Read Central Bicolano Jeremiah 24 Bible Online

Jeremiah 24 - Central Bicolano bible

Jeremiah 24

¹Ipinahiling sako nin Kagurangnan an duwang basket nin higera na nasa atubangan kan Templo. (Ini nangyari pakatapos na mabihag ni Hadeng Nebukadnezzar si Hadeng Jehoiakin nin Juda, na aking lalaki ni Jehoiakim, kaiba an mga lider nin Juda, an mga panday saka mga ekspertong trabahador, hale sa Jerusalem pasiring sa Babilonia.)

²An sarong basket igwa nin laog na mararahay na higera, na enot na naghirinog; an saro pang basket igwa nin laog na ralapang higera, na dai pwedeng kakanon huli ta nalapa nang marahay.

³Dangan nagtaram sako an Kagurangnan, “Jeremias, ano an nahihiling mo?” Nagsimbag ako, “Higera. An mararahay na higera totoong marahay, asin an nalapang higera, ralapa na nanggad, kaya dai na pwedeng kakanon.”

⁴Kaya tinaraman ako nin Kagurangnan,

⁵“Ako, an Kagurangnan, an Dios nin Israel; arog kan mararahay na higerang ini, ibibilang kong marahay an banwaan na dinarang bihag sa Babilonia.

⁶Babantayan ko sinda asin ibabalik sa dagang ini. Papatindogon ko sinda asin dai ko rurumpagon; itatanom ko asin dai ko sinda gagaboton.

⁷Itatao ko sainda an pusong mag-aako na ako iyo an Kagurangnan. Dangan magigin banwaan ko sinda, asin ako an magigin Dios ninda, huli ta mabalik sinda sako sa bilog nindang puso.

⁸“Alagad manongod ki Hadeng Zedekias nin Juda, sa saiyang mga lider, sa iba pang mga taga Jerusalem na nagpawalat sa dagang ini o nagduman sa Egipto—ako, an Kagurangnan, an matratar sainda siring sa ralapang higera na dai pwedeng kakanon.

⁹Papadarahan ko sinda nin kasakitan na sukat ikatakot kan gabos na nasyon sa kinaban. Pagngingisihan sinda kan mga tawo, gigibohon na subahan, pag-oolog-ologon asin gagamiton an saindang ngaran bilang sarong maldisyon sa lambang lugar na pagwawarakan ko sainda.

¹⁰Mapadara ako sainda nin gera, gutom, saka peste sagkod na mayo na nin matada sainda sa daga na itinao ko sainda asin sa saindang mga ginikanan.”