Read Central Bicolano Jeremiah 46 Bible Online

Jeremiah 46 - Central Bicolano bible

Jeremiah 46

¹Nagtaram sako an Kagurangnan manongod sa mga nasyon.

²An enot iyo an manongod sa Egipto, sa hukbo ni Neco na hade nin Egipto, na dinaog ni Hadeng Nebukadnezzar nin Babilonia sa Carkemis na harani sa Salog nin Eufrates kan ikaapat na taon kan paghahade ni Jehoiakim sa Juda:

³“Nagkukurahaw an mga opisyal nin Egipto, ‘Andama nindo an saindong mga kalasag saka magduman kamo sa ralaban!

⁴Busalan na nindo an mga kabayo saka lunadan na nindo, O mga parakabayo! Maglinya na kamo saka sulotan an saindong mga helmet! Taisa an saindong garod! Isulot na nindo an gubing na panggera!’

⁵“Alagad ano ining nahihiling ko?” an hapot nin Kagurangnan. “Takot nin marahay na nag-aaratras sinda. Nadaog an saindang mga soldados asin marikas sindang nagdurulag; dai na sinda nagsalingoy, huli ta an katakotan maski saen.

⁶Alagad dai nakakaharayo an mga marikas magdalagan; dai nakakadulag an mga soldados. Natumba sinda saka nagadan sa may Salog nin Eufrates, sa parteng amihan.

⁷Siisay ining nag-iitaas, arog kan Nilo, arog sa sarong salog na an tubig nagsusupay sa pangpang?

⁸An Egipto iyo an nag-iitaas arog kan Nilo, arog sa sarong salog na an tubig nagsusupay sa pangpang. Nagsabi an Egipto, ‘Maitaas ako asin tatahoban ko an kinaban; raraoton ko an mga syudad saka gagadanon an mga nag-eerok diyan.

⁹Magdalagan kamo, mga kabayo asin mga karwahe. Magsalakay kamo, mga soldados: mga lalaking taga Etiopia saka Libya na may darang mga kalasag, asin kamong mga taga Lydia na eksperto sa pagpana.’”

¹⁰An aldaw na iyan iyo an aldaw kan Kagurangnan Dios nin mga hukbo: an aldaw nin pagbalos niya sa saiyang mga kaiwal. An espada niya makakan sagkod na mabasog, saka iinomon kaini an saindang dugo. Huli ta idinodolot nin Kagurangnan Dios nin mga hukbo an saiyang mga ginadan sa amihan, sa may Salog nin Eufrates.

¹¹Mga taga Egipto, dumuman kamo sa Gilead saka maghanap duman nin pambolong! Mayo nin halaga an kadakul bolong; mayo na nin pampaomay saimo.

¹²Nabaretaan kan mga nasyon an kasosopgan mo; nadangog nin lambang saro an saimong kinurahaw. Nabangga kan sarong soldados an kapwa niya soldados, asin sabay sindang natumba.

¹³Iyo ini an itinaram sako nin Kagurangnan kan mag-abot si Hadeng Nebukadnezzar nin Babilonia tanganing salakayon an Egipto,

¹⁴“Ipahayag mo ini sa mga banwa nin Egipto, sa Migdol, Memfis, saka sa Tafanhes: ‘Mag-andam kamo sa pagdepensa sa saindong sadiri, huli ta raraoton kan gera an gabos na yaon saindo!

¹⁵Tadaw ta nagdulag si Apis, an makosog nindong dios-dios? Tadaw ta dai na siya nakatindog? Huli ta ibinagsak siya nin Kagurangnan!’

¹⁶Nagkasiringkog saka nagkaturumba an saindong mga soldados, asin nagsabi an lambang saro, ‘Magpuli na kita sa satong banwaan tanganing makadulag kita sa espada kan kaiwal!’

¹⁷“An hade nin Egipto apodon nindong, ‘An maribok na nagsasayang nin panahon.’

¹⁸Ako, an Kagurangnan nin mga hukbo, iyo an hade. Ako, iyo an Dios na buhay. Arog sa Bukid nin Tabor sa tahaw kan mga bukid, asin arog kan Bukid nin Carmelo sa gilid kan dagat, an kosog kan sarong maabot na masalakay saindo.

¹⁹Mga taga Egipto, andama nindo an saindong sadiri sa pagkabihag! An Memfis magigin sarong desyerto, sarong raot na lugar na mayo nin mag-eerok.

²⁰An Egipto garo sarong magayon na baka, na sinalakay nin sarong mangangagat na langaw, na hale sa amihan.

²¹Maski an saiyang tinandanan na mga soldados garo mga ogbon na baka na dai pa tataong lumaban. Dai sinda nagtindog saka nakilaban; sinda gabos nag-aratras saka nagdurulag. Nag-abot na an aldaw nin saindang kapahamakan; an panahon na sinda papadusahan.

²²Nagdudulag an Egipto, na arog sa nagdudulag na halas, huli ta nagdadangadang an hukbo kan kaiwal. Sinasalakay siya ninda kan dara nindang mga patok, arog sa mga lalaking nagpapalod nin mga kahoy,

²³asin nagraraot kan sarong mahibog na kadlagan. An saindang mga tawohan kadakul nin marahay kaya dai mabilang; mas dakul sinda ki sa mga doron.

²⁴Napasopog an mga taga Egipto; sinakop sinda kan mga tawo na hale sa amihan. Ako, an Kagurangnan, an nagtaram.”

²⁵Nagsasabi an Kagurangnan nin mga hukbo, an Dios nin Israel, “Papadusahan ko si Amon, an dios-dios nin Tebes, kaiba an Egipto asin an mga dios-dios saka an mga hade kaini. Kukuahon ko an hade nin Egipto asin an gabos na nananarig sa saiya,

²⁶dangan itatao ko sinda sa mga tawong boot gumadan sainda, ki Hadeng Nebukadnezzar nin Babilonia saka sa saiyang hukbo. Pakatapos, mag-eerok giraray sa Egipto an mga tawo arog kan ginibo ninda kaidtong panahon. Ako, an Kagurangnan, an nagtaram.

²⁷“Banwaan ko, dai kamo matakot; mga taga Israel, dai kamo makubhanan. Ililigtas ko kamo hale sa harayong daga na iyan, sa daga na pinagbilanggoan saindo. Mapuli kamo saka mamumuhay na matoninong; magigin matiwasay kamo, asin mayong mapatakot saindo.

²⁸Masasakaibahan nindo ako tanganing iligtas kamo. Roronoton ko an gabos na nasyon na pinagwarakan ko saindo, alagad dai ko kamo pupuhoon. Dai ako matugot na dai kamo mapadusahan; alagad kun padusahan ko na kamo, gigibohon ko an matanos para saindo. Ako, an Kagurangnan, an nagtaram.”