Read Central Bicolano Jeremiah 10 Bible Online

Jeremiah 10 - Central Bicolano bible

Jeremiah 10

¹Banwaan nin Israel, hinanyoga nindo an mensahe saindo nin Kagurangnan.

²Nagsabi siya, “Dai nindo pag-arogon an gibo kan ibang mga nasyon; dai kamo matakot sa mga tanda na nahihiling sa kalangitan, maski natatakot kaiyan an ibang mga nasyon.

³An sinasamba kan mga tawong ini mayo nin halaga. Kahoy iyan na pinalod sa kadlagan; inukitan kan kasangkapan kan paraukit

⁴dangan sinamnohan nin plata saka bulawan. Ipinako ninda iyan tanganing dai matumba.

⁵An mga dios-dios na siring kaiyan garo pantakot sa mga gamgam sa oma; dai iyan nakakataram; kaipuhan pasanon sinda huli ta dai sinda nakakalakaw. Dai kamo matakot sainda huli ta dai sinda makakagibo nin maraot, ni makakagibong marahay.”

⁶Kagurangnan, mayo nin makakaarog saimo; mapangyari ka, dakula saka mapangyari an saimong ngaran.

⁷Siisay an dai matatakot saimo, O Hade kan mga nasyon? Maninigo kang katakotan. Mayo nin makakaarog saimo sa gabos na madodonong sa mga nasyon, o sa arin man sa saindang mga hade.

⁸Gabos sinda mangmang saka lolong. Ano an naaadalan ninda sa kahoy na mga dios?

⁹An saindang mga dios napapatos nin plata na hale sa Espanya asin nin bulawan na hale sa Ufaz, an gabos ginibo kan mga paraukit asin kan mga panday; nagugubingan an mga iyan nin telang kolor lila saka purpura na hinabol nin mga ekspertong parahabol.

¹⁰Alagad ika, Kagurangnan, an totoong Dios, ika an Dios na buhay, an hade na mayo nin kataposan. Nagtatakig an kinaban kun ika naaanggot, dai natatagalan kan mga nasyon an saimong kaanggotan. (

¹¹Sabihan nindo sinda na raraoton an mga dios-dios na bakong kaggibo kan daga saka langit. Mapapara sinda sa daga.)

¹²Ginibo nin Kagurangnan an daga huli kan saiyang kapangyarihan; huli kan saiyang kadonongan linalang niya an kinaban, asin huli kan saiyang pakasabot biniklad niya an kalangitan.

¹³Sa pagboot niya minahagubohob an mga tubig sa kaitaasan; tinitipon niya an mga panganoron hale sa mga poro kan daga. Pinapasilyab niya an kikilat sa tahaw kan uran asin pinapaluwas niya an doros hale sa saiyang mga sarayan.

¹⁴Sa paghiling kaiyan, namamatean nin mga tawo na sinda mangmang saka mayo nin pakaaram. Napapasopog an lambang panday na naggigibo nin mga dios-dios huli ta an mga dios ninda bakong totoo asin mayo nin buhay.

¹⁵An mga dios-dios na iyan mayo nin halaga asin dapat na pag-olog-ologon; mapapara sinda pag-abot kan saindang kapadusahan.

¹⁶Bakong arog sainda an Dios ni Jacob; siya an naglalang kan gabos na bagay, asin pinili niya an Israel na magin sadiri niyang banwaan. Kagurangnan nin mga hukbo an saiyang ngaran.

¹⁷Mga taga Jerusalem, napapalibotan na kamo! Tiriponon na nindo an saindong mga rogaring.

¹⁸Itatapok kamo nin Kagurangnan sa luwas kan dagang ini; roronoton niya kamo sagkod na mayo na saindo nin matada. An Kagurangnan an nagtaram.

¹⁹Nag-agrangay an mga taga Jerusalem, “Makulog nin marahay an samong padusa! Dai na mabobolong an samong mga lugad. Paghona mi matitios nyamo ini!

²⁰Raot na an samong mga tolda; nagkaparatod na an mga lubid kaini. Mayo na an gabos ming aki; mayo na nin natadang matugdok giraray kan samong mga tolda; mayo na nin masabit kan mga kurtina.”

²¹Nagsimbag ako, “Mangmang an satong mga lider; dai sinda nakihumapot sa Kagurangnan. Kaya dai sinda nag-uswag, asin nawarak an satong banwaan.

²²Paghinanyog! Igwang nag-abot na bareta! Igwa nin dakulang karibokan sa sarong nasyon sa amihan; an saindang hukbo iyo an maraot kan mga syudad nin Juda asin ini magigin sarong desyerto, sarong lugar saen pag-eerokan kan mga lalaw na ayam.”

²³Kagurangnan, naaraman ko na an tawo bakong kagurangnan kan sadiri niyang aabotan; bakong kapot nin tawo an sadiri niyang buhay.

²⁴Padusahan mo an saimong banwaan, O Kagurangnan, alagad kan maninigo sana samo. Giboha iyan bakong sa kaanggotan, huli ta tibaad iyan an magin samuyang kataposan.

²⁵Iula mo an labi-labi mong kaanggotan sa mga nasyon na dai nagmimidbid saimo, asin sa mga tawo na dai nag-aapod kan saimong ngaran. Ginadan ninda an saimong banwaan; rinonot nanggad ninda kami asin binayaan nindang raot an samong daga.