Read Central Bicolano Jeremiah 48 Bible Online

Jeremiah 48 - Central Bicolano bible

Jeremiah 48

¹Iyo ini an itinaram nin Kagurangnan nin mga hukbo manongod sa Moab: “Herak man sa mga taga Nebo— rinaot na an saindang banwa! Nasakop na an Kiriataim, rinumpag an makosog kaining bantayan asin pinasopog an mga namamanwaan;

²mayo na an kabantogan nin Moab. Sinakop na kan kaiwal an Hesbon saka iniisip nindang raoton an nasyon nin Moab. Papaalohon an banwa nin mga tawong rungaw; sasalakayon iyan kan mga soldados.

³Nagkukurahaw an mga taga Horonaim, ‘Kadahasan! Panggagaba!’

⁴“Rinaot na an Moab; dangoga an mga aking nagtatangis.

⁵Dangoga an saindang pagsiloksigok, mantang patukad sinda sa Luhit, asin an saindang mga inagrangay mantang palugsot sinda sa Horonaim.

⁶‘Maghidali kamo, iligtas nindo an saindong buhay!’ an sabi ninda. ‘Magdalagan kamo arog kan lalaw na asno sa desyerto!’

⁷“Moab, nanarig ka sa saimong kosog asin yaman, alagad ngunyan maski ika masasakop; mabibihag an saimong dios-dios na si Kemos, kaiba an saiyang mga prinsipe saka mga padi.

⁸Mayo ni sarong banwa na makakalikay sa pagkagaba; an kapantayan asin an kapatagan parehong mararaot. Ako, an Kagurangnan, an nagtaram.

⁹Magpatindog kamo nin lapida para sa Moab; dai na mahahaloy, raraoton na iyan. Papabayaan na raot an saiyang mga banwa, saka mayo na nin mag-eerok duman.” (

¹⁰Maldisyonon an tawong pabaya sa pagsunod sa trabaho nin Kagurangnan! Maldisyonon an tawong dai naninigbas saka dai nanggagadan!)

¹¹Nagtaram an Kagurangnan, “Danay na namuhay sa katiwasayan an Moab asin dai pa lamang nabihag. Garo siya arak na dai hinihiro; dai siya pinagpapalis-palis sa mga lalagan. Kaya dai nag-iiba an saiyang namit, asin dai nagbabago an saiyang parong.

¹²“Kaya maabot an panahon na mapadara ako nin mga tawo tanganing iula an Moab arog sa arak. Hahaleon ninda an nasa laog kan lalagan nin arak saka papasaon ninda ini.

¹³Dangan ikakasopog kan mga taga Moab si Kemos, na saindang dios-dios, arog kan ikinasopog kan mga taga Israel si Betel, an dios-dios na saindang pinagsarigan.

¹⁴“Mga kalalakihan nin Moab, tadaw ta sinasabi nindo na kamo mga bayani, asin mga soldados na maisog sa pakikilaban?

¹⁵Nag-abot na an maraot kan Moab asin kan saiyang mga syudad; an pinakamarahay sa saiyang mga hoben gagaradanon. Ako an hade, an Kagurangnan nin mga hukbo, asin ako an nagtaram.

¹⁶Harani na an kataposan nin Moab; nagdadangadang na an saiyang pagkaraot.

¹⁷“Magmondo kamo para sa nasyon na iyan, kamo na nag-eerok sa harani niya, kamo gabos na nakakaaram kan saiyang kabantogan. Sabihon nindo, ‘Pinutol na an mapangyari niyang paghahade; mayo na an saiyang kosog asin kamurawayan.’

¹⁸Kamong nag-eerok sa Dibon, bumaba kamo hale sa saindong kamurawayan saka magtukaw kamo sa matagas na daga; uya na an marumpag kan Moab asin binayaan niyang raot an mga bantayan.

¹⁹Kamong nag-eerok sa Aroer, magtindog kamo sa gilid kan dalan saka maghalat; hapoton nindo an nagdudurulag, aramon nindo sainda kun ano an nangyari.

²⁰‘Buminagsak na an Moab,’ an isisimbag ninda, ‘Tangisan nindo siya; saro ining kasosopgan. Ipahayag nindo sa may Salog nin Arnon na rinumpag na an Moab!’

²¹“An padusa nag-abot na sa mga syudad sa kapatagan: sa Holon, sa Jaza, sa Mefat,

²²sa Dibon, sa Nebo, sa Bet-diblataim,

²³sa Kiriataim, sa Bet-gamul, sa Bet-meon,

²⁴sa Keriot, asin sa Bozra. An padusa nag-abot na sa gabos na syudad nin Moab, harayo man o harani.

²⁵Rinonot na an kosog nin Moab, rinaot na an saiyang kapangyarihan. Ako, an Kagurangnan, an nagtaram.”

