Read Central Bicolano Jeremiah 47 Bible Online

Jeremiah 47 - Central Bicolano bible

Jeremiah 47

¹Bago sinalakay kan hade nin Egipto an Gaza, nagtaram sako an Kagurangnan manongod sa mga Filisteo.

²An sabi niya: “Hilinga! An katubigan nag-iitaas sa amihan saka magsusupay iyan arog kan nagbabahang salog. Malalantopan kaiyan an daga asin an gabos na yaon diyan, an mga syudad saka an mga tawo na nag-eerok diyan. Mahagad nin tabang an mga tawo; mapait na magtatangis an lambang nag-eerok sa kinaban.

³Madadangog ninda an tanog kan nagdadalagan na mga kabayo, an kinadalkadal kan mga karwahe, an rinagot kan mga rweda. Dai na babalikan kan mga ama an saindang mga aki; luluyahon an saindang mga kamot.

⁴Nag-abot na an panahon kan paggadan sa mga Filisteo, tanganing mahale an natatadang mga katabang kan Tiro saka Sidon. Ako, an Kagurangnan, an magadan sa mga Filisteo, na gabos hale sa mga baybayon nin Creta.

⁵Dakulang kamondoan an nag-abot sa mga taga Gaza, asin dai nagkakaalo an mga taga Askelon. Sagkod nuarin magmomondo an mga natada sa mga Filisteo?

⁶Nagkukurahaw kamo, ‘Espada kan Kagurangnan; sagkod nuarin ka manlulugad? Maglaog ka sa saimong sarongan, mag-ontok ka saka magpahingalo!’

⁷Alagad paano iyan magpapahingalo, mantang tinawan ko iyan nin gigibohon? Pinagbotan ko iyan na salakayon an Askelon saka an mga tawo na nag-eerok sa baybayon.”