Read Central Bicolano Jeremiah 18 Bible Online

Jeremiah 18 - Central Bicolano bible

Jeremiah 18

¹Tinaraman ako nin Kagurangnan,

²“Magduman ka sa harong kan paragibo nin koron, asin duman ko itatao saimo an sakong mensahe.”

³Kaya nagduman ako asin nahiling ko an paragibo nin koron na nagtatrabaho sa saiyang hormahan.

⁴Kun nararaot an ginigibo niyang koron, kinukua niya an laboy saka minagibo siya nin bago.

⁵Dangan tinaraman ako nin Kagurangnan,

⁶“Dai ko daw magigibo saindo, mga taga Israel, an ginibo sa laboy kan paragibo nin koron? Nasa kamot ko kamo, arog kan laboy sa kamot kan paragibo nin koron.

⁷Kun nagtaram ako sa sarong panahon na sakong gagaboton, ibabagsak o raraoton an arin man na nasyon o kahadean,

⁸alagad an nasyon na iyan magtalikod sa saiyang kasalan, dai ko idadagos an sinabi kong gigibohon ko.

⁹Alagad kun magtaram ako na sakong itatanom o papatindogon an arin man na nasyon o kahadean,

¹⁰alagad an nasyon na iyan dai magkuyog sako asin maggibo nin karatan, dai ko idadagos an sinabi kong gigibohon ko.

¹¹Kaya ngunyan, sabihan mo an mga taga Juda asin mga taga Jerusalem na igwa ako nin pinaplano laban sainda asin nag-aandam akong padusahan sinda. Sabihan mo sinda na ontokon na ninda an maraot nindang pamumuhay—na bagohon na ninda an saindang mga gawe asin an saindang mga ginigibo.

¹²Masimbag sinda, ‘Dai, tadaw ta magbabago kami? Susundon mi an sadiri nyamong plano asin gabos kami magibo sosog sa katagasan kan maraot nyamong mga puso!’”

¹³Nagtataram an Kagurangnan, “Hapoton mo an lambang nasyon kun may nangyari nang siring kaini kaidto. An banwaan nin Israel guminibo nin sarong mangirhat na bagay!

¹⁴Nahahalean daw nin yelo an magapong kabukidan nin Lebanon? Nagmamara daw an malipot na mga sapa kaiyan?

¹⁵Alagad liningawan ako kan sakong banwaan; nagtututong sinda nin insenso sa mga dios-dios. Nagkadarapa sinda sa dalan na dapat nindang lakawan; dai na ninda sinusunod an dating mga agihan; naglalakaw sinda sa mga dalan na dai pa pinag-aagihan.

¹⁶An dagang ini ginibo nindang sarong bagay na katakotan, na dapat na isikwal sagkod lamang. An gabos na maaragi digdi magkakamorongnan huli sa mahihiling ninda; magkokoyongkoyong sinda sa pagngalas.

¹⁷Iwawarak ko an sakong banwaan sa atubang kan saindang mga kaiwal, arog sa alpog na ipinapalid kan doros hale sa sirangan. Tatalikodan ko sinda; dai ko sinda tatabangan sa panahon nin saindang kasakitan.”

¹⁸Dangan nagsabi an mga tawo, “Magplano kita laban ki Jeremias. Danay na magkakaigwa nin mga padi na magtutukdo sato, mga madonong na maghuhulit sato, asin mga propeta na magpapahayag kan mensahe nin Dios. Idemanda ta siya asin dai na kita magdangog kan mga sinasabi niya.”

¹⁹Kaya namibi ako, “Kagurangnan, hinanyoga an sinasabi ko saka dangoga an mga sinasabi kan sakong mga kaiwal manongod sako.

²⁰An karatan iyo daw an bayad sa karahayan? Alagad nag-andam sinda nin kalot na paghuhulogan ninda sako. Giromdoma kun paano ako nagtindog sa atubangan mo asin nakiolay para sainda, tanganing dai mo ipamate sainda an saimong kaanggotan.

²¹Alagad ngunyan, Kagurangnan, pabayaan mong magadan sa gutom an saindang mga aki; magadan logod sinda sa gera. Pabayaan mong mawaraan nin agom saka mga aki an mga babae; magadan logod sa helang an mga lalaki saka magadan sa gera an mga hoben nindang lalaki.

²²Magpadara ka nin mga tawo na mayo nin patanid na masamsam kan saindang mga harong; pakurahawa sinda sa takot. Nagkalot sinda tanganing mahulog ako asin nagbugtak sinda nin mga litag tanganing madakop ako.

²³Alagad, Kagurangnan, naaaraman mo an gabos nindang plano tanganing gadanon ako. Dai mo patawadon an saindang karatan ni pagparaon an saindang kasalan. Pabayaan mong madaog sinda sa atubangan mo; gibohon mo ini sainda sa panahon nin saimong kaanggotan.”