²⁶Nagtaram an Kagurangnan, “Burata an Moab huli ta nagrebelde siya tumang sako. Magliligid siya sa sadiri niyang suka, asin pagngingisihan siya kan mga tawo.

²⁷Moab, giromdoma kan pagtuyatuyaon mo an banwaan nin Israel. Ibinilang mo sinda siring sa mga tawong nadakop na kaiba kan mga mahabon.

²⁸“Kamong mga nag-eerok sa Moab, magharale kamo sa saindong mga banwa! Lakaw saka mag-erok kamo sa kagapoan! Arogon nindo an mga salampati na naggigibo nin salagan sa mga gilid kan ampas.

²⁹Mapaabaw-abaw nanggad an Moab! Nabaretaan ko an kapaabaw-abawan, kapalangkawan, kahambogan kan mga tawo, asin an pagigin makasadiri ninda.

³⁰Ako, an Kagurangnan, nakakaaram kan saindang kapalangkawan. Mayo nin ibubungang marahay an saindang kahambogan. Dai mahahaloy an mga bagay na saindang ginigibo.

³¹Kaya maghahaya ako para sa mga taga Moab asin para sa mga taga Kir-heres.

³²Orog pa sa pagtangis ko para sa mga taga Jazer an gigibohon kong pagtangis para saindo, mga taga Sibma. Syudad nin Sibma, garo ka sarong balagon na an mga sanga nakalampas sa Gadan na Dagat asin nakaabot sa Jazer. Alagad ngunyan, rinaot na an mga bunga kan saimong mga kahoy saka mga ubas.

³³Pinara na an kagayagayahan asin kaogmahan sa matubang na daga nin Moab. Pinaontok ko na an pagbulos kan arak sa mga pugaan nin ubas; mayo na nin magibo nin arak saka makurahaw huli sa kaogmahan.

³⁴Nagkukurahaw an Hesbon saka Eleale, asin an kinurahaw ninda nakakaabot sa Jahaz; nadadangog iyan magpoon sa Zoar sagkod sa Horonaim saka Eglat-selisiya. Huli ta nagmara maski an tubig kan Sapa nin Nimrim.

³⁵Papaonton ko an mga tawo sa Moab sa pagdolot nin mga sakripisyo sa paganong mga lugar na pagsasambahan asin an pagtutong nin insenso para sa saindang mga dios-dios. Ako, an Kagurangnan, an nagtaram.

³⁶“Kaya nagmomondo an sakong puso para sa Moab asin para sa mga taga Kir-heres, arog kan sarong tawo na nagtutugtog nin panambitan sa plawta, huli ta mayo na an gabos na kayamanan na sadiri ninda.

³⁷Inaris ninda an saindang buhok saka inahit an saindang barabas. Linugad ninda an saindang mga kamot saka nagsulot nin sako.

³⁸Sa lambang atop nin harong sa Moab asin sa gabos na plasa, mayo nin madadangog kundi an panambitan, huli ta pinasa ko an Moab arog sa sarong tapayan na mayo nin nagkakagusto.

³⁹Pinasa na an Moab! Maghaya kamo! Nawaraan nin onra an Moab. Raot na ini asin pinagtutuyatuya kan gabos na kataraed na nasyon. Ako, an Kagurangnan, an nagtaram.”

⁴⁰Nanuga an Kagurangnan na maabot an sarong nasyon na arog karikas sa agila asin uunaton niya an saiyang mga pakpak laban sa Moab;

⁴¹sasakopon niya an mga banwa asin an mga bantayan. Sa aldaw na iyan magkakatarakot an mga soldados nin Moab arog sa pagkatakot nin sarong babaeng madali nang mangaki.

⁴²Raraoton an Moab asin dai na iyan magigin sarong nasyon, huli ta nagrebelde sinda tumang sako.

⁴³Takot, mga kalot, saka mga litag an naghahalat sa mga taga Moab. An Kagurangnan an nagtaram.

⁴⁴An makadulag sa katakotan mahuhulog sa mga kalot, an makahawas hale sa mga kalot madadakop sa mga litag, huli ta itinalaan na nin Kagurangnan an pagraot sa Moab.

⁴⁵Magtatago sa Hesbon an mga makadulag; iyan an syudad na dating pinamahalaan ni Hadeng Sihon. Alagad nagkakalayo an Hesbon asin nasusulo an palasyo ni Hadeng Sihon. Tinompos kan kalayo an mga pagdolonan asin an mga kabukidan kan mga taga Moab na tood sa pakilaban.

⁴⁶Herak man saimo, O Moab! Ginaradan na an mga tawong nagsasamba ki Kemos, asin binihag na an saindang mga aki.

⁴⁷Alagad maabot an panahon na an Moab papauswagon giraray nin Kagurangnan. Ini gabos an itinaram nin Kagurangnan na mangyayari sa Moab.