa Kagurangnan.

¹²Pakatapos, inulaan niya kan lana an payo ni Aaron sa pag-orden saiya.

¹³Pinadolok man ni Moises sa enotan an mga aking lalaki ni Aaron. Sinulotan niya sinda kan mga tunika, hinagkosan kan habay dangan binugtakan nin turban an saindang mga payo sosog sa ipinagboot nin Kagurangnan.

¹⁴Dangan dinara ni Moises an torilyong baka na dolot para sa kasalan asin idinuta ni Aaron saka kan saiyang mga aki an saindang mga kamot sa ibabaw kan payo kan hayop.

¹⁵Binuno ni Moises an baka, kinua an dugo asin sa paagi kan saiyang muro, linahidan an mga sungay kan altar tanganing konsagrahon ini. Dangan inula niya an natadang dugo sa pamitisan kan altar tanganing konsagrahon asin linigan ini.

¹⁶Kinua ni Moises an gabos na taba kan baka na nakatahob sa bituka, an pinakamarahay na kabtang kan katoy, an duwang bato kaiba an taba, dangan tinutong niya iyan gabos duman sa altar.

¹⁷Alagad an hawak kan baka, an anit saka an odo, ilinuwas niya sa kampo asin tinutong duman sosog sa ipinagboot nin Kagurangnan.

¹⁸Dangan kinua ni Moises an saro sa duwang lalaking karnero para sa tinutong na atang. Idinuta ni Aaron saka kan saiyang mga aki an saindang mga kamot sa payo kan hayop.

¹⁹Binuno ni Moises an hayop dangan inula an dugo sa apat na gilid kan altar.

²⁰Pinedaso niya an karnero, hinugasan an bituka saka an nasa hurihan na mga bitis, dangan tinutong an payo, an taba sagkod an gabos na kabtang kan karnero sa ibabaw kan altar, sosog sa ipinagboot nin Kagurangnan. An tinutong na atang na ini sarong dolot na pagkakan. An parong kan dolot na ini nawiwilihan nin Kagurangnan.

²²Dangan kinua ni Moises an ikaduwang lalaking karnero na para sa ordenasyon kan mga padi. Idinuta ni Aaron saka kan saiyang mga aki an saindang mga kamot sa ibabaw kan payo kan hayop.

²³Binuno ni Moises an hayop, nagkua nin dikit na dugo kaini asin linahidan an hikawan kan toong talinga ni Aaron. Linahidan man ni Moises an tanggurangan kan toong kamot ni Aaron sagkod an tanggurangan kan saiyang toong bitis.

²⁴Dangan linahidan man niya nin dugo an hikawan kan mga toong talinga kan mga aki ni Aaron, an tanggurangan kan mga toong kamot asin an tanggurangan kan saindang mga toong bitis. Pakatapos, inula ni Moises an natadang dugo sa apat na gilid kan altar.

²⁵Kinua niya an taba, an matabang ikog, an taba na nakakatahob sa bituka, an pinakamarahay na parte kan katoy, an duwang bato kaiba an taba, asin an toong hita.

²⁶Dangan hale sa basket nin tinapay na mayo nin lebadura na idinolot sa Kagurangnan kuminua siya nin sarong tinapay, saka sarong tinapay na igwang lana, asin sarong biskwit. Dangan ibinugtak niya an mga iyan sa ibabaw kan taba asin kan toong hurihan na bitis kan hayop.

²⁷Ibinugtak niya iyan gabos sa mga kamot ni Aaron asin kan saiyang mga aki, dangan initaas ninda iyan sa Kagurangnan bilang sarong espesyal na dolot.

²⁸Kinua sainda ni Moises an pagkakan dangan tinutong niya sa altar, sa ibabaw kan tinutong na atang, bilang dolot para sa ordenasyon. Ini sarong dolot na pagkakan asin an parong kaini nawiwilihan nin Kagurangnan.

²⁹Pakatapos, kinua ni Moises an daghan kan hayop asin initaas bilang espesyal na dolot sa Kagurangnan. Kahirasan iyan ni Moises sa karnerong binuno para sa ordenasyon. Inotob ni Moises an gabos na ipinagboot saiya nin Kagurangnan.

³⁰Kuminua si Moises nin kadikit kan lanang panlahid saka kadikit kan dugo na nasa altar dangan winirikan niya si Aaron asin an saiyang mga aking lalaki patin an saindang mga sulot na gubing. Sa paaging ini kinonsagra niya sinda asin an saindang mga gubing sa Kagurangnan.

³¹Sinabihan ni Moises si Aaron saka an mga aki kaini, “Daraha nindo an karne duman sa may pintoan kan Tabernakulo, labonan nindo asin kakanon kaiba kan tinapay na nasa basket na dolot para sa ordenasyon sosog sa ipinagboot nin Kagurangnan.

³²Tutongon nindo an matadang karne o tinapay.

³³Dai kamo maghale sa may pintoan kan Tabernakulo sa laog nin pitong aldaw sagkod na matapos an seremonya kan pag-orden saindo.

³⁴Pinagbotan kita nin Kagurangnan na gibohon an ginibo ta ngunyan na aldaw tanganing mahale an saindong kasalan.

³⁵Kaya sa laog nin pitong aldaw saka banggi, dai kamo maghale sa may pintoan kan Tabernakulo; padagos na gibohon nindo an ipinagboot nin Kagurangnan, tanganing dai kamo magadan. Iyo iyan an ipinagboot sako nin Kagurangnan.”

³⁶Kaya ginibo ni Aaron saka kan saiyang mga aki an gabos na ipinagboot nin Kagurangnan ki Moises.