Read Central Bicolano Jeremiah 20 Bible Online

Jeremiah 20 - Central Bicolano bible

Jeremiah 20

¹Kan madangog kan padi na si Pasur, na aking lalaki ni Immer asin pangenot na opisyal kan Templo, na nagpopropesiya ako kan mga bagay na ini,

²ipinahampak niya ako, asin pinakadenahan sa harani kan itaas na Trangkahan nin Benjamin sa Templo.

³Pagkaaga, kan halean na ako ni Pasur kan kadena, sinabihan ko siya, “Bakong Pasur an inginaran saimo kan Kagurangnan, kundi ‘Takot sa Gabos na Lugar.’

⁴An Kagurangnan mismo nagtaram, ‘Gigibohon takang katakotan kan saimong sadiri asin kan saimong mga katood. Mahihiling mo an pagkagadan ninda sa paagi nin espada kan mga kaiwal. Ipapairarom ko an gabos na taga Juda sa kapangyarihan kan hade nin Babilonia; dadarahon kaini an iba bilang mga bihag sa saiyang daga asin an iba gagadanon niya.

⁵Papabayaan kong masamsam kan mga kaiwal ninda an gabos na kayamanan kan syudad na ini asin masadiri an gabos na rogaring ninda, maski na an mga kayamanan kan mga hade nin Juda. An gabos na bagay dadarahon ninda sa Babilonia.

⁶Ika, Pasur, sagkod an saimong pamilya dadakopon saka dadarahon sa Babilonia. Duman kamo magagadan saka ilulubong, kaiba an gabos mong katood na sinabihan mo nin mga kaputikan.’”

⁷Kagurangnan, dinaya mo ako, asin ako nadaya mo. Mas makosog ka ki sa sako, asin dinaog mo ako. Nagin ngingisihan ako sa bilog na aldaw; pinag-oolog-olog ako kan lambang saro.

⁸Kun ako minataram, kaipuhan kosogon ko an sakong tingog saka kumurahaw, “Kadahasan! Pagkagaba!” Kagurangnan, tinutuyatuya ako asin dinudusta sa gabos na panahon huli ta ipinapahayag ko an saimong tataramon.

⁹Alagad kun minasabi ako, “Lilingawan ko an Kagurangnan saka dai na ako mataram sa saiyang ngaran,” garo kalayong naglalaad sa puso ko an saimong tataramon. Hiningowa ko nanggad na itago iyan, alagad dai ko na iyan mapupugol.

¹⁰Nadadangog kong naghihinghing an lambang saro, “An katakotan yaon sa gabos na lugar! Kaya isumbong ta siya sa mga awtoridad!” Maski an harani kong mga katood nagmamawot kan sakong kapahamakan. “Tibaad pwede siyang madaya,” an sabi ninda; “dangan madadakop saka mababalos ta siya.”

¹¹Alagad ika, Kagurangnan, kasurog taka; makosog ka saka mapangyari; an mga naglalamag sako magkakadarapa. Mawawaran sinda nin onra sagkod lamang huli ta dai sinda manggagana. An pagkawara kan saindang onra dai nanggad malilingawan.

¹²Alagad, Kagurangnan nin mga hukbo, matanos mong binabalo an mga tawo; naaaraman mo an nasa saindang mga puso saka isip. Kaya pabayaan mong mahiling ko an pagbalos mo sa sakong mga kaiwal, huli ta ibinugtak ko sa saimong mga kamot an sakong ipinaglalaban.

¹³Awitan nindo an Kagurangnan! Omawon nindo an Kagurangnan! Iliniligtas niya an mga api sa kamot kan mga maraot na tawo.

¹⁴Maldisyonon logod an aldaw kan sakong pagkamundag! Malingawan logod an aldaw na inaki ako kan sakong ina!

¹⁵Maldisyonon logod an tawo na nagpaogma sa sakong ama kan darahon niya saiya an bareta, “Lalaki an aki mo!”

¹⁶An tawong idto magin arog logod sa mga syudad na mayong herak na rinaot nin Kagurangnan. Mga pagtangis logod an madangog niya sa pagkaaga asin kurahaw nin gera sa pagkaodto,

¹⁷huli ta dai niya ako ginadan bago ako namundag. Nagin lulubngan ko kutana an tulak kan sakong ina.

¹⁸Tadaw ta namundag ako? Iyan daw tanganing mamatean ko an kapagalan saka kamondoan, asin taposon an buhay sa kasosopgan?