Read Central Bicolano Jeremiah 23 Bible Online

Jeremiah 23 - Central Bicolano bible

Jeremiah 23

¹Makatatakot nanggad an padusa nin Kagurangnan sa mga pamayo na nagraraot saka nagwawarak kan saiyang banwaan!

²Iyo ini an itinaram nin Kagurangnan, an Dios nin Israel, manongod sa mga pamayo na dapat kutana nag-aataman kan saiyang banwaan: “Dai nindo inataman an banwaan ko; iwinarak nindo sinda saka isinubol sa harayo. Papadusahan ko kamo ngunyan huli kan karatan na saindong ginibo.

³Titiponon ko an natada sa sakong banwaan hale sa mga nasyon na tinapokan ko sainda. Ibabalik ko sinda sa dagang namundagan ninda dangan mag-aaki giraray sinda saka madakul.

⁴Mapili ako nin mga pamayo na mag-aataman sainda. An sakong banwaan dai na nanggad matatakot ni matitikbahan; mayo na nin mawawara sainda. Ako, an Kagurangnan, an nagtaram.”

⁵Nagsasabi an Kagurangnan, “Maabot an panahon na pipilion ko an sarong matanos na kapagarakian ni David tanganing magin hade. May kadonongan niyang paghahadean an bilog na daga dangan gigibohon niya an tama asin matanos.

⁶Magigin ligtas an Juda sa panahon nin saiyang paghahade, asin an Israel mamumuhay na matiwasay. Aapodon siya sa ngaran na ‘An Kagurangnan Samong Kaligtasan.’

⁷“Maabot an panahon”, an sabi nin Kagurangnan, “na an mga tawo dai na manunumpa huli sako bilang an buhay na Dios na nagluwas kan banwaan nin Israel hale sa daga nin Egipto.

⁸Embes kaiyan, manunumpa sinda huli sako bilang an Dios na buhay na nagluwas kan banwaan nin Israel hale sa daga sa amihan asin hale sa gabos na nasyon na winarakan ko sainda. Dangan mag-eerok sinda sa sadiri nindang daga.”

⁹Ronot na an sakong puso, saka nagtatakig ako. Huli sa Kagurangnan, huli kan banal niyang mga tataramon, garo ako sarong burat, sarong tawo na sobra an ininom na arak.

¹⁰An daga pano nin tawo na bakong maimbod sa Kagurangnan; namumuhay sinda sa karatan asin bakong marahay an paggamit ninda kan saindang kapangyarihan. Huli kan maldisyon nin Kagurangnan nagmomondo an daga asin alang na an mga pasabsaban.

¹¹Nagsasabi an Kagurangnan, “Bakong diosnon an mga propeta asin an mga padi; maski sa sakong Templo nahiling ko an saindang katampalasanan.

¹²Kaya an mga dalan na saindang linalakawan magigin mahalnas saka madiklom; magkakasiringkog sinda saka magkakaturumba. Papadarahan ko sinda nin kasakitan; an oras nin pagpadusa sainda nagdadangadang na. Ako, an Kagurangnan, an nagtaram.

¹³Nahiling ko an kasalan kan mga propeta nin Samaria: nagpropesiya sinda sa ngaran ni Baal asin linagalag ninda an sakong banwaan.

¹⁴Alagad orog pa an karatan na ginigibo kan mga propeta sa Jerusalem: nakikidorog sinda sa bako nindang agom saka nagtataram nin mga kaputikan; tinatabangan ninda an mga tawo sa paggibo nin maraot, kaya mayo nin minaontok sa paggibo nin karatan. Para sako, gabos sinda maraot arog kan mga taga Sodoma saka mga taga Gomorra.

¹⁵“Kaya iyo ini an sinasabi ko, an Kagurangnan nin mga hukbo, manongod sa mga propeta nin Jerusalem: Pakakakanon ko sinda nin mapait na mga tinanom asin paiinomon ko sinda nin hudong, huli ta iwinarak ninda an bakong diosnon na pamumuhay sa bilog na daga.”

¹⁶Nagtaram an Kagurangnan nin mga hukbo sa mga taga Jerusalem, “Dai nindo pagdangogon an mga sinasabi saindo kan mga propeta; nagtutukdo sinda saindo kan mga paglaom na mayo nin halaga. Nagtataram sinda nin mga bisyon na hale sa sadiri nindang kaisipan asin bakong hale sako.

¹⁷Sa mga tawong habong maghinanyog kan sakong tataramon, danay na sinasabi ninda na marahay an mangyayari sa sainda. Sa mga matagas an payo sinasabi ninda na mayong maraot na mangyayari sa sainda.”

¹⁸Nagsabi ako, “Mayong saro sa mga propetang ini nin nakaaram kan hilom na mga kaisipan nin Kagurangnan. Mayo sainda nin nakadangog ni nakasabot kan saiyang mensahe, o naghinanyog saka nagpahalaga kan saiyang tataramon.

