Read Central Bicolano Jeremiah 13 Bible Online

Jeremiah 13 - Central Bicolano bible

Jeremiah 13

¹Tinaraman ako nin Kagurangnan na maglakaw saka magbakal nin habay na lino, dangan ihagkos ko iyan, alagad tinaraman niya ako na dai ko iyan pagdumogon.

²Kaya nagbakal ako nin habay saka ihinagkos ko.

³Dangan kinaolay giraray ako nin Kagurangnan. Nagsabi siya,

⁴“Magduman ka sa Salog nin Eufrates asin itago mo an habay sa sarong labot sa kagapoan.”

⁵Kaya nagduman ako saka itinago ko an habay harani sa Eufrates.

⁶Pakalihis nin nagkapirang aldaw tinaraman ako nin Kagurangnan na magbalik sa Eufrates saka kuahon an habay.

⁷Kaya nagbalik ako sa Eufrates, dangan kan makua ko an lugar na pinagtagoan ko kan habay, nahiling ko na raot na an habay saka dai na pwedeng pakinabangan.

⁸Kinaolay giraray ako nin Kagurangnan. An sabi niya,

⁹“Siring kaiyan an gigibohon kong paglaglag sa kapalangkawan nin Juda asin sa dakulang kapalangkawan nin Jerusalem.

¹⁰An mga maraot na tawong ini habong magkuyog sako. Orog sindang nagmatagas saka orog na nagin maraot. Nagsamba sinda saka naglingkod sa mga dios-dios. Kaya makakaarog sinda sa habay na mayo na nin pakinabang.

¹¹Siring kan habay na minahusto sa habayan, binoot kong maigot na mamugol sako an mga taga Israel saka an mga taga Juda. Ginibo ko ini tanganing sinda magin sakong banwaan saka magdara sinda nin kaomawan asin kamurawayan sa sakong ngaran; alagad habo ninda akong kuyogon.”

¹²Tinaraman ako nin Kagurangnan Dios, “Jeremias, sabihan mo an banwaan nin Israel na an lambang tapayan dapat na panoon nin arak. Masimbag sindang aram ninda na an lambang tapayan para sa arak dapat panoon nin arak.

¹³Dangan sabihan mo sinda na ako, an Kagurangnan, an mapano sa gabos na nag-eerok sa dagang ini nin arak sagkod na maburat sinda; sa mga hade, na mga kapagarakian ni David, sa mga padi, sa mga propeta, saka sa gabos na taga Jerusalem.

¹⁴Dangan pagtatarangkoon ko sinda na garo mga tapayan sagkod na maronot sinda gabos, gurang man o aki. Dai ako maheherak sainda maski kadikit.”

¹⁵Banwaan nin Israel, nagtaram an Kagurangnan! Magpakumbaba ka asin maghinanyog saiya.

¹⁶Omawon nindo an Kagurangnan na saindong Dios, bago niya darahon an kadikloman, asin madapa kamo sa kabubuldan; bago niya gibohon na mahibog na kadikloman an liwanag na saindong pinaglalaoman.

¹⁷Alagad kun dai kamo maghinanyog, hilom akong magtatangis huli kan saindong kapalangkawan; mapait na matangis ako, asin mabulos an sakong luha huli ta nabihag an banwaan nin Kagurangnan.

¹⁸Tinaraman ako nin Kagurangnan, “Sabihan mo an hade asin an saiyang ina na bumaba sa saindang trono, huli ta nahale na sa saindang payo an magagayon nindang korona.

¹⁹An mga banwa sa habagat na parte nin Juda napapalibotan na; mayo na nin makakalaog duman. Dinarang bihag an gabos na taga Juda tanganing itapok.”

²⁰Hilinga, Jerusalem! Nagdadangadang na an saimong mga kaiwal hale sa amihan! Haen na an mga tawong ipinapaniwala saimo, an banwaan na ipinag-orgulyo mo?

²¹Ano an sasabihon mo kun sakopon ka saka pinaghadean kan mga tawong pinaghohona mong mga katood? Makukulogan ka arog sa sarong babaeng nangangaki.

²²Kun maghapot ka kun tadaw ta nangyari ini saimo—kun tadaw ta ginirisi an saimong gubing asin linupigan ka—ini huli kan magabat mong kasalan.

²³Maliliwat daw nin sarong maitom na lalaki an kolor kan saiyang kublit o nin leopardo an saiyang patak-patak? Kun mahimo ninda iyan, makakanood na man ika na maggibo nin matanos, ika na mayong ibang aram na gibo kundi karatan.

²⁴Iwawarak ka nin Kagurangnan arog kan dagami na ipinapalid kan doros na hale sa desyerto.

²⁵Sinabi niya na iyan an saimong aabotan. Gigibohon niya iyan saimo huli ta liningawan mo siya asin nagsarig ka sa bakong totoong mga dios.

²⁶An Kagurangnan mismo an magisi kan saimong gubing asin mahayag saimo sa kasosopgan.

²⁷Nahiling niya na ginigibo mo an mga bagay na kinakaongisan niya. Nahiling niya na nagduduman ka sa kabubuldan asin sa kaomahan sa pagsunod sa mga paganong dios-dios, arog sa sarong lalaki na nagmamawot sa agom kan saiyang kapwa, patin arog sa sarong lalaking kabayo na naghihirihiri kun nahihiling an babaeng kabayo. Herak man saimo, Jerusalem! Nuarin ka magigin malinig nanggad?