Read Central Bicolano Jeremiah 19 Bible Online

Jeremiah 19 - Central Bicolano bible

Jeremiah 19

¹Tinaraman ako nin Kagurangnan na magbakal nin sarong tapayan. Sinabihan man niya ako na apodon ko an nagkapira sa kamagurangan kan banwaan asin nagkapira sa gurang nang mga padi,

²dangan ipag-iba sinda sa Kapantayan nin Hinnom, pakaluwas sa Trangkahan kan Paragibo nin Koron. Ipapahayag ko duman an mensahe na itatao niya sako.

³Tinaraman niya ako na magsabi, “Hinanyoga nindo, mga hade nin Juda asin mga taga Jerusalem, an sasabihon ko, an Kagurangnan nin mga hukbo, an Dios nin Israel. Dadarahan ko nin kasakitan an lugar na ini, asin mabibigla an gabos na makakadangog kaini.

⁴Gigibohon ko ini huli ta binayaan ako kan banwaan asin dinigtaan ninda an lugar na ini sa pagdolot ninda digdi nin mga sakripisyo sa ibang mga dios, na dai man ninda midbid, ni kan saindang mga ginikanan asin kan mga hade nin Juda. Pinano ninda an lugar na ini nin dugo kan mga tawong mayo nin sala.

⁵Nagtugdok sinda nin mga altar para ki Baal tanganing tutongon an saindang mga aki bilang sakripisyo. Dai ko ipinagboot na gibohon ninda ini; dai lamang iyan naglaog sa sakong isip.

⁶Kaya maabot an panahon na dai na aapodon Tofet o Kapantayan nin Hinnom an lugar na ini. Embes kaiyan, aapodon ining Kapantayan na Pinaggagadanan.

⁷Sa lugar na ini hahalean ko nin halaga an mga plano kan mga taga Juda saka mga taga Jerusalem. Ipapadaog ko sinda asin ipapagadan sa saindang mga kaiwal. An saindang mga bangkay itatao ko sa mga gamgam saka sa mga lalaw na hayop bilang kakanon.

⁸Dadarahon ko sa lugar na ini an sarong makangingirhat na pagkagaba, kaya an siisay man na mag-agi digdi mamomongnan saka magngangalas.

⁹An syudad papalibotan kan mga kaiwal asin hihingowahon nindang gadanon an mga tawo. Magigin makuri an pagkalaom sa syudad kaya kakakanon kan mga tawo digdi an saindang kapwa sagkod an sadiri nindang mga aki.”

¹⁰Dangan tinaraman ako nin Kagurangnan na pasaon an tapayan sa atubangan kan mga lalaking nag-iba sako,

¹¹asin sabihan sinda na nagtaram an Kagurangnan nin mga hukbo, “Papasaon ko an mga tawo saka an syudad na ini, asin makakaarog sinda sa pasang tapayan na ini na dai na mabibilog giraray. An mga gadan ilulubong maski sa Tofet huli ta mayo na nin ibang lugar na pwedeng paglubongan sinda.

¹²Ako nanunuga na iaarog ko sa Tofet an syudad na ini asin an mga nag-eerok digdi.

¹³Magigin maati arog kan Tofet an mga harong sa Jerusalem, an mga harong kan mga hade sa Juda asin an gabos na harong, huli ta an bubong kan mga ini ginagamit ninda sa pagtutong nin insenso para sa mga bitoon asin sa pag-ula nin arak bilang dolot na inomon sa ibang mga dios.”

¹⁴Naghale ako sa Tofet na pinadumanan sako nin Kagurangnan tanganing ipahayag ko duman an saiyang mensahe. Dangan nagduman ako saka nagtindog sa patyo kan Templo asin sinabihan ko an gabos na tawo

¹⁵na an Kagurangnan nin mga hukbo, an Dios nin Israel, nagtaram nin siring, “Dadarahan ko an syudad na ini asin an lambang haraning banwa kan gabos na padusa na ipinahayag kong gigibohon ko, huli ta matagas an saindong mga payo saka habo nindong hinanyogon an mga sinasabi ko.”