Read Central Bicolano Jeremiah 27 Bible Online

Jeremiah 27 - Central Bicolano bible

Jeremiah 27

¹Kan pagpoon kan paghahade sa Juda ni Zedekias na aking lalaki ni Josias, tinaraman ako nin Kagurangnan

²na maggibo nin lubid asin sakal dangan ibugtak ini sa sakong loong.

³Dangan tinaraman ako nin Kagurangnan na magpadara nin sarong mensahe sa mga hade nin Edom, Moab, Ammon, Tiro, saka Sidon sa paagi kan saindang mga sugo na nag-arabot sa Jerusalem tanganing makipaghilingan ki Hadeng Zedekias.

⁴Tinaraman ako nin Kagurangnan nin mga hukbo, an Dios nin Israel, na pagbotan sinda na iosip sa saindang mga hade na nagtaram an Kagurangnan:

⁵“Sa paagi kan dakula kong kapangyarihan asin kosog linalang ko an kinaban, an tawo, asin an gabos na hayop na nabubuhay sa daga, saka itinatao ko ini sa kiisay man na pinipili ko.

⁶Ako an nagbugtak kan gabos na nasyon na ini sa irarom kan kapangyarihan kan sakong sorogoon na si Hadeng Nebukadnezzar nin Babilonia, asin pinapaglingkod ko saiya maski an mga hayop.

⁷An gabos na nasyon maglilingkod saiya, sa saiyang aking lalaki asin sa saiyang makoapo sagkod na mag-abot an panahon kan pagbagsak kan sadiri niyang nasyon. Dangan maglilingkod an saiyang nasyon sa mapangyaring mga nasyon saka sa darakulang hade.

⁸“Alagad kun dai maglingkod ki Nebukadnezzar na hade nin Babilonia an arin man na nasyon o kahadean, asin dai magpairarom sa saiyang kapangyarihan, papadusahan ko an nasyon na iyan sa paagi nin gera, gutom saka peste sagkod na dai ko pa itinutugot ki Nebukadnezzar na raoton nanggad an nasyon na iyan.

⁹Dai kamo maghinanyog sa saindong mga propeta o sa kiisay man na nagsasabi na pwede niyang hulaan an maabot na panahon sa paagi nin mga pangatorogan o sa pag-apod kan mga kalag kan mga gadan o sa salamangka. Gabos sinda nagsasabi saindo na dai kamo magpairarom sa hade nin Babilonia.

¹⁰Dinadaya ninda kamo asin magigin dahelan iyan tanganing iharayo kamo sa saindong daga. Aalawon ko kamo asin mapapahamak kamo.

¹¹Alagad an nasyon na magpasakop sa hade nin Babilonia saka maglingkod saiya, tutugotan kong magdanay sa sadiri niyang daga, na mag-oma saka mag-erok diyan. Ako, an Kagurangnan, an nagtaram.”

¹²Isinabi ko an parehong mensahe ki Hadeng Zedekias nin Juda, “Magpasakop ka sa hade nin Babilonia. Paglingkodan mo siya asin an saiyang banwaan, dangan mabubuhay ka.

¹³Tano ta mapagadan ka asin an saimong banwaan sa gera, sa gutom o sa peste? Iyan an sinabi nin Kagurangnan na mangyayari sa arin man na nasyon, na habong maglingkod sa hade nin Babilonia.

¹⁴Dai ka maghinanyog sa mga propeta na nagsasabi saimo na dai ka maglingkod saiya. Dinadaya ka ninda.

¹⁵An Kagurangnan mismo an nagtaram na dai niya sinda sinugo, alagad putik na nagpopropesiya sinda sa saiyang ngaran kaya aalawon ka niya asin magagadan ka, kaiba an mga propeta na nagtataram saimo kan mga kaputikan na ini.”

¹⁶Dangan sinabihan ko an mga padi asin an mga tawo na nagtaram an Kagurangnan nin siring: “Dai kamo maghinanyog sa mga propeta na nagsasabi na an mga kayamanan kan Templo ibabalik hale sa Babilonia. Nagpuputik sinda saindo.

¹⁷Dai kamo magdangog sainda! Paglingkodan nindo an hade nin Babilonia asin mabubuhay kamo! Ano ta kaipuhan na magin sarong tambak nin mga raot an syudad na ini?

¹⁸Kun totoong mga propeta sinda saka yaon sainda an sakong mensahe, pabayae sindang makiolay sako, an Kagurangnan nin mga hukbo, na dai ko itugot na darahon sa Babilonia an mga kayamanan na nawalat sa Templo saka sa palasyo kan hade.” (

¹⁹Kan darahon ni Hadeng Nebukadnezzar sa Babilonia an hade nin Juda, si Jehoiakin na aking lalaki ni Jehoiakim, asin an mga ginagalangan na lalaki sa Juda saka sa Jerusalem, iwinalat niya an mga harigi, an bronseng tangke, an mga kariton, patin an nagkapira sa iba pang mga kayamanan kan Templo.)

²¹“Hinanyoga nindo an sinasabi ko manongod sa mga kayamanan na nawalat sa Templo asin sa palasyo kan hade sa Jerusalem:

²²An mga kayamanan na iyan dadarahon sa Babilonia saka magdadanay duman sagkod na mangnohon ko giraray iyan. Dangan ibabalik ko an mga kayamanan saka ibubugtak sa lugar na ini. Ako, an Kagurangnan, an nagtaram.”