Read Central Bicolano Jeremiah 41 Bible Online

Jeremiah 41 - Central Bicolano bible

Jeremiah 41

¹Kan ikapitong bulan, nag-abot sa Mizpa si Ismael na aking lalaki ni Netanias asin makoapo ni Elisama, sarong kaayon kan pamilya kan hade saka saro sa mga pangenot na opisyal kan hade, may kaibahan na sampolong lalaki tanganing makipaghilingan ki Gobernador Gedalias. Mantang nagkakakan sinda,

²binulnot ni Ismael asin kan sampolo niyang kairiba an saindang mga espada dangan ginadan si Gedalias.

³Ginadan man ni Ismael an gabos na Israelita na kaibahan ni Gedalias sa Mizpa, sagkod an mga soldados na taga Babilonia na yaon duman.

⁴Sunod na aldaw, bago naaraman nin siisay man an manongod sa paggadan ki Gedalias,

⁵otsentang lalaki an nag-abot hale sa Shekem, Shilo, asin Samaria. Inaris ninda an saindang barabas, ginisi an saindang mga gubing saka linugad an saindang mga hawak. May dara sindang trigo saka insenso na idodolot sa Templo.

⁶Kaya nagluwas hale sa Mizpa si Ismael; naghihibi siya mantang naglalakaw. Pagrani niya sainda, nagsabi siya, “Magdagos kamo tanganing mahiling nindo si Gedalias.”

⁷Pakalaog ninda sa syudad, ginadan sinda ni Ismael asin kan mga tawohan kaini, dangan itinapok sa sarong bubon an saindang mga bangkay.

⁸Alagad sampolo sa sainda an nagsabi ki Ismael, “Dai mo kami paggadanon! Igwa kami nin dakul na trigo, sebada, lana nin oliba, asin dugos na nakatago sa kaomahan.” Kaya dai niya sinda ginadan.

⁹An bubon na tinapokan ni Ismael kan mga bangkay kan mga lalaking ginadan niya, iyo an dakulang bubon na ipinakalot ni Hadeng Asa kan sinasalakay ini ni Baasa na hade nin Israel. An bubon pinano ni Ismael kan mga bangkay.

¹⁰Dangan ibinilanggo niya an mga aking babae kan hade asin an iba pang tawo sa Mizpa na ibinugtak ni Nebuzaradan, an pinakahalangkaw na opisyal, sa irarom kan pamamahala ni Gedalias. Binihag sinda ni Ismael asin dinara sinda sa Ammon.

¹¹Nabaretaan ni Johanan, asin kan kaiba niyang mga lider kan hukbo, an karatan na ginibo ni Ismael.

¹²Kaya ipinag-iba ninda an gabos nindang tawohan saka linamag si Ismael; inabotan ninda ini sa may dakulang tangke sa Gibeon.

¹³Nagkaorogma an mga bihag ni Ismael kan mahiling ninda si Johanan asin an kaiba kaining mga lider kan hukbo.

¹⁴Nagdaralagan sinda pasiring ki Johanan.

¹⁵Alagad si Ismael asin an walo sa saiyang tawohan nakadulag ki Johanan; nagpasiring sinda sa daga nin Ammon.

¹⁶Dangan tinipon ni Johanan asin kan mga lider kan hukbo an mga tawo—mga soldados, mga babae, mga aki, saka mga eunuko—na binihag ni Ismael hale sa Mizpa pakatapos na gadanon kaini si Gedalias.

¹⁷Natakot sinda sa mga taga Babilonia huli ta ginadan ni Ismael si Gedalias, na ibinugtak kan hade nin Babilonia bilang gobernador sa Juda. Kaya naglakaw sinda pasiring sa Egipto, tanganing makalikay sa mga taga Babilonia. Sa dalan, nag-ontok sinda sa Kimham na harani sa Betlehem.