Read Central Bicolano Jeremiah 40 Bible Online

Jeremiah 40 - Central Bicolano bible

Jeremiah 40

¹Nagtaram sako an Kagurangnan pakatapos na talingkasan ako sa Rama ni Nebuzaradan, an pinakahalangkaw na opisyal kan hukbo. Nakakadenahan na dinara ako kaidto duman, kaiba an ibang mga taga Jerusalem saka taga Juda, na dadarahon bilang mga bilanggo sa Babilonia.

²Isiniblag ako kan pinakahalangkaw na opisyal saka sinabihan, “An Kagurangnan na saimong Dios nagpatanid nin karatan sa dagang ini,

³asin ngunyan inotob niya an sinabi niya. An gabos na ini nangyari huli ta nagkasala an saimong banwaan tumang sa Kagurangnan saka dai ninda siya sinunod.

⁴Hahaleon ko an kadena sa saimong mga kamot saka tatalingkasan taka. Kun boot mo, mag-iba ka sako sa Babilonia asin aatamanon taka. Alagad kun habo mo, nasa saimo iyan. Uya an bilog na daga na pwede mong pagpilian, asin magduman ka sa lugar na boot mo.”

⁵Kan dai ako nagsimbag, nagsabi si Nebuzaradan, “Magbalik ka ki Gedalias, na aking lalaki ni Ahikam saka makoapo ni Safan, na ibinugtak kan hade nin Babilonia bilang gobernador sa mga banwa nin Juda. Magduman ka saiya asin mag-erok ka sa kaibahan kan mga tawo o saen man na iniisip mong marahay na dumanan mo.” Dangan tinawan niya ako nin pagkakan saka regalo, asin pinalakaw.

⁶Nagduman ako ki Gedalias sa Mizpa saka nag-erok sa kaibahan kan mga tawo na nawalat sa daga nin Juda.

⁷Dai nagsuko an nagkapira sa mga opisyal saka soldados nin Juda. Nabaretaan ninda na si Gedalias iyo an ibinugtak kan hade nin Babilonia bilang gobernador kan daga saka parapamahala kan gabos na tawong dai dinarang bihag sa Babilonia—an mga dukha sa daga.

⁸Kaya nagduman ki Gedalias sa Mizpa si Ismael, na aking lalaki ni Netanias, si Johanan na aking lalaki ni Kareas, si Seraias na aking lalaki ni Tanhumet, an mga aking lalaki ni Efai na taga Netofa, asin si Jezanias na taga Maaca, kaiba an saindang mga tawohan.

⁹Sinabihan sinda ni Gedalias, “Dai kamo matakot na maglingkod sa mga taga Babilonia. Mag-erok kamo sa dagang ini, paglingkodan nindo an hade nin Babilonia asin mapapakarhay kamo.

¹⁰Mag-eerok ako digdi sa Mizpa tanganing magrepresentar para saindo kun magdigdi an mga taga Babilonia. Pwede kamong magtipon saka magsaray nin arak, mga bunga nin kahoy, saka lana nin oliba. Mag-eerok kamo sa mga baryo na saindong mapili.”

¹¹Nabaretaan man kan gabos na Israelita na yaon sa Moab, Ammon, Edom, asin sa iba pang daga, na tinugotan kan hade nin Babilonia na mag-erok sa Juda an nagkapirang Israelita asin na ginibo niya si Gedalias bilang gobernador ninda.

¹²Kaya naghale sinda sa mga lugar na pinagwarakan sainda, saka nagbalik sa Juda. Nagduman sinda ki Gedalias sa Mizpa, asin nagtiripon sinda nin dakul na arak saka mga bunga nin kahoy.

¹³Pakatapos kaini, nagduman ki Gedalias sa Mizpa si Johanan saka an mga lider kan mga soldados na dai nagsuruko.

¹⁴Nagsabi sinda, “Dai mo naaraman na si Ismael sinugo ni Hadeng Baalis nin Ammon tanganing gadanon ka?” Alagad dai nagtubod sainda si Gedalias.

¹⁵Dangan hilom na nagsabi ki Gedalias si Johanan, “Padumana ako ki Ismael asin gagadanon ko siya, asin mayo nin makakaaram kaini. Dai siya dapat pabayaan na gadanon ka. Magigin dahelan iyan tanganing mawarak an mga Judio na nagtiripon sa palibot mo asin mapahamak an mga natada sa Juda.”

¹⁶Alagad nagsimbag si Gedalias, “Dai mo paggibohon iyan! Bakong totoo an sinasabi mo manongod ki Ismael!”