Read Central Bicolano Jeremiah 29 Bible Online

Jeremiah 29 - Central Bicolano bible

Jeremiah 29

¹Nagsurat ako sa mga padi, sa mga propeta, sa mga lider kan banwaan, asin sa iba pang ipinatapok ni Nebukadnezzar sa Babilonia hale sa Jerusalem.

²Ginibo ko ini pakatapos na ipatapok si Hadeng Jehoiakin, an saiyang ina, an mga opisyal sa palasyo, an mga lider nin Juda saka Jerusalem, an mga panday, asin an mga ekspertong trabahador.

³Itinao ko an surat ki Elasa, na aking lalaki ni Safan, asin ki Gemarias, na aking lalaki ni Hilkias, na sinurugo ni Hadeng Zedekias nin Juda ki Hadeng Nebukadnezzar nin Babilonia. Siring kaini an laog kan sakong surat:

⁴“An Kagurangnan nin mga hukbo, an Dios nin Israel, nagtataram sa gabos na tawong itinugot niyang darahon ni Nebukadnezzar sa Babilonia hale sa Jerusalem:

⁵‘Magtugdok kamo nin mga harong dangan erokan nindo. Magtanom kamo asin kakanon nindo an bunga kaiyan.

⁶Mag-agom kamo saka magkaigwa nin mga aki. Paagomon nindo an saindong mga aki tanganing magkaigwa man sinda nin mga aki. Kaipuhan na magdakul kamo asin bakong magdikit.

⁷Magtrabaho kamo para sa karahayan kan mga syudad na pinadumanan ko saindo bilang mga bihag. Mamibi kamo sako para sainda, huli ta kun mag-uswag sinda, magigin mauswag man kamo.

⁸Ako, an Kagurangnan, an Dios nin Israel, nagpapatanid saindo na dai kamo magpadaya sa mga propeta na nag-eerok sa tahaw nindo o sa iba pa na nagsasabi na mahuhulaan ninda an maabot na panahon. Dai nindo pagpahalagahan an saindang mga pangatorogan.

⁹Nagsasabi sinda saindo nin mga kaputikan sa ngaran ko. Dai ko sinda sinugo. Ako, an Kagurangnan nin mga hukbo, an nagtaram.’

¹⁰“Nagtataram an Kagurangnan, ‘Pakatapos kan setentang taon sa Babilonia, dadalawon ko kamo. Ootobon ko an sakong panuga na ibalik kamo sa lugar na ini.

¹¹Ako sana an nakakaaram kan mga plano ko para saindo, mga plano na darahan kamo nin kaginhawahan asin bakong karatan, mga plano na tawan kamo nin paglaom sa saindong huring mga aldaw.

¹²Dangan maapod kamo, madolok saka mamimibi sako, asin dadangogon ko kamo.

¹³Mahanap kamo sako asin makukua nindo ako, huli ta bilog na puso nindo akong hahanapon.

¹⁴Makukua nanggad nindo ako, asin ibabalik ko saindo an saindong mga kayamanan. Titiponon ko kamo hale sa gabos na nasyon saka mga lugar na inalawan ko saindo, dangan ibabalik sa lugar na pinaghalean nindo bago kamo itinapok. Ako, an Kagurangnan, an nagtaram.’

¹⁵“Nagsasabi kamo na an Kagurangnan nagbugtak nin mga propeta diyan sa Babilonia.

¹⁶Hinanyoga nindo an sinasabi nin Kagurangnan manongod sa hade na nagtutukaw sa trono ni David, asin an manongod sa mga tawong nag-eerok sa syudad na ini, sa mga kadugo nindo na dai dinarang bihag kaiba nindo.

¹⁷An Kagurangnan nin mga hukbo nagsasabi, ‘Papadarahan ko sinda nin gera, gutom, asin peste; iaarog ko sinda sa ralapang higera na dai na pwedeng kakanon.

¹⁸Lalamagon ko sinda sa paagi nin gera, gutom, saka peste, asin an gabos na nasyon sa kinaban magkakatirikbahan dangan magkakatarakot sa mangyayari sainda. Sa gabos na nasyon na pagwawarakan ko sainda, pagsusubahan sinda kan mga tawo saka gagamiton an saindang ngaran bilang sarong maldisyon.

¹⁹Mangyayari ini sainda huli ta dai ninda kinuyog an mensahe na danay kong ipinapadara sainda sa paagi kan mga sorogoon kong mga propeta. Habo nanggad sindang maghinanyog.

²⁰Kamo gabos na itinapok ko sa Babilonia, hinanyoga nindo ako, an Kagurangnan.’

²¹“An Kagurangnan nin mga hukbo, an Dios nin Israel, nagtaram manongod ki Ahab na aking lalaki ni Kolaias saka manongod ki Zedekias na aking lalaki ni Maaseias, na nagpopropesiya nin mga kaputikan sa ngaran nin Kagurangnan. Nagtaram siya na itatao niya sinda sa kamot ni Nebukadnezzar na hade nin Babilonia. Gagadanon sinda kan hade sa atubangan nindo.

²²Kun boot kan mga itinapok sa Babilonia hale sa Jerusalem na maldisyonon an sarong tawo, masabi sinda, ‘Iarog ka logod nin Kagurangnan ki Zedekias saka ki Ahab, na buhay na isinugba sa kalayo kan hade nin Babilonia!’

²³Iyan an saindang aabotan huli ta naggibo sinda nin magabat na kasalan—nagdorog sinda sa bako nindang agom saka nagtaram nin mga kaputikan sa ngaran nin Kagurangnan. Tumang ini sa kabotan nin Kagurangnan; siya an saksi laban sainda. An Kagurangnan an nagtaram.”

²⁴Itinao sako nin Kagurangnan nin mga hukbo, an Dios nin Israel, an sarong mensahe para ki Semaias na taga Nehelam, na nagpadara kan surat niya sa gabos na taga Jerusalem saka sa padi na si Sofonias na aking lalaki ni Maaseias saka sa iba pang mga padi. Ini an sinurat ni Semaias ki Sofonias:

²⁶An Kagurangnan iyo an nagbugtak saimo bilang padi na kasalihid ni Jehoiada asin ika ngunyan an pamayong opisyal sa Templo. Katongdan mo na mabugtakan nin kadena saka lansang na kwelyo an liog kan lambang bua-bua na nagsasagin-sagin na propeta.

²⁷Tadaw ta dai mo ginibo ini ki Jeremias nin Anatot, na nagtataram sa mga tawo bilang sarong propeta?

²⁸Dapat siyang mapaontok huli ta nagtaram siya sa mga tawo sa Babilonia na mabibilanggo sinda duman sa haloy na panahon, asin na magtugdok sinda nin mga harong, mag-erok duman, magtanom, saka magkakan kan bunga kaiyan.”

²⁹An surat binasa sako ni Sofonias,

³⁰asin tinaraman ako nin Kagurangnan na

³¹padarahan an gabos na bilanggo sa Babilon kan mensaheng ini manongod ki Semaias: “Ako, an Kagurangnan, an mapadusa ki Semaias asin sa gabos niyang kapagarakian. Dai ko siya sinugo, alagad nagtaram siya saindo na garo baga siya sarong propeta saka pinatubod niya kamo sa kaputikan. Dai siya magkakaigwa nin mga kapagarakian sa kaibahan nindo. Dai siya mabubuhay tanganing mahiling an mararahay na bagay na gigibohon ko para sa sakong banwaan, huli ta tinaraman niya sinda na magrebelde tumang sako. Ako, an Kagurangnan, an nagtaram.”