Read Central Bicolano Jeremiah 17 Bible Online

Jeremiah 17 - Central Bicolano bible

Jeremiah 17

¹Nagsasabi an Kagurangnan, “Mga taga Juda, an saindong mga kasalan isinurat sa paagi kan lansang na pluma; inukit iyan nin sarong pang-ukit na dyamante sa saindong mga puso saka sa mga sungay kan saindong mga altar.

²Ginigiromdom kan saindong mga aki an mga altar asin an mga tanda na pinatindog para sa diosang si Asera, sa kataed nin lambang berdeng kahoy, asin sa ibabaw nin haralangkaw na bulod,

³saka sa kabukidan sa kahiwasan. Papabayaan kong makua kan saindong mga kaiwal an kayamanan saka mga rogaring nindo huli kan gabos nindong kasalan na saindong ginibo sa bilog nindong daga.

⁴Mapipiritan kamong isuko an daga na itinao ko saindo, asin papalingkodon ko kamo sa mga kaiwal nindo sa sarong daga na dai nindo aram, huli ta an sakong kaanggotan arog sa kalayo, asin maglalaad iyan sagkod lamang.”

⁵Nagtataram an Kagurangnan, “Kokondenaron ko an tawong minatalikod sako asin minasarig sa saiyang kapwa, sa kosog nin sarong tawo na magagadanon.

⁶Arog siya sa sarong sadit na kahoy sa desyerto, na nagtatalubo sa alang na daga, sa maasgad na daga, na mayo na nin ibang nagtatalubo. Mayo nin marahay na nangyayari saiya.

⁷“Alagad bebendisyonan ko an tawo na minasarig sako.

⁸Arog siya sa sarong kahoy na nagtatalubo harani sa sapa, na an mga gamot pasiring sa tubig. Dai ini natatakot sa pag-abot kan tig-init, huli ta nagdadanay na berde an saiyang mga dahon; mayo ini nin kahaditan kun mayo nin uran; padagos ining namumunga.

⁹“Siisay an makakasabot kan puso nin tawo? Mayo nin ibang arog kaiyan kadaya; grabe na an helang kaiyan asin dai na maoomayan.

¹⁰Ako, an Kagurangnan, an nagsisiyasat sa isip saka nagbabalo kan puso nin tawo. Tinatratar ko an lambang saro sosog sa saiyang pamumuhay, asin mga ginigibo.”

¹¹An tawong nagpapayaman sa paagi nin pandadaya, garo gamgam na naghihilomlom kan bako niyang sogok. Sa panahon nin saiyang kakosogan mawawara an saiyang kayamanan, asin sa saiyang kataposan magigin lolong siya.

¹²An satong Templo arog sa mamuraway na trono, na nagtitindog sa halangkaw na bukid magpoon pa kaidto.

¹³Kagurangnan, ika an paglaom nin Israel; mapapasopog an gabos na nagbaya saimo. Mapapara sinda arog sa ngaran na isinurat sa alpog, huli ta binayaan ka ninda, Kagurangnan, an burabod nin buhay na tubig.

¹⁴Kagurangnan, bolonga ako asin maoomayan ako; ligtasan ako asin magigin ligtas ako. Ika sana an inoomaw ko!

¹⁵Nagsabi sako an banwaan, “Haen an mga patakot kan Kagurangnan laban samo? Gibohon na niya iyan ngunyan!”

¹⁶Alagad, Kagurangnan, dai ko hinagad saimo na padarahan mo sinda nin kasakitan. Dai ako nagmamawot nin panahon nin kahorasaan para sainda. Kagurangnan, naaaraman mo ini; naaaraman mo an sinabi ko.

¹⁷Dai ka logod magin sarong katakotan para sako; ika an sakong pailihan sa aldaw nin kahorasaan.

¹⁸Sopogon mo an mga nagpapasakit sako, alagad iligtas mo ako, Kagurangnan. Raoton mo sinda, alagad dai mo ako pagtakoton. Darahan mo sinda nin kasakitan, asin ronoton mo sinda.

¹⁹Tinaraman ako nin Kagurangnan, “Jeremias, magduman ka asin ipahayag mo an sakong mensahe sa Trangkahan nin Banwaan, na inaagihan kan mga hade nin Juda kun sinda malaog saka maluwas sa syudad, dangan magduman ka sa gabos na trangkahan kan Jerusalem.

²⁰Sabihan mo an mga hade, an gabos na taga Juda asin an lambang nag-eerok sa Jerusalem, saka an naglalaog sa mga trangkahan na ini, na hinanyogon an sasabihon ko.

²¹Sabihan mo sinda na kun namomotan ninda an saindang buhay, dai nanggad sinda magdara nin anoman kun aldaw nin Sabbath; dai nanggad sinda magdara nin anoman kun malaog sinda sa mga trangkahan nin Jerusalem

²²o magdara nin anoman paluwas sa saindang mga harong kun aldaw nin Sabbath. Dai sinda magtrabaho kun Sabbath; ipaglehe ninda ini bilang sarong banal na aldaw siring kan ipinagboot ko sa saindang mga ginikanan.

²³An saindang mga ginikanan dai naghinanyog sako ni nagkuyog. Nagin matagas an saindang payo; habo nindang magdangog o magpatukdo sako.

²⁴“Sabihan mo an mga tawong ini na dapat nindang kuyogon an gabos kong pagboot. Dai nanggad sinda magdara nin anoman sa paglaog sa mga trangkahan kan syudad na ini kun Sabbath. Dapat nindang ipaglehe an Sabbath bilang sarong banal na aldaw asin dai nanggad sinda magtrabaho.

²⁵Dangan malaog sa mga trangkahan nin Jerusalem an saindang mga hade saka mga prinsipe na igwa nin kapangyarihan na pareho kan ki David. Kaiba kan mga taga Juda saka mga taga Jerusalem malunad sinda sa mga karwahe saka sa mga kabayo, asin an syudad nin Jerusalem magdadanay na pano nin tawo.

²⁶Maabot an mga tawo hale sa mga banwa nin Juda asin sa mga baryo sa palibot nin Jerusalem; maabot man an mga tawo hale sa teritoryo nin Benjamin, hale sa mga poon kan bulod, hale sa mga bukid, asin hale sa habagat na parte kan Juda. Madara sinda sa sakong templo nin mga tinutong na atang asin mga sakripisyo, mga dolot na pagkakan saka insenso, patin mga dolot nin pasasalamat.

²⁷Alagad dapat na kuyogon ninda ako, asin ipaglehe ninda an Sabbath bilang sarong banal na aldaw. Dai nanggad sinda magdara nin anoman sa paglaog sa mga trangkahan nin Jerusalem sa aldaw na iyan. Kun dai, susuloon ko an mga trangkahan nin Jerusalem. Masusulo an mga palasyo nin Jerusalem, asin mayo nin siisay man na makakasigbo kan kalayo.”