Read Central Bicolano Jeremiah 25 Bible Online

Jeremiah 25 - Central Bicolano bible

Jeremiah 25

¹Kan ikaapat na taon nin paghahade sa Juda ni Jehoiakim na aking lalaki ni Josias, uminabot sako an sarong mensahe nin Kagurangnan manongod sa gabos na taga Juda. (Ini an enot na taon kan paghahade ni Nebukadnezzar sa Babilonia.)

²Sinabihan ko an mga taga Juda saka mga taga Jerusalem,

³“Sa laog nin beynte y tres na taon, magpoon kan ikatreseng taon kan paghahade sa Juda ni Josias na aking lalaki ni Amon sagkod sa aldaw na ini, nagtaram sako an Kagurangnan, asin dai ako nagpabaya sa pagsabi saindo kan itinaram niya. Alagad dai kamo naghinanyog.

⁴Habo kamong magdangog ni magkuyog, maski nagpadagos sa pagpadara an Kagurangnan kan saiyang mga sorogoon, an mga propeta.

⁵Tinaraman ninda kamo na magtalikod na sa maraot nindong pamumuhay asin sa mga karatan na ginigibo nindo, tanganing magpadagos kamong nag-eerok sa daga na itinao saindo nin Kagurangnan asin sa saindong mga ginikanan bilang pamana sagkod lamang.

⁶Tinaraman ninda kamo na dai magsamba asin maglingkod sa mga dios-dios, asin na dai pagpaanggoton an Kagurangnan huli sa pagsamba sa ginibo nindong mga ladawan. Kun kinuyog nindo an Kagurangnan, dai niya kutana kamo pinadusahan.

⁷Alagad an Kagurangnan mismo an nagsasabi na nagsayuma kamong maghinanyog saiya. Pinaanggot nindo siya huli kan saindong mga ladawan asin dinara nindo sa saindong sadiri an saiyang padusa.

⁸“Kaya, huli ta habo kamong maghinanyog saiya, an Kagurangnan nin mga hukbo nagsasabi,

⁹‘Papasugoan ko an gabos na tawo sa amihan saka si Hadeng Nebukadnezzar nin Babilonia. Dadarahon ko sinda tanganing labanan an Juda, an mga nag-eerok digdi asin an gabos na kataraed na nasyon. Raraoton ko an nasyon na ini asin an saiyang mga kataraed dangan babayaan ko sindang raot sagkod lamang, sarong nakakabigla saka nakakatakot na tanawon. Ako, an Kagurangnan, an nagtaram.

¹⁰Paparaon ko sa sainda an mga tingog nin kaogmahan asin kagayagayahan, an maogmang tingog kan mga bagong kasal, an paggiling nin trigo, asin an liwanag kan ilaw.

¹¹An bilog na dagang ini papabayaan na raot asin magigin sarong tanawon na nakakatakot. Dangan an kataraed na mga nasyon maglilingkod sa hade nin Babilonia sa laog nin setentang taon.

¹²Pakatapos kaiyan papadusahan ko an Babilonia asin an saiyang hade huli kan saindang kasalan. Rurumpagon ko an nasyon na iyan saka papabayaan na raot sagkod lamang.

¹³Dadarahon ko sa Babilonia an gabos na kasakitan na sinabi kong dadarahon saiya—an gabos na kasakitan na nasusurat sa librong ini—na ipinagpropesiya ni Jeremias laban sa gabos na nasyon.

¹⁴Babayadan ko an mga taga Babilonia sosog sa saindang mga ginibo, kaya gigibohon sindang mga oripon kan dakul na nasyon saka darakulang hade.’”

¹⁵An Kagurangnan, an Dios nin Israel, nagtaram sako, “Uya an kalis na pano kan sakong kaanggotan. Darahon mo ini sa gabos na nasyon na papadumanan ko saimo saka painomon mo sinda.

¹⁶Pag-inom ninda, masayasay sinda saka mabubua huli kan gera na ipapadara ko sainda.”

¹⁷Kaya kinua ko an kalis na kapot nin Kagurangnan, saka pinainom ko an gabos na nasyon na pinadumanan niya sako.