¹⁹An saiyang kaanggotan sarong bagyo, sarong makosog na doros na mahampak sa payo kan mga tampalasan,

²⁰asin dai iyan maontok sagkod na dai pa niya matapos an boot niyang gibohon. Sa huring aldaw malinaw na masasabotan ini kan saiyang banwaan.”

²¹Nagtaram an Kagurangnan, “Dai ko sinugo an mga propetang ini, alagad nagralakaw sinda. Dai ko sinda tinawan nin mensahe, alagad nagtaram sinda sa sakong ngaran.

²²Kun aram ninda an hilom kong mga kaisipan, ikinahulit kutana ninda an mensahe ko sa sakong banwaan. Napatalikod kutana ninda an sakong banwaan sa maraot na pamumuhay saka sa mga karatan na ginigibo kaini.

²³“Ako an Dios na yaon maski saen, asin bakong sa saro sanang lugar.

²⁴Mayo nin siisay man na makakatago sa arin man na lugar na dai ko mahihiling. Dai nindo naaaraman na yaon ako maski saen na lugar sa langit saka sa daga?

²⁵Nadangog ko an sinabi kan mga propeta na nagpopropesiya nin kaputikan sa sakong ngaran saka nagsasabi na tinawan ko sinda kan sakong mensahe sa saindang mga pangatorogan.

²⁶Sagkod nuarin lalagalagon kan mga propetang iyan an sakong banwaan huli sa mga kaputikan na gibo-gibo ninda?

²⁷Naghohona sinda na an sinasabi nindang mga pangatorogan magigin dahelan kan pagkalingaw sako kan banwaan ko, siring na nalingaw sako an saindang mga ama asin nagdolok ki Baal.

²⁸Pabayae an propetang nangatorogan na magsabi kan saiyang pangatorogan, alagad tugote an propeta na nakadangog kan sakong mensahe na magin maimbod sa paghulit kaiyan. Ano an karahayan kan dagami kun ibaing sa trigo?

²⁹Arog sa kalayo an sakong mensahe saka arog sa martilyo na minaronot nin gapo.

³⁰Kaya laban ako sa mga propeta na nagkukua kan mga tataramon nin iba saka ipinapahayag iyan bilang sakong mensahe.

³¹Laban man ako sa mga propeta na nagtataram kan sadiri nindang mga tataramon saka nagsasabi na hale iyan sako.

³²Hinanyoga nindo an sinasabi ko! Laban ako sa mga propeta na nagtataram kan saindang mga pangatorogan na pano nin mga kaputikan. Ipinapangosip ninda an mga pangatorogan na ini saka linalagalag ninda an sakong banwaan huli kan saindang mga kaputikan asin kahambogan. Dai ko sinda sinugo ni pinagbotan na maglakaw. Mayo lamang sinda nin ikakatabang sa banwaan. Ako, an Kagurangnan, an nagtaram.”

³³Tinaraman ako nin Kagurangnan, “Jeremias, kun saro sa sakong banwaan o sarong propeta, o sarong padi an maghapot saimo, ‘Ano an mensahe nin Kagurangnan?’ Sabihan mo siya, ‘Saro kang pasanon nin Kagurangnan, asin isisikwal ka niya.’

³⁴Kun saro sa sakong banwaan o sarong propeta o sarong padi an maggamit kan mga tataramon na ‘an pasanon nin Kagurangnan’, papadusahan ko siya sagkod an saiyang pamilya.

³⁵Embes kaiyan, an dapat na ihapot nin lambang saro sa saiyang mga katood asin mga kadugo iyo, ‘Anong kasimbagan an itinao nin Kagurangnan? Ano an itinaram nin Kagurangnan?’

³⁶Kaya dai na nanggad nindo paggamiton an mga tataramon na ‘an pasanon nin Kagurangnan’, huli ta kun may maggamit kaiyan, gigibohon kong magin totoong pasanon niya an sakong mensahe. Biniko kan mga tawo an mga tataramon kan saindang Dios, an Dios na buhay, an Kagurangnan nin mga hukbo.

³⁷Jeremias, hapota an mga propeta, ‘Anong kasimbagan an itinao saindo nin Kagurangnan? Ano an sinabi nin Kagurangnan?’

³⁸Dangan kun dai sinda magkuyog kan sakong pagboot saka gamiton ninda an mga tataramon na ‘an pasanon nin Kagurangnan’, sabihan mo sinda na

³⁹pupuroton ko nanggad sinda saka itatapok sa harayo, sinda asin an syudad na itinao ko sainda saka sa saindang mga ginikanan.

⁴⁰Dadarahan ko sinda nin mayong kataposan na kasosopgan asin mayong kataposan na pagkawara nin onra, na dai malilingawan.”