Read Central Bicolano Jeremiah 16 Bible Online

Jeremiah 16 - Central Bicolano bible

Jeremiah 16

¹Nagtaram giraray sako an Kagurangnan. An sabi niya,

²“Dai ka mag-agom ni magkaigwa nin mga aki sa lugar na ini.

³Sasabihan taka kan mangyayari sa mga aking mamumundag digdi saka sa saindang mga magurang.

⁴Magagadan sinda huli sa makangingirhat na mga helang, saka mayo nin matangis ni malubong sainda. An saindang mga bangkay garo odo na matatambak sa daga. Magagadan sinda sa gera saka sa gutom, dangan an saindang mga bangkay magigin kakanon kan mga gamgam asin kan mga lalaw na hayop.

⁵“Kaipuhan na dai ka maglaog sa sarong harong na igwa nin nagtatangis. Dai ka magmondo para sa kiisay man. Hinale ko na sa sakong banwaan an sakong katoninongan, an danay kong pagkamoot saka pagkaherak.

⁶An mayaman saka an dukha magagadan sa dagang ini; dai sinda ilulubong ni tatangisan. Mayo nin siisay man na malugad kan saiyang sadiri ni maaris kan saiyang buhok tanganing ipahiling an saiyang pagmondo para sainda.

⁷Mayo na nin makakan o mainom na kahampang kan tawong nawaraan nin sarong namomotan sa buhay. Mayo na nin makikidamay maski sa sarong nagadanan nin ama o ina.

⁸“Dai ka maglaog sa harong na igwa nin nagbabangkete. Dai ka magtukaw sa kaibahan ninda tanganing magkakan saka mag-inom.

⁹Ako an Kagurangnan nin mga hukbo, an Dios nin Israel; hinanyoga an sakong sasabihon: Paoontokon ko sa lugar na ini an mga tingog nin kaogmahan asin kagayagayahan saka an maogmang tingog kan mga bagong kasal. An pagkaotob kan mga bagay na ini mahihiling kan mga tawo digdi.

¹⁰“Kun sabihan mo sinda kan gabos na ini, hahapoton ka ninda kun tadaw ta nagpahayag ako na padusahan sinda nin magabat. Mahapot sinda kun anong krimen an naginibo ninda asin kun anong kasalan an ginibo ninda tumang sa Kagurangnan na saindang Dios.

¹¹Dangan taraman mo sinda na an Kagurangnan nagsabi, ‘Nagtalikod sako an saindong mga ginikanan dangan nagsamba sinda saka naglingkod sa mga dios-dios. Binayaan ninda ako saka dai ninda kinuyog an sakong mga katukdoan.

¹²Alagad mas maraot an ginibo nindo ki sa ginibo kan saindong mga ginikanan. Kamo gabos matatagas an payo asin mararaot. Dai kamo nagkukuyog sako.

¹³Kaya, itatapok ko kamo sa luwas kan dagang ini, sa sarong daga na dai nindo aram ni kan saindong mga ginikanan. Duman, aldaw-banggi kamong maglilingkod sa ibang mga dios asin dai ako maheherak saindo.’”

¹⁴Nagtataram an Kagurangnan, “Maabot an panahon na an mga tawo dai na manunumpa huli sako bilang buhay na Dios na nagluwas sa banwaan nin Israel hale sa Egipto.

¹⁵Embes kaiyan, manunumpa sinda huli sako bilang buhay na Dios na nagluwas sa banwaan nin Israel hale sa sarong daga sa amihan, asin hale sa gabos na nasyon na winarakan ko sainda. Ibabalik ko sinda giraray sa sadiri nindang daga, na itinao ko sa saindang mga ginikanan. Ako, an Kagurangnan, an nagtaram.”

¹⁶Nagtataram an Kagurangnan, “Mapadara ako nin dakul na parasira tanganing dakopon an mga tawong ini. Dangan mapadara ako nin dakul na paraayam tanganing hanapon sinda sa lambang bukid asin bulod, saka sa mga lungib sa kagapoan.

¹⁷Nahihiling ko an gabos nindang ginigibo. Mayo nin natatago sako; an mga kasalan ninda dai makakalampas sa sakong panhiling.

¹⁸Magbabayad sinda nin doble para sa saindang mga kasalan asin katampalasanan, huli ta dinigtaan ninda an sakong daga kan saindang mga dios-dios na arog sa mga bangkay na mayo nin buhay; pinano ninda an daga kan saindang mga bakong totoong dios.”

¹⁹Kagurangnan, ika an nag-iingat sako asin nagtataong kosog; tinatabangan mo ako sa panahon nin kasakitan. Hale sa mga poro kan kinaban madolok saimo an mga nasyon saka masabi, “An mga dios kan samong mga ginikanan gabos mayong halaga.

²⁰Makakagibo daw an tawo nin sadiri niyang mga dios? Dai! Kun gumibo siya, an mga iyan dai pwedeng magin totoong dios.”

²¹“Kaya,” an sabi nin Kagurangnan, “ngunyan asin sagkod lamang ipapaaram ko sa mga nasyon an sakong kapangyarihan asin an sakong kosog; maaaraman ninda na ako an Kagurangnan.”