¹⁸Pinainom ko sa kalis an Jerusalem, an gabos na banwa nin Juda, asin an mga hade saka an mga lider ninda tanganing magin sinda sarong desyerto, sarong makangingirhat saka makatatakot na tanawon, dangan tanganing an ngaran ninda gamiton kan mga tawo bilang sarong maldisyon—arog kan ginigibo ninda sagkod ngunyan.

¹⁹Uya an talaan kan iba pang mainom sa kalis: an hade nin Egipto, an saiyang mga opisyal saka mga lider; an gabos na Egipcio saka an gabos na dayuhan sa Egipto; an gabos na hade sa daga nin Uz; an gabos na hade kan Filisteong mga syudad nin Askelon, Gaza, Ekron, asin an natatada kan Asdod; an gabos na taga Edom, Moab, saka Ammon; an gabos na hade nin Tiro saka Sidon; an gabos na hade kan mga daga sa Mediteraneo; an mga syudad nin Dedan, Tema, asin Buz; an mga tawo na nagpuputol kan saindang buhok; an gabos na hade nin Arabia; an gabos na hade kan mga tribu sa desyerto; an gabos na hade nin Zimri, Elam, saka Media; an gabos na hade sa amihan, an nasa harayo saka nasa harani, pasunod-sunod sinda. An lambang nasyon sa ibabaw kan kinaban kaipuhan uminom sa kalis. An huring mainom diyan iyo an hade nin Babilonia.

²⁷Dangan tinaraman ako nin Kagurangnan, “Sabihan mo an mga tawo na ako, an Kagurangnan nin mga hukbo, an Dios nin Israel, nagboboot na mag-inom sinda sagkod na maburat saka magsuka, sagkod na matumba saka dai na makatindog, huli kan gera na ipapadara ko sainda.

²⁸Kun magsayuma sinda na kuahon an kalis sa saimong kamot asin dai mag-inom, sabihan mo sinda na an Kagurangnan nin mga hukbo nagtaram na kaipuhan uminom sinda sa kalis.

²⁹Popoonan ko an pagraot sa sadiri kong syudad. Naghohona daw sinda na dai sinda mapapadusahan? Papadusahan sinda huli ta mapadara ako nin gera sa gabos na tawo sa kinaban. Ako, an Kagurangnan nin mga hukbo, an nagtaram.

³⁰“Jeremias, dapat na ipahayag mo an lambang sinabi ko. Taraman mo nanggad an mga tawong ini, ‘An Kagurangnan maghahagubohob hale sa langit asin magdadaguldol hale sa kaitaasan nin langit. Maghahagubohob siya laban sa saiyang banwaan; magkukurahaw siya arog kan sarong tawo na nagtitimaktimak kan mga ubas. An lambang saro sa daga makakadangog saiya,

³¹asin an tingog niya mag-aaniningal sa mga poro kan kinaban. An Kagurangnan igwa nin sumbong laban sa mga nasyon. Malaog siya sa paghukom sa gabos na tawo asin gagadanon niya an mga tampalasan. An Kagurangnan an nagtaram.’”

³²An Kagurangnan nin mga hukbo nagsasabi na maabot an karatan sa lambang nasyon, asin sarong makosog na bagyo an nag-iitaas hale sa harayong mga poro kan kinaban.

³³Sa aldaw na iyan, magkakawararak magpoon sa sarong poro kan daga sagkod sa ibong na poro an mga bangkay kan mga tawong ginadan nin Kagurangnan. Dai sinda tatangisan, titiponon saka ilulubong; magigin sinda garo tambak nin odo sa ibabaw kan daga.

³⁴Maghaya kamo mga lider asin magtangis kamo nin makosog, kamong mga pastor kan sakong banwaan! Magmondo kamo saka magligid sa abo. Nag-abot na an aldaw nin paggadan saka pagwarak, asin bubunoon kamo arog sa mga lalaking karnero.

³⁵Mayo na nin paagi tanganing makadulag kamo.

³⁶Mag-aguro saka magkurahaw kamo sa kasakitan huli ta sa kaanggotan nin Kagurangnan ginaba niya an saindong nasyon saka binayaan niyang raot an matoninong nindong daga.

³⁸Binayaan nin Kagurangnan an saiyang banwaan arog kan pagbaya nin sarong leon sa saiyang lungib. Nagin desyerto an daga huli sa karingisan nin gera asin huli sa labi-labing kaanggotan nin Kagurangnan.