Read Central Bicolano Jeremiah 3 Bible Online

Jeremiah 3 - Central Bicolano bible

Jeremiah 3

¹Nagsasabi an Kagurangnan, “Kun an sarong babae suhayan kan saiyang agom, dangan magpaagom siya sa ibang lalaki, dai na siya aakoon kan enot niyang agom. Ini an madigta kan daga. Israel, kadakul kan saimong sambay, alagad boot mo ngunyan na magbalik sako!

²Hilinga an alitoktok kan mga bulod. Igwa daw nin lugar duman na dai mo dinigtaan? Naghalat ka nin mga lalaki sa gilid kan tinampo, arog kan Arab na naghihipa nin mga mabibiktima sa kalangtadan. Dinigtaan mo an daga huli kan saimong karigsokan.

³Iyan an dahelan kun tadaw ta pinugol ko an uran asin dai nagbulos ini maski sa panahon kan pagtalubo kan mga tinanom. Garo ka sarong maraot na babae; mayo ka nin kasosopgan.

⁴“Sinasabi mo ngunyan sako, ‘Ika an sakong ama, asin namotan mo na ako magpoon kan ako aki pa.

⁵Dai ka magdadanay na anggot; dai ka mauuyam sako sagkod lamang!’ Israel, iyan an saimong itinaram, alagad nakaya mong gibohon an gabos na karatan.”

⁶Kan panahon ni Hadeng Josias, nagsabi sako an Kagurangnan, “Nahiling mo an ginibo kan Israel, an bakong maimbod na babae? Nagtalikod siya sako, asin sa ibabaw nin lambang halangkaw na bulod saka sa lindong nin lambang berdeng kahoy naggibo siya kan karigsokan kan babaeng maraot.

⁷Paghona ko, mabalik siya sako pakatapos na gibohon niya iyan. Alagad dai siya nagbalik, asin nahiling ini kan saiyang bakong maimbod na tugang, an Juda.

⁸Nahiling man kan Juda na sinuhayan ko saka pinahale an Israel huli kan saiyang pagigin bakong maimbod saka pagigin maraot. Alagad dai natakot an Juda, an bakong maimbod na tugang kan Israel. Siya man nagin maraot na babae.

⁹Dai man lamang niya ikinasopog an saiyang gibo. Dinigtaan niya an daga, dangan nagkasala siya nin adulteryo sa pagsamba sa mga gapo asin mga kahoy.

¹⁰Pagkatapos kan gabos na ini, an Juda, an bakong maimbod na tugang nin Israel, nagsagin-sagin na nagbalik sako alagad bakong tudok sa puso an saiyang pagbalik. Ako, an Kagurangnan, an nagtaram.”

¹¹Dangan tinaraman ako nin Kagurangnan na maski ngani nagtalikod saiya an Israel, mas nagpahiling ini nin karahayan ki sa Juda.

¹²Tinaraman niya ako na magduman sa Israel saka magsabi, “Bakong maimbod na Israel, magbalik ka sako. Dai taka aanggotan huli ta maheherakon ako. Dai ako maaanggot saimo sagkod pa man.

¹³Akoon mo sana na nagkasala ka asin nagrebelde tumang sa Kagurangnan, na saimong Dios. Ikumpisal mo na sa lindong nin lambang berdeng kahoy, itinao mo an saimong pagkamoot sa dayuhan na mga dios-dios asin dai ka nagkuyog kan sakong mga pagboot. Ako, an Kagurangnan, an nagtaram.

¹⁴“Bakong maimbod na banwaan, magbalik kamo huli ta ako an saindong Kagurangnan. Makua ako saindo nin saro sa lambang banwa asin duwa sa lambang kamaganakan, dangan ibabalik ko kamo sa Bukid nin Sion.

¹⁵Tatawan ko kamo nin mga pamayo na nagkukuyog sako, asin papamayohan ninda kamo na may kadonongan saka pakasabot.

¹⁶Dangan kun kamo dakul na nin marahay sa dagang iyan, dai na pag-oolayan kan mga tawo an manongod sa sakong Kaban nin Tipan. Dai na ninda ini iisipon, ni gigiromdomon; dai na ninda ini hihidawon. Dai na sinda magibo nin ibang kaban.

¹⁷Sa panahon na iyan, aapodon an Jerusalem na ‘An Trono nin Kagurangnan,’ asin an gabos na nasyon matiripon duman sa pagsamba sako. Dai na ninda susunodon an ipinapagibo sainda kan matagas saka maraot nindang mga puso.

¹⁸Makikiayon an Israel sa Juda, dangan magkaibahan na mabalik sinda hale sa amihan saka mag-eerok sa daga na itinao ko sa saindang mga ginikanan bilang pamana sagkod lamang.”

¹⁹Nagsasabi an Kagurangnan, “Israel, binoot kong akoon ka bilang sakong aking lalaki asin tawan ka nin sarong matubang na daga, an daga na pinakamagayon sa bilog na kinaban. Binoot kong apodon mo akong ama, asin dai ka na nanggad matalikod sako.

²⁰Alagad arog sa bakong maimbod na agom, dai ka nagin maimbod sako. Ako, an Kagurangnan, an nagtaram.”

²¹May nadangog na ribok sa mga alitoktok kan kabubuldan: iyan mga paghibi saka pagtangis kan banwaan nin Israel, huli ta namuhay sinda sa karatan asin an Kagurangnan na saindang Dios saindang nalingawan.

²²Magbalik kamo gabos na nagtalikod sa Kagurangnan; bobolongon niya kamo saka gigibohon na mga maimbod. Nagsasabi kamo, “Madolok kami sa Kagurangnan, huli ta siya an samong Dios.

²³Mayo nin ikinataong tabang samo an pagsamba sa mga dios-dios sa ibabaw kan kabubuldan. An tabang para sa Israel minahale nanggad sa Kagurangnan na samong Dios.

²⁴Alagad an pagsamba nyamo ki Baal, an dios nin kasosopgan, iyo an nagin dahelan kan pagkaubos kan samong mga hayop, mga aking lalaki saka babae, patin kan gabos na pinagalan kan samong mga ginikanan.

²⁵Dapat kaming pahigdaon sa kasosopgan, asin tahoban nin disonra. Kami asin an samong mga ginikanan danay na nagkasala sa Kagurangnan na samuyang Dios; dai mi nanggad kinuyog an saiyang mga pagboot